తక్కువ ధరకే దొరికే ఈ ఆహారాలతో డయాబెటిస్ కంట్రోల్.. తింటూనే షుగర్ తగ్గించుకోవచ్చు

భారతదేశంలో డయాబెటిస్ కేసులు రోజురోజుకి పెరుగుతున్నాయి. ప్రస్తుత కాలంలో డయాబెటిస్ అనేది అతి పెద్ద ముప్పుగా మారింది. చిన్నా పెద్దా తేడా లేకుండా చాలామంది ఈ వ్యాధితో పోరాడుతున్నారు. డయాబెటిస్ వచ్చిన వారి రక్తంలో షుగర్ లెవల్స్ హెచ్చు తగ్గులకు గురవుతాయి. దీంతో శరీర కణాలకు శక్తి అందక అలసటగా అనిపిస్తుంది. డయాబెటిస్ ఒక దీర్ఘకాలిక వ్యాధి. ఒక్కసారి వచ్చిందంటే, జీవితాంతం చక్కెర స్థాయిలను అదుపులో ఉంచుకునే ప్రయత్నాలు చేయాలి. అయితే జీవన శైలి మార్పులు, చిన్నపాటి ఆహారపు అలవాట్లు పాటిస్తే వ్యాధి సోకే ముప్పు తగ్గుతుందని వైద్యులు సూచిస్తున్నారు.

డయాబెటిక్ పేషెంట్లు ఏది పడితే అది తినకూడదు. షుగర్ ఉన్నవారు తినే ఆహారంపై ప్రత్యేక దృష్టి పెట్టాలి. మధుమేహం ఉన్నవారు కొన్ని ఆహారాలను అస్సలు తినకూడదు. అయితే, కొన్ని ఆహారాల్ని తింటూనే షుగర్ తగ్గించుకోవచ్చని నిపుణులు అంటున్నారు. కొన్ని ఆహారాలు సహజంగానే యాంటీ డయాబెటిక్ ఎలిమెంట్లను కలిగి ఉంటాయి. ఇవి రక్తంలో చక్కెర స్థాయిల్ని తగ్గించడంలో సాయపడతాయి. పోషకాహార నిపుణులు, డైటీషియన్ చైతాలీ రాథోడ్ (డాక్టర్ చైతాలీ రాథోడ్, BAMS) మధుమేహ రోగులకు మంచిగా భావించే కొన్ని ఆహారాల గురించి చెప్పారు. ఆ ఫుడ్స్ లిస్టుపై ఓ లుక్కేద్దాం.

 జొన్న రొట్టెలు..

డయాబెటిక్ పేషెంట్లకు జొన్న ఒక అద్భుతమైన మిల్లెట్. జొన్న పిండితో చేసిన రొట్టెలను తినడం వల్ల డయాబెటిస్ కంట్రోల్‌లో ఉంటుంది. జొన్నల్లో విటమిన్స్, ఖనిజాలు, ఫైబర్ పుష్కలంగా ఉంటాయి. ఇందులోని ఫైబర్ జీర్ణక్రియని సులువు చేస్తుంది. దీంతో రక్తంలో చక్కెర స్థాయిలు నియంత్రణలో ఉంటాయి. అందుకే డయాబెటిక్ పేషెంట్లు చపాతీలకు బదులు.. జొన్న రొట్టెలు తీసుకోవాలని నిపుణులు సూచిస్తున్నారు.

పసుపు..

పసుపు యాంటీ ఇన్ఫ్లమేటరీ లక్షణాలతో నిండిన శక్తివంతమైన యాంటీ ఆక్సిడెంట్. ఇందులో విటమిన్ బి6, విటమిన్ సి, పొటాషియం, ఐరన్, మాంగనీస్ వంటి ఖనిజాలు పుష్కలంగా ఉంటాయి. పసుపులో డైటరీ ఫైబర్ పుష్కలంగా ఉంటుంది. ఇది జీర్ణక్రియను మెరుగుపరుస్తుంది. రక్తంలోని షుగర్ లెవల్స్ పెరగకుండా కంట్రోల్ చేస్తుంది. చలికాలంలో పసుపును ఆహారంలో భాగం చేసుకోవడం వల్ల రక్తంలో చక్కెర స్థాయిలు అదుపులో ఉంటాయి. పసుపును కూరల్లో, పానీయాల్లో, పచ్చళ్ల రూపంలో తీసుకోవచ్చు.

