సీఎం గొప్ప మనసు.. దేవేంద్ర ఫడ్నవీస్ తొలి సంతకం దేనిపై అంటే

దాదాపు 2 వారాల సుదీర్ఘ నిరీక్షణ ద్వారా మహారాష్ట్రలో కొత్త ప్రభుత్వం కొలువుదీరింది. అంతా అనుకున్నట్లుగానే ముఖ్యమంత్రిగా బీజేపీ సీనియర్‌ నేత దేవేంద్ర ఫడ్నవీస్‌ ప్రమాణ స్వీకారం చేశారు. దీంతో గత కొంతకాలంగా మహారాష్ట్రలో నెలకొన్న తీవ్ర ఉత్కంఠకు తెరపడింది. ఈ నేపథ్యంలోనే గురువారం అంగరంగ వైభవంగా ముంబైలోని ఆజాద్ మైదాన్‌లో ముఖ్యమంత్రిగా ప్రమాణ స్వీకారం చేసిన దేవేంద్ర ఫఢ్నవీస్ తన సీఎం బాధ్యతలను చేపట్టారు. అయితే తన తొలి సంతకం ఒక రోగికి ఆర్థిక సాయం అందించే దస్త్రంపై దేవేంద్ర ఫడ్నవీస్ చేశారు.

పూణెకు చెందిన చంద్రకాంత్‌ అనే వ్యక్తి బోన్‌మ్యారో మార్పిడి చికిత్స కోసం గత కొంత కాలం ఎదురుచూస్తున్నాడు. అయితే తనకు చికిత్స చేసుకునే స్థోమత లేదు. దీంతో చంద్రకాంత్ భార్య సీఎం సహాయ నిధి నుంచి సహాయం కోసం చూస్తుండగా.. ఆ బాధితుడికి రూ.5 లక్షల ఆర్థిక సాయం అందించే ఫైల్‌పై దేవేంద్ర ఫడ్నవీస్ తొలి సంతకం చేశారు. ఇక ప్రమాణ స్వీకారం చేసి కొత్త ప్రభుత్వం ఏర్పాటైన తర్వాత.. తొలిసారి ఫడ్నవీస్ మీడియాతో మాట్లాడారు.

గత 5 ఏళ్లు మహారాష్ట్రలో అనేక రాజకీయ సంచలనాలు, మార్పులు చోటు చేసుకున్నాయని.. అయితే రానున్న 5 ఏళ్లలో మాత్రం మరాఠా ప్రజలకు స్థిరమైన పాలనను అందిస్తామని హామీ ఇచ్చారు. తాను ముఖ్యమంత్రిగా కొలువుదీరిన మహారాష్ట్ర ప్రభుత్వంలో ప్రజలు రాజకీయ మార్పును చూస్తారు తప్ప ప్రతీకారాన్ని కాదని స్పష్టం చేశారు. మహారాష్ట్ర అసెంబ్లీ ఎన్నికల్లో ప్రజల తీర్పు వారి ఆకాంక్షలు, ప్రేమను చూపిస్తున్నాయని చెప్పారు. సామాజిక, మౌలిక, పారిశ్రామిక రంగాల్లో ప్రస్తుత వేగంతో మహారాష్ట్రను తిరిగి అభివృద్ధి పథంలో తీసుకెళ్తామని స్పష్టం చేశారు.

ఇక డిసెంబర్‌ 7వ తేదీ నుంచి 3 రోజుల పాటు ప్రత్యేక అసెంబ్లీ సమావేశాలు నిర్వహిస్తామని సీఎం దేవేంద్ర ఫడ్నవీస్ చెప్పారు. ఈ నెల 9వ తేదీన అసెంబ్లీ స్పీకర్‌కు ఎన్నిక చేపడతామని తెలిపారు. గత రెండున్నరేళ్లలో మహారాష్ట్ర అభివృద్ధి కోసం పనిచేశామని.. ఇప్పుడు కూడా అలాగే కృషిచేస్తామని ఫడ్నవీస్ స్పష్టం చేశారు. పోస్టులు మారినా.. తమ డైరెక్షన్‌, స్పీడ్‌ అలాగే ఉంటుందని వెల్లడించారు. మ్యానిఫెస్టోలో ఇచ్చిన మేరకు హామీలు పూర్తి చేస్తామని.. ప్రభుత్వ ఏర్పాటులో జాప్యం జరిగిందని తాను భావించడం లేదని ఫడ్నవీస్ తేల్చి చెప్పారు. 2004లో కూడా 12 నుంచి 13 రోజుల పాటు కొత్త ప్రభుత్వ ఏర్పాటు ఆలస్యం జరిగిందని గుర్తు చేశారు. ఇక 2009లో 9 రోజుల తర్వాత కొత్త ముఖ్యమంత్రి ప్రమాణ స్వీకారం చేశారని చెప్పారు.

ఈ నేపథ్యంలోనే మహాయుతి కూటమి గురించి.. దేవేంద్ర ఫడ్నవీస్ ఆసక్తికర వ్యాఖ్యలు చేశారు. రాష్ట్రంలో సంకీర్ణ ప్రభుత్వాన్ని ఏర్పాటు చేసే సమయంలో అనేక నిర్ణయాలు తీసుకోవాల్సి ఉంటుందని చెప్పారు. వీటి కోసం పెద్ద ఎత్తున సంప్రదింపులు జరగాల్సి ఉంటుంది కదా అని తెలిపారు. ఇక మహారాష్ట్ర మంత్రి పదవులను దాదాపు ఖరారు చేశామని.. ఇంకా కొంత మిగిలి ఉన్నారని చెప్పారు. ఇక మాజీ సీఎం ఏక్‌నాథ్‌ షిండే, అజిత్‌ పవార్‌ తనతో ఉన్నారని.. కేబినెట్ విస్తరణ, శాఖల కేటాయింపుపై తాము చర్చించి నిర్ణయం తీసుకుంటామని స్పష్టం చేశారు. గత ప్రభుత్వంలో మంత్రుల పనితీరు ఆధారంగానే తుది నిర్ణయం తీసుకుంటామని ఫడ్నవీస్‌ వివరించారు.