వైసీపీకి మరో షాక్.. ఈసారి విజయవాడలో

ఆంధ్రప్రదేశ్‌లో వైఎస్సార్ కాంగ్రెస్ పార్టీకి వరుస షాకులు తగులుతున్నాయి. పార్టీ నుంచి నేతల వలసలు కొనసాగుతున్నాయి. ఇప్పటికే పలువురు కీలక నేతలు పార్టీలు మారగా.. ద్వితీయ శ్రేణి నాయకత్వం సైతం అదే బాటలో పయనిస్తోంది. వైసీపీ కార్పొరేటర్లు, కౌన్సిలర్లు.. ఆ పార్టీని వదిలి పక్కపార్టీల వైపు చూస్తున్నారు. తాజాగా విజయవాడలో వైసీపీకి బిగ్ షాక్ ఇచ్చారు అక్కడి కార్పొరేటర్లు, నేతలు. విజయవాడ వైసీపీకి చెందిన స్థానిక సంస్థల ప్రతినిధులు, పలువురు కార్పొరేటర్లు జనసేనలో చేరిపోయారు. జనసేన అధినేత, డిప్యూటీ సీఎం పవన్ కళ్యాణ్ సమక్షంలో వీరంతా జనసేన కండువా కప్పుకున్నారు. విజయవాడ 16వ డివిజన్ కార్పొరేటర్ ఉమ్మడిశెట్టి రాధిక, 38వ డివిజన్ కార్పొరేటర్ అప్పాజీరావు, 48వ డివిజన్ కార్పొరేటర్ ఆదిలక్ష్మి, 51వ డివిజన్ కార్పొరేటర్ రాజేష్‌తో పాటుగా.. జగ్గయ్యపేట నియోజకవర్గం వత్సవాయి జెడ్పీటీసీ, అలాగే అమలాపురం, పుంగనూరు, ధర్మవరం నియోజకవర్గాల నుంచి పలువురు నేతలు జనసేనలో చేరారు.

మంగళగరి జనసేన పార్టీ కార్యాలయంలో కండువాలు కప్పి వీరందరినీ జనసేనలోకి ఆహ్వానించిన పవన్ కళ్యాణ్.. పార్టీని ప్రజల్లోకి తీసుకెళ్లాలని సూచించారు. పార్టీ కోసం కష్టపడిన ప్రతీ ఒక్కరిని గుర్తుంచుకుంటామని చెప్పారు. ఏ మాత్రం ఆశలు లేని సమయంలో నాదెండ్ల మనోహర్, హరిప్రసాద్ వంట నేతలు జనసేనలో చేరి, తన వెంట నడిచారని పవన్ కళ్యాణ్ గుర్తు చేసుకున్నారు. 2016లో మంగళగిరి పార్టీ ఆఫీసులో సమావేశం ఏర్పాటు చేస్తే.. మీడియా సైతం వచ్చేవారు కాదంటూ గుర్తు చేసుకున్నారు. అయితే అలాంటి విపత్కర పరిస్థితుల్లోనూ నాదెండ్ల మనోహర్, హరిప్రసాద్ అండగా నిలబడ్డారని.. పార్టీ బలోపేతం కోసం పనిచేశారని చెప్పుకొచ్చారు.

రాష్ట్రాభివృద్ధి కోసం కూటమి సర్కారు నారా చంద్రబాబు నాయుడు నాయకత్వంలో పనిచేస్తోందన్న పవన్ కళ్యాణ్.. ఈ క్రమంలో ప్రతి ఒక్కరూ అండగా నిలబడాలని కోరారు. మనమంతా కలిసి ప్రజల కోసం పనిచేద్దామని పిలుపునిచ్చారు. ఈ క్రమంలోనే సామినేని ఉదయభాను ప్రస్తావన తెచ్చారు పవన్ కళ్యాణ్. సామినేని ఉదయభాను కూడా ఈ పాటికి అసెంబ్లీలోకి అడుగుపెట్టాల్సి ఉండేదని.. కానీ కొద్దిలో ఆ ఛాన్స్ పోయిందని పవన్ కళ్యాణ్ అన్నారు. వచ్చే రోజుల్లో ఉదయభాను నిర్ణయాత్మక పాత్ర పోషించే స్థాయికి చేరుకుంటారని విశ్వాసం వ్యక్తం చేశారు.