అంబులెన్స్‌లో ఉత్సవానికి వచ్చిన కేంద్రమంత్రి.. కేసు నమోదు చేసిన పోలీసులు

 కేంద్రమంత్రి సురేష్ గోపిపై కేసు నమోదైంది. కేరళలోని ప్రసిద్ధమైన ఉత్సవానికి ఆయన అంబులెన్స్‌లో వచ్చారని ఫిర్యాదు చేయగా.. పోలీసులు కేసు నమోదు చేశారు. కేరళలోని ప్రసిద్ధి చెందిన త్రిస్సూర్ పూరం అనే ఉత్సవానికి అంబులెన్స్‌లో వచ్చారని స్థానిక రాజకీయ నాయకులు ఫిర్యాదు చేశారు. దీంతో కేరళ పోలీసులు తాజాగా కేసు నమోదు చేశారు. ఈ ఏడాది జరిగిన లోక్‌సభ ఎన్నికల సమయంలో త్రిస్సూర్ నియోజకవర్గం నుంచి పోటీ చేసిన సురేష్ గోపి.. ఆ ఉత్సవానికి తన వాహనంలో కాకుండా అంబులెన్స్‌లో వచ్చారని స్థానికులు ఆరోపిస్తున్నారు. కేంద్రమంత్రి సురేష్ గోపి అలా రావడాన్ని ప్రతిపక్షాలు తీవ్రంగా ఖండించాయి. సురేష్ గోపికి సహాయం చేసేందుకే త్రిస్సూర్ పూరం ఉత్సవానికి అంతరాయం కలిగించారని ఆరోపించాయి. అప్పటి నుంచి దీనిపై వివాదం నడుస్తుండగా.. తాజాగా పోలీసులు కేసు నమోదు చేశారు.

అయితే తాను త్రిస్సూర్ పూరం ఉత్సవానికి అంబులెన్స్‌లో వచ్చారని నమోదైన కేసుపై కేంద్రమంత్రి సురేష్ గోపి స్పందించారు. అవన్నీ అసత్య ఆరోపణలు అంటూ వాటిని ఖండించారు. ప్రతిపక్షాలు ఆరోపిస్తున్నట్లు తాను అంబులెన్స్‌లో త్రిస్సూర్ పూరం ఉత్సవానికి రాలేదని.. అవన్నీ అవాస్తవాలని కొట్టిపారేశారు. తన సొంత కారులోనే ఆ ఉత్సవానికి వెళ్లానని స్పష్టం చేశారు.

తాను అంబులెన్స్‌లో వెళ్లడం ఎవరైనా చూశారా అని ప్రశ్నించారు. ఒకవేళ ఎవరైనా చూస్తే అందుకు తగిన ఆధారాలు చూపించాలని డిమాండ్ చేశారు. ఎవరైనా నిజాన్ని బయటపెట్టాలంటే.. కేరళ ముఖ్యమంత్రి పినరయి విజయన్‌ ఆధ్వర్యంలోని రాష్ట్ర పోలీసుల విచారణ సరిపోదని.. ఈ కేసు దర్యాప్తు బాధ్యతలను సీబీఐకి అప్పగించాలని అన్నారు. తాను అన్నింటికీ సిద్ధంగా ఉన్నానంటూ ప్రతిపక్షాలకు కేంద్రమంత్రి సవాల్‌ విసిరారు.

ఈ ఏడాది జరిగిన సార్వత్రిక ఎన్నికల్లో కేరళలోని త్రిస్సూర్ లోక్‌సభ నియోజకవర్గం నుంచి పోటీ చేసిన సురేష్ గోపి విజయం సాధించారు. సీపీఐ నేత వీఎస్‌ సునీల్‌ కుమార్‌పై దాదాపు 70 వేల ఓట్ల మెజార్టీతో సురేష్ గోపి గెలుపొందారు. ఉత్తర భారతదేశంలో బలంగా ఉన్న బీజేపీ.. సురేష్ గోపి త్రిస్సూర్‌లో గెలవడంతో కేరళలో తొలిసారి ఖాతా తెరిచింది. దీంతో ఆయనకు కేంద్రమంత్రి పదవి వరించింది.