ఆపరేషన్ మ్యూల్‌హంటర్.. ఇక ఆ ఖాతాల ఏరివేతే..బ్యాంకులకు ఆర్బీఐ కీలక సూచన

ప్రస్తుత సాంకేతిక యుగంలో సైబర్ నేరస్థుల బెడద ఎక్కువైంది. అమాయక జనమే లక్ష్యంగా సొమ్ములు కొల్లగొట్టి మోసాలకు పాల్పడుతూ.. కొట్టేసిన సొమ్మును నకిలీ ఖాతాలకు మళ్లిస్తున్నారు. ఇంకా ఆ అకౌంట్ల నుంచి డబ్బుల్ని.. తమ అవసరాల కోసం వాడుకుంటున్నారు. అన్నింటికంటే ముఖ్యంగా నిరుద్యోగులు, నిరక్ష్యరాస్యులే లక్ష్యంగా వారికి కమీషన్ ఆశ చూపి.. వారి పేరిటే అకౌంట్లు తెరుస్తున్నారు. వీటినే మ్యూల్ అకౌంట్లు అని పిలుస్తారు. అయితే.. ఈ ఖాతాల్లోకి వెళ్లిన డబ్బును గుర్తించడం, రికవరీ చేయడం కష్టమవుతోంది. ఈ క్రమంలోనే ఇప్పుడు రిజర్వ్ బ్యాంక్ ఆఫ్ ఇండియా  అప్రమత్తమైంది. మ్యూల్ ఖాతాల ఏరివేతనే లక్ష్యంగా.. ఆర్బీఐ మ్యూల్‌హంటర్.ఏఐను ప్రకటించింది. దీంట్లో భాగస్వాములు కావాలని బ్యాంకులకు కూడా సూచించింది.

>> ద్రవ్య పరపతి విధాన సమీక్ష నిర్ణయాలు ప్రకటించే సందర్భంగానే ఆర్బీఐ గవర్నర్ శక్తికాంత దాస్ శుక్రవారం రోజు ఈ అంశం గురించి ప్రస్తావించారు. ముఖ్యంగా సైబర్ నేరగాళ్లు తాము దోచుకున్న సొమ్మును దాచుకునేందుకే మ్యూల్ ఖాతాల్ని వినియోగిస్తున్నట్లు చెప్పుకొచ్చారు. మ్యూల్ అకౌంట్లతో పాటు ఇతర ఆర్థిక మోసాలకు చెక్ పెట్టేందుకే జీరో ఫైనాన్షియల్ ఫ్రాడ్స్ పేరిట ఆర్బీఐ హ్యాకథాన్ నిర్వహిస్తుందన్నారు.

దీనితో పాటుగా ఆర్టిఫిషియెల్ ఇంటెలిజెన్స్, మెషీన్ లెర్నింగ్‌తో పని చేసే మ్యూల్‌హంటర్. ఏఐ మోడల్ ఆవిష్కరించినట్లు దాస్ చెప్పారు. రిజర్వ్ బ్యాంక్ ఇన్నోవేషన్ హబా దీనిని ప్రస్తుతం పైలట్ ప్రాజెక్టుగా నిర్వహిస్తుందని వివరించారు. ఈ మోడల్ మ్యూల్ అకౌంట్లను ఈజీగా, వేగంగా గుర్తించగలదని తెలిపారు.

ఈ క్రమంలోనే రెండు పెద్ద ప్రభుత్వ బ్యాంకులతో కలిపి ప్రయోగాత్మకంగా నిర్వహించిన పరీక్షల్లో మంచి ఫలితాలు కూడా వచ్చాయని ఆర్బీఐ గవర్నర్ వెల్లడించారు. మ్యూల్ ఖాతాలకు చెక్ పెట్టే దిశగా.. ఈ ప్రాజెక్టులో భాగంగా ఇతర బ్యాంకులు కూడా ఇన్నోవేషన్ హబ్‌తో జట్టు కట్టాలని సూచించారు. బ్యాంకులు, ఇతర భాగస్వామ్య పక్షాలతో కలిసి.. ఆర్థిక మోసాల్ని నివారించేందుకు చర్యలు తీసుకుంటున్నట్లు వివరించారు శక్తికాంత దాస్. బ్యాంకులు కూడా సైబర్ సెక్యూరిటీని మెరుగుపర్చడంతో పాటుగా.. సైబర్ మోసాల నివారణ, ట్రాన్సాక్షన్స్‌ను పర్యవేక్షించాలని సూచించారు.

ఇక డిసెంబర్ 4 నుంచి 3 రోజులు ఆర్బీఐ ద్రవ్య పరపతి సమీక్ష జరగ్గా.. శుక్రవారం రోజు దాస్ నిర్ణయాల్ని ప్రకటించారు. వరుసగా ఇప్పుడు 11వ సారి కూడా కీలక వడ్డీ రేట్లను యథాతథంగానే ఉంచుతున్నట్లు ప్రకటించారు. ప్రస్తుతం రెపో రేటు 6.50 శాతం వద్ద స్థిరంగా ఉంది. ప్రస్తుత ద్రవ్యోల్బణం సహా ఇతర అంశాల్ని దృష్టిలో పెట్టుకొని వడ్డీ రేట్లలో మార్పులు చేయట్లేదని వెల్లడించారు.