రాగులు..

రాగులు ఆరోగ్యకరమైన మిల్లెట్. ఇందులో ఐరన్ పుష్కలంగా ఉంటుంది. ఇది మధుమేహ వ్యాధిగ్రస్తులకు చాలా ఉపయోగకరంగా ఉంటుంది. ఇది తక్కువ గ్లైసెమిక్ ఇండెక్స్ ఉన్న చిరు ధాన్యం. ఇది తినడం వల్ల రక్తంలో చక్కెర స్థాయిలు అదుపులో ఉంటాయి. షుగర్ లెవల్స్ పెరగకుండా నిరోధిస్తుంది. రాగుల్ని తినడం వల్ల కాల్షియం లోపం కూడా తీరుతుంది. శరీరానికి బలాన్ని ఇస్తుంది. రాగుల్ని వివిధ రూపాల్లో తీసుకోవచ్చు. రాగి రొట్టె, రాగి జావ, రాగి సంకటి, బెల్లంతో కలిపి వివిధ రూపాల్లో తీసుకోవడం వల్ల డయాబెటిస్ పేషంట్లకు చాలా మేలు జరుగుతుందని ఆయుర్వేద నిపుణులు చెబుతున్నారు.

ఉసిరి జ్యూస్..

షుగర్‌ వ్యాధిని అదుపులో ఉంచేందుకు ఉసిరి దివ్య ఔషధంగా పనిచేస్తుంది. ఇందులో ఉండే క్రోమియం షుగర్‌ను అదుపులో ఉంచేందుకు తోడ్పడుతుంది. గుండె కవాటాలు మూసుకుపోకుండా క్రోమియం నివారిస్తుంది. చెడు కొలెస్ట్రాల్‌ను తగ్గిస్తుంది. ఉసిరిలో విటమిన్ సీ అధికంగా ఉంటుంది. ఉసిరి రోజు మన డైట్‌లో చేర్చుకుంటే.. ఇమ్యూనిటీ పెరుగుతుంది. అలానే ఉసిరిలో యాంటీ ఇన్ఫ్లమెంటరీ గుణాలు, యాంటీ గ్లైసమిక్ గుణాలు కూడా ఉన్నాయి. దీనిలో ఫైబర్, మినరల్స్, ప్రోటీన్స్ కూడా సమృద్ధిగా ఉంటాయి. ఈ పోషకాలు మన శరీరంలో రోగనిరోధక వ్యవస్థను మెరుగుపరుస్తాయి. ఉసిరి జ్యూస్ రోజూ తాగడం వల్ల షుగర్‌ని కంట్రోల్‌లో ఉంచుకోవచ్చు.

కాకరకాయ జ్యూస్ లేదా వేప రసం..

శరీరంలో గ్లూకోజ్ స్థాయిని నిర్వహించడానికి చేదు పదార్థాలైన వేప, కాకరకాయ ప్రభావవంతంగా పనిచేస్తాయి. ఈ రెండింటిలో యాంటీ ఆక్సిడెంట్లు ఉంటాయి. ఇవి శరీరం నుంచి అదనపు గ్లూకోజ్‌ను తగ్గిస్తాయి. ఇది డయాబెటిస్ నిర్వహణలో సాయపడుతుంది. లేత వేపాకుల రసం లేదా, కాకర కాయ జ్యూస్ తాగడం వల్ల రక్తంలో షుగర్ లెవల్స్ అదుపులో ఉంటాయి. ఈ రెండూ డయాబెటిస్ పేషెంట్లుకు ఎంతో మేలు చేస్తుంది. ఇవన్నీ సహజంగా తక్కువ ధరకే దొరికే ఆహారాలు. వీటిని తీసుకుంటే డయాబెటిక్ రోగులకు ఎంతో మంచిదని నిపుణులు చెబుతున్నారు.