నాలుగోసారి జార్ఖండ్ సీఎంగా హేమంత్ సోరెన్ ప్రమాణం.. హాజరైన ఇండియా కూటమి నేతలు

జార్ఖండ్‌లో కొత్త ప్రభుత్వం కొలువుదీరింది. ముఖ్యమంత్రిగా జార్ఖండ్ ముక్తి మోర్చా నేత హేమంత్ సోరెన్ నాలుగోసారి ప్రమాణ స్వీకారం చేశారు. రాజధాని రాంచీలో జరిగిన ఈ ప్రమాణ స్వీకారోత్సవానికి ఇండియా కూటమి నేతలు అందరూ హాజరయ్యారు. జార్ఖండ్ 14వ ముఖ్యమంత్రిగా హేమంత్‌ సోరెన్‌ చేత.. గవర్నర్‌ సంతోష్‌ కుమార్‌ గంగ్వార్‌ ప్రమాణం చేయించారు. ఇక హేమంత్ సోరెన్ ప్రమాణ స్వీకారోత్సవానికి ఆయన కుటుంబ సభ్యులు అందరూ హాజరయ్యారు. హేమంత్ సోరెన్ తండ్రి, జార్ఖండ్ ముక్తి మోర్చా అధినేత శిబుసోరెన్, తల్లి రూపీ సోరెన్.. భార్య కల్పనా సోరెన్, పిల్లలు కూడా హాజరయ్యారు.

రాంచీలోని మొరాదాబాద్ స్టేడియంలో నిర్వహించిన జార్ఖండ్ ముఖ్యమంత్రి ప్రమాణ స్వీకార కార్యక్రమానికి ఇండియా కూటమి నేతలంతా హాజరయ్యారు. అయితే ప్రస్తుతం ముఖ్యమంత్రి హేమంత్ సోరెన్ మాత్రమే ప్రమాణం చేశారు. మహాఘట్‌బంధన్‌లో భాగంగా మంత్రివర్గంలో ఎవరెవరికి చోటు కల్పించాలనేది ఇంకా తేలకపోవడంతో ఎవరూ మంత్రులుగా ప్రమాణ స్వీకారం చేయలేదు. జార్ఖండ్‌ అసెంబ్లీలో మొత్తం 81 స్థానాలు ఉండగా.. జేఎంఎం నేతృత్వంలోని కూటమికి 56 స్థానాలు రాగా.. బీజేపీ కూటమికి కేవలం 24 స్థానాలు మాత్రమే వచ్చాయి. జేఎంఎం 34 చోట్ల విజయం సాధించింది. బీజేపీ 21, కాంగ్రెస్‌ 16, ఆర్జేడీ 4, సీపీఐ(ఎంఎల్‌) 2, ఏజేఎస్‌యూపీ, లోక్‌ జనశక్తిపార్టీ (రాం విలాస్‌), జేఎల్‌కేఎం, జేడీయూ తలో స్థానాన్ని గెలుచుకున్నాయి.

ఈ కార్యక్రమంలో కాంగ్రెస్‌ పార్టీ జాతీయ అధ్యక్షుడు మల్లికార్జున ఖర్గే.. లోక్‌సభలో ప్రతిపక్ష నేత, కాంగ్రెస్ అగ్రనేత రాహుల్‌ గాంధీ.. తృణముల్ కాంగ్రెస్ అధినేత్రి, పశ్చిమ బెంగాల్‌ ముఖ్యమంత్రి మమతా బెనర్జీ.. ఆమ్ ఆద్మీ పార్టీ నేషనల్ కన్వీనర్, ఢిల్లీ మాజీ సీఎం అరవింద్‌ కేజ్రీవాల్‌.. పంజాబ్‌ సీఎం భగవంత్‌ మాన్‌, కర్ణాటక డిప్యూటీ సీఎం డీకే శివకుమార్.. సమాజ్‌వాదీ పార్టీ చీఫ్‌ అఖిలేష్ యాదవ్‌.. ఆర్జేడీ నేత తేజస్వీ యాదవ్‌.. డీఎంకే నేత, తమిళనాడు డిప్యూటీ సీఎం ఉదయనిధి స్టాలిన్ సహా తదితర ఇండియా కూటమి నేతలు హాజరయ్యారు. ఈ సందర్భంగా సీఎంగా ప్రమాణ స్వీకారం చేసిన హేమంత్‌ సోరెన్‌కు ఇండియా కూటమి నేతలు శుభాకాంక్షలు తెలిపారు.

