వైట్‌హౌస్‌పై దాడి కేసు.. తెలుగు సంతతి యువకుడికి 8 ఏళ్లు జైలు

రెండేళ్ల కిందట అమెరికా అధ్యక్ష భవనం శ్వేతసౌధం వద్ద భారత సