శబరిమలలో అపచారం.. పవిత్ర పదునెట్టాంబడిపై పోలీసుల ఫోటోషూట్

రెండు నెలల పాటు సాగే మండల మకరు విళక్కు యాత్ర కోసం పవిత్ర పుణ్యక్షేత్రం శబరిమల అయ్యప్ప స్వామి ఆలయం ఈ నెల 15న తెరుచుకున్న విషయం తెలిసిందే. అయ్యప్పను దర్శించుకోడానికి ఏపీ, తెలంగాణ, తమిళనాడు, కర్ణాటకతో పాటు దేశం నలుమూలల నుంచి పెద్ద సంఖ్యలో భక్తులు తరలివస్తున్నారు. ఇరుముడి తలపై ధరించి.. పవిత్ర పదునెట్టాంబడి (పద్దెనిమిది మెట్లు) మీదుగా స్వామిని దర్శించుకున్నారు. మాలధారణ చేసుకుని, ఇరుముడితో వచ్చినవారికి మాత్రమే పదునెట్టాంబడి ఎక్కే అర్హత ఉంటుంది. సాధారణ భక్తులకు 18 మెట్ల పక్కన ఉండే మార్గం ద్వారా అనుమతిస్తారు.

అత్యంత పవిత్రమైన ఈ పదునెట్టాంబడి వద్ద భక్తుల భద్రత కోసం నియమించిన పోలీసులు.. ఫొటోలు ఫోజులిచ్చారు. యూనిఫాంలో ఉన్న వీరంతా అయ్యప్ప స్వామికి వ్యతిరేక దిశలో కూర్చుని ఫొటో దిగడం సంప్రదాయాలకు పూర్తి విరుద్దమని భక్తులు తీవ్ర ఆగ్రహం వ్యక్తం చేస్తున్నారు. దీనిపై స్థానిక మీడియాలో కథనం రావడంతో కేరళ ఏడిజీపీఎస్ శ్రీజిత్ స్పందించారు. దీనికి సంబంధించి సమగ్ర నివేదికను అందజేయాల్సిందిగా సన్నిధానం ప్రత్యేక అధికారిని ఆదేశించారు. నవంబరు 24న మధ్యాహ్నం 1.30 గంటకు అక్కడ విధుల్లో ఉన్న 30 మంది పోలీసులు.. తమ డ్యూటీ ముగియడానికి ముందు పదునెట్టాంబడిపై స్వామికి వ్యతిరేకంగా నిలబడి తీసుకున్న ఫోటో సోషల్ మీడియాలో వైరల్ అయ్యింది.

ఈ ఘటనపై కేరళ హైకోర్టు సైతం ఆందోళన వ్యక్తం చేసింది. ఇటువంటి చర్యలను ఎట్టి పరిస్థితుల్లోనూ అమోదించబోమని పేర్కొంది. అలాగే, శబరిమలలో భక్తుల వద్ద అధిక మొత్తంలో దుకాణదారులు డబ్బులు వసూలు చేస్తున్నారని, దీనిపై చర్యలు తీసుకోవాలని అధికారులు ఆదేశించింది. తరుచూ దుకాణాల్లో తనిఖీలు నిర్వహించాలని సూచించింది. ఒకవేళ ఎవరైనా ఎంఆర్పీ కంటే అధిక ఛార్జీలు వసూలుచేస్తున్నట్టు గుర్తిస్తే వారిపై తప్పనిసరిగా చర్యలు తీసుకోవాలని పేర్కొంది.

ఈ ఘటనపై విశ్వహిందూ పరిషత్ రాష్ట్రశాఖ అధ్యక్షుడు వీజీ థంపి, ప్రధాన కార్యదర్శి వీఆర్ రాజశేఖరన్ ఆగ్రహం వ్యక్తం చేశారు. శబరిమల ఆలయం అనగానే అక్కడ ఉండే 18 మెట్లు గుర్తుకొస్తాయని, మాల ధారణ చేసి, కఠోర నియమ నిష్ఠలను పాటించి, ఇరుముడితో వచ్చిన భక్తులకు మాత్రమే అధిరోహించే అర్హత ఉంటుందన్నారు. అటువంటి ఈ పవిత్రమైన మెట్లపై ఫోటో షూట్ చేయడం ఏంటి? అని మండిపడ్డారు.

ఇక,. పదునెట్టాంబడిపై తొలి అయిదు మెట్లను పంచేంద్రియాలుగానూ.. ఆ తరువాతి ఎనిమిది మెట్లను కామ, క్రోధ, లోభ, మద, మోహ, మాత్సర్య, అలసత్వాన్ని సూచికగా.. చివరి మూడు మెట్లు సత్వ, తమో, రజో గుణాలు, చివరి రెండు మెట్లు విద్య, అవిద్యను సూచిక. ఆ 18 మెట్లను అధిరోహించి అయ్యప్పను దర్శించుకోవడం వల్ల వాటన్నింటిని జయించినట్టు భక్తులు విశ్వసిస్తారు. అంతటి ప్రాముఖ్యత ఉన్న ఈ పదునెట్టంబాడపై పోలీసులు గ్రూప్ ఫొటో దిగడం వివాదాస్పదమవుతోంది. అటు, ఉన్నతాధికారులు దీనిపై క్రమశిక్షణ చర్యలు చేపట్టారు. ఫోటో షూట్‌లో పాల్గొన్న 23 మంది పోలీసులను కన్నూర్ క్యాంప్‌కు అటాచ్ చేశారు.