ఏటీఎంలో ఇలా కూడా దొంగతనం చేయొచ్చా.. చిన్న స్టిక్కర్‌తో, ఈ దొంగలు మామూలోళ్లు కాదు

దొంగలు కూడా తెలివిగా వ్యవహరిస్తున్నారు.. రోజుకో కొత్త రూట్‌లో చోరీలు చేస్తున్నారు. దొంగలు ఏటీఎంలో చోరీకి కొత్త ప్లాన్ అమలు చేస్తున్నారు.. సీసీ ఫుటేజ్‌తో ఈ వ్యవహారం బయటపడింది. కృష్ణా జిల్లా కానూరు అశోక్‌నగర్‌లోని ఎస్‌బీఐ ఏటీఎం ఉంది.. కొద్దిరోజులుగా కార్డు వినియోగించినా ఏటీఎం మెషిన్ నుంచి డబ్బులు బయటకు రాకుండా లోపలే ఉండిపోతున్నాయంటూ కొంతమంది జనాలు బ్యాంకు అధికారులు ఫిర్యాదు చేస్తున్నారు. ఈ క్రమంలో బ్యాంకు అధికారులు వెంటనే స్పందించి ఏటీఎం మెషిన్లను పర్యవేక్షించే సంస్థకు సమాచారం ఇచ్చారు. ఏటీఎం మెషిన్లను పర్యవేక్షించే సంస్థ టెక్నీషియన్‌ గెంటెల వాసు సాయికృష్ణ ఏటీఎం దగ్గరకు వెళ్లి పరిశీలించారు.

అక్కడ ఏటీఎం మెషిన్‌లో దొంగల ఘనకార్యం బయటపడింది. ఈ మేరకు ఏటీఎం మెషిన్ నుంచి డబ్బులు బయటకు వచ్చే చోట లోపల వైపు నుంచి నలుపు రంగు స్టిక్కర్‌ అతికించినట్లు గుర్తించారు. ఇలా చేస్తే.. మెషిన్‌లో నుంచి డబ్బులు బయటకు రాకుండా లోపలి వైపే పడిపోతుండడాన్ని ఆయన గుర్తించారు. అనుమానంతో సాయికృష్ణ సీసీ కెమెరా ఫుటేజీని పరిశీలించగా అప్పుడు అసలు సంగతి తెలిసిందే. కొందరు దుండగులు రాత్రి సమయంలో వచ్చి మెషిన్‌ను ధ్వంసం చేసి డబ్బులు బయటకు వచ్చే ప్రాంతంలో నల్లస్టిక్కరు అంటించినట్లు తేలింది. ఒకవేళ కస్టమర్లు డబ్బులు డ్రా చేయడానికి ప్రయత్నించినా బయటకు రాకపోవడంతో విసుగొచ్చి వెళ్లిపోయేవారు.

ఆ తర్వాత స్టిక్కరు అంటించిన ఇద్దరు వ్యక్తులు తిరిగి వచ్చి ఏటీఎం మెషిన్ డోరును బలవంతంగా తెరిచేవారు.. లోపల ఇరుక్కుపోయిన డబ్బుల్ని తీసుకొని వెళ్లిపోవడాన్ని గుర్తించారు. ఈ నెల 3 నుంచి 9వ తేదీ వరకూ దాదాపు రూ.2లక్షల22వేల700 చోరీ చేసినట్లు గుర్తించారు. వెంటనే పెనమలూరు పోలీసులకు ఫిర్యాదు చేయగా కేసు నమోదు చేసి సీసీ ఫుటేజీ ఆధారంగా డబ్బుల్ని చోరీ చేయడానికి వచ్చిన వారిని గుర్తించడానికి ప్రయత్నిస్తున్నారు. దొంగలను ఏటీఎం మెషిన్ నుంచి డబ్బులు బయటకు వచ్చే ప్రాంతంలో ఇలా స్టిక్కర్ అంటించడంతో.. డబ్బులు డ్రా చేసేందుకు వచ్చినవారు ఇబ్బందిపడ్డారు. డబ్బులు బయటకు రాకపోవడంతో వీరు ఆ తర్వాత వచ్చి మెషిన్ లోపల డబ్బుల్ని ఎత్తుకెళ్లేవారు. ఈ చోరీ జరిగిన తీరును చూసి పోలీసులు, బ్యాంక్ అధికారులు ఆశ్చర్యపోయారు.