49 ఏళ్ల హేమంత్ సోరెన్.. మొట్టమొదట రాజ్యసభ సభ్యుడిగా తన రాజకీయ జీవితాన్ని ప్రారంభించారు. ఆ తర్వాత 2009లో తొలిసారి ఎమ్మెల్యేగా ఎన్నికయ్యారు. ఇక 2010 నుంచి 2013 వరకు బీజేపీ-జేఎంఎం కూటమి ప్రభుత్వంలో అర్జున్ ముండా జార్ఖండ్ ముఖ్యమంత్రిగా పనిచేయగా.. హేమంత్ సోరెన్ ఉపముఖ్యమంత్రిగా విధులు నిర్వర్తించారు. ఆ తర్వాత 2013లో కాంగ్రెస్, ఆర్జేడీ పార్టీల మద్దతుతో జేఎంఎం జార్ఖండ్‌లో అధికారాన్ని ఏర్పాటు చేయగా.. తొలిసారి హేమంత్ సోరెన్ ముఖ్యమంత్రిగా ప్రమాణ స్వీకారం చేశారు. ఇక 2014లో జార్ఖండ్‌లో బీజేపీ అధికారంలోకి రావడంతో హేమంత్ సోరెన్ అసెంబ్లీలో ప్రతిపక్ష నేతగా ఉన్నారు. ఆ తర్వాత 2019లో జేఎంఎం-కాంగ్రెస్ కూటమి విజయం సాధించడంతో మరోసారి ముఖ్యమంత్రిగా హేమంత్ సోరెన్ బాధ్యతలు చేపట్టారు.

ఈ నేపథ్యంలోనే ఈ ఏడాది మొదట్లో భూ కుంభకోణానికి సంబంధించిన మనీ లాండరింగ్ కేసులో ఎన్‌ఫోర్స్‌మెంట్ డైరెక్టరేట్.. జార్ఖండ్ ముఖ్యమంత్రిగా ఉన్న హేమంత్ సోరెన్‌ను అరెస్ట్ చేసింది. దీంతో ఆయన సీఎం పదవికి రాజీనామా చేసి జైలుకు వెళ్లారు. ఆ తర్వాత చంపై సోరెన్.. జార్ఖండ్ ముఖ్యమంత్రిగా బాధ్యతలు తీసుకున్నారు. దాదాపు 6 నెలల తర్వాత.. బెయిల్‌పై జైలు నుంచి బయటికి వచ్చిన హేమంత్ సోరెన్.. మళ్లీ మూడోసారి ముఖ్యమంత్రిగా ప్రమాణం చేశారు. దీంతో చంపై సోరెన్ జేఎంఎంను వీడి బీజేపీలో చేరారు. ఇక హేమంత్ సోరెన్ అరెస్ట్ తర్వాత ఆయన భార్య కల్పనా సోరెన్ రాజకీయాల్లోకి వచ్చారు. ఇండియా కూటమి పార్టీలతో కలిసి.. హేమంత్ సోరెన్ అరెస్ట్ అక్రమమని.. జార్ఖండ్ ప్రజల్లోకి తీసుకెళ్లడంలో విజయం సాధించారు. ఈ క్రమంలోనే ఇటీవల జరిగిన ఎన్నికల్లో కల్పనా సోరెన్ కూడా ఎమ్మెల్యేగా పోటీ చేసి గెలుపొందారు.