రైల్వే జోన్‌పై ఎగిరిగంతేసే వార్త.. విశాఖలో ఆఫీసుకు టెండర్లు ఆహ్వానం

ఉమ్మడి ఆంధ్రప్రదేశ్ విభజన చట్టంలో పేర్కొన్న విశాఖ కేంద్రంగా రైల్వే జోన్ ఏర్పాటు హామీ కార్యరూపం దాల్చబోతోంది. రాష్ట్ర విభజన జరిగి పదేళ్లు దాటినా.. ఇంత వరకూ జోన్ ఏర్పాటు కాలేదు. తాజాగా, దక్షిణ కోస్తా రైల్వే జోన్‌ (Vizag Railway zone) ఏర్పాటులో కీలక ముందుడుగు పడింది. విశాఖపట్నంలో జోనల్‌ కార్యాలయ నిర్మాణానికి రైల్వేశాఖ టెండర్ ప్రక్రియ ప్రారంభింంచింది. 9 అంతస్తులు, రెండు సెల్లార్‌ పార్కింగ్‌ ఫ్లోర్లతో కలిపి మొత్తం 11 అంతస్తుల్లో భవన నిర్మాణానికి టెండర్లు ఆహ్వానించింది.

 ఇటీవల టీడీపీ కూటమి ప్రభుత్వం 53 ఎకరాల భూమిని రైల్వేశాఖకు అప్పగించింది. దీంతో జోన్‌ కార్యాలయ నిర్మాణానికి టెండర్ల ప్రక్రియ మొదలైంది.. రూ.149.16 కోట్ల అంచనా వ్యయంతో ఈ భవనం నిర్మించనున్నారు. ఆసక్తి ఉన్న కాంట్రాక్టర్లు డిసెంబర్‌ 27లోపు టెండర్లు దాఖలు చేయాలని రైల్వేశాఖ సూచించింది.. టెండర్లు దక్కించుకున్న సంస్థ రెండేళ్లలో నిర్మాణం పూర్తిచేయాలని నిర్దేశించింది. ప్రధాని నరేంద్ర మోదీ నవంబరు 29న విశాఖలో పర్యటించనున్నారు. ఈ పర్యటనలో ఆయన రైల్వే జోన్2కు శంకుస్థాపన చేయనున్నారని అధికార వర్గాలు అంటున్నారు. ఈ క్రమంలోనే రైల్వే శాఖ టెండర్ నోటిఫికేషన్ జారీచేయడం ప్రాధాన్యత సంతరించుకుంది.

కాగా, నవంబరు 2022లో విశాఖ డీఆర్‌ఎం ఆఫీసు వెనుక ఉన్న వైర్లెస్‌ కాలనీలో జోన్‌ కార్యాలయం నిర్మాణానికి శంకుస్థాపనకు ఏర్పాట్లుచేశారు. రాత్రికి రాత్రి ఏమైందో తెలియదు గానీ రైల్వే మంత్రి ఆ స్థలాన్ని పరిశీలించి వెళ్లాక కార్యక్రమం వాయిదా వేశారు. ఆ తర్వాత జోన్‌కు ముడసర్లోవలో భూములే కావాలని రైల్వే శాఖ పట్టుబట్టింది. ఒకానొక దశలో భూమి ఇస్తే వారం రోజుల్లో శంకుస్థాపన చేస్తామని రైల్వే మంత్రి అశ్వినీ వైష్ణవ్‌ ప్రకటించారు

ఆగస్టులో చినగదిలి మండలం ముడసర్లోవ గ్రామం సర్వే నంబర్లు 57, 58, 59/1, 61/1, 62, 63, 64, 65లో 52.22 ఎకరాల భూమిని రైల్వే అధికారులకు ఇచ్చారు. ఆ భూమిని మ్యుటేషన్‌ ద్వారా రెవెన్యూ రికార్డుల్లో రైల్వే శాఖకు అందజేస్తున్నట్టు పేర్కొన్నారు. కాగా, జోన్‌ మంజూరు చేశారు కాబట్టి డివిజన్లను విడదీసి, ఉద్యోగులను కేటాయించి, ఏదో ఒక భవనంలో ముందు కార్యకలాపాలు ప్రారంభించాలని విశాఖ వాసులు చాలా కాలం నుంచి డిమాండ్‌ చేస్తున్నారు. తొలుత జోన్‌ కార్యకలాపాలు మొదలైతే ఆ తర్వాత సొంత భవన నిర్మాణం చేసుకోవచ్చని నిపుణులు అంటున్నారు. దానికి ఎలాగూ రెండు నుంచి మూడేళ్లు పడుతుంది కాబట్టి అంతవరకు కార్యకలాపాలు ఆపడం తగదని వారు సూచిస్తున్నారు.