సముద్రంలో నౌక మునక.. పాక్ సాయంతో 12 మందిని కాపాడిన భారత కోస్ట్గార్డ్స్
national | Suryaa Desk | Published : Fri, Dec 06, 2024, 08:16 PM
ఆరేబియా సముద్రంలో మునిగిపోయిన ఓ వాణిజ్య నౌకలోని సిబ్బందిని రక్షించడం కోసం భారత కోస్ట్గార్డ్స్ దళం, పాకిస్థాన్ మారిటైమ్ సెక్యూరిటీ ఏజెన్సీ సంయుక్తంగా ఆపరేషన్ చేపట్టాయి. గుజరాత్‌లోని పోర్బందర్ నుంచి ఇరాన్‌లోని బందర్‌ అబ్బాస్‌ పోర్టుకు వెళ్తోన్న వాణిజ్య నౌక ఎంఎస్వీ ఏఐ పిరాన్పిర్ అరేబియా సముద్రంలో బుధవారం మునిగిపోయింది. దీంతో అందులోని 12 మంది సిబ్బందిని భారత కోస్ట్గార్డ్స్ దళాలు రక్షించాయి. ఇందుకు పాకిస్థాన్ మారిటైమ్ సెక్యురిటీ ఏజెన్సీ(పీఎంఎస్‌ఏ) కూడా సాయపడినట్టు అధికారులు తెలిపారు.
‘ఎంఎస్వీ ఏఐ పిరాన్పిర్ అనే వాణిజ్య నౌక భారత్‌ జలాల వెలుపల, పాకిస్థాన్ సెర్చ్‌ అండ్‌ రెస్క్యూ పరిధి సమీపంలో బుధవారం మునిగిపోయింది. ప్రమాదం గురించి ముంబయిలోని మారిటైమ్ రెస్క్యూ కోర్డినేషన్‌ సెంటర్‌ (ఎంఆర్‌సీసీ)కు సమాచారం అందడంతో వెంటనే గాంధీనగర్‌లోని ఇండియన్ కోస్ట్గార్డ్స్ హెడ్ ఆఫీసును అప్రమత్తం చేసింది. రంగంలోకి దిగిన ఐసీజీ.. ఘటన జరిగిన ప్రదేశానికి సార్థక్ నౌకను మళ్లించింది... ఆ ప్రాంతంలోని నావికులను అప్రమత్తం చేయడానికి ఎంఆర్‌సీసీ.. పాకిస్థాన్‌ను సంప్రదించగా వారి సాయం చేశారు.. అనంతరం ఓడ మునిగిపోయిన ప్రదేశానికి చేరుకుని, విస్తృత ఆపరేషన్ నిర్వహించింది. నౌక నుంచి బయటపడి పాకిస్థాన్ రెస్క్యూ ప్రాంతంలో ద్వారకాకు 270 కిలోమీటర్ల దూరంలో చిన్న పడవలో ఆశ్రయం పొందుతున్న 12 మందిని గుర్తించి, వారిని రక్షించాం’ అని ఐసీజీ తన ప్రకటనలో పేర్కొంది.
ఈ ఆపరేషన్ పూర్తైనంత వరకూ ఇరుదేశాల మారీటైమ్ రెస్క్యూ కో-ఆర్డినేషన్ సెంటర్లు నిరంతరం సంప్రదింపులు జరుపుతూనే ఉన్నాయని తెలిపింది. ప్రాణాలతో బయటపడినవారి అన్వేషణ కోసం పాకిస్తాన్ ఎంఎస్ఏ విమానం, ఎంవీ కాస్కో గ్లోరీ అనే వాణిజ్య నౌక సహకరించాయని చెప్పింది. ఫార్వర్డ్ ఏరియా పెట్రోలింగ్ కోసం మోహరించిన ఐసీజీెఎస్ సార్థక్.. ఘటన జరిగిన ప్రదేశానికి గరిష్ట వేగంతో వెళ్లి విస్తృతమైన ఆపరేషన్‌ను నిర్వహించింది. రక్షించిన సిబ్బందిని ఐసీజీెఎస్ సార్థక్‌లోని వైద్య బృందం పరీక్షించి, వారు ఆరోగ్యంగా ఉన్నట్లు నివేదించబడింది.
వారిని తిరిగి గుజరాత్‌లోని పోర్బందర్ పోర్టుకు తీసుకొచ్చినట్టు అధికారులు తెలిపారు. ఇండియన్ కోస్ట్‌గార్డ్ ‘వయం రక్షమాః’ లేదా ‘మేము రక్షిస్తాం’ అనే నినాదాన్ని మరోసారి రుజువు చేస్తూ ప్రమాదంలో ఉన్నవారిని రక్షించడంలో తన అంకితభావాన్ని ప్రదర్శించింది.
|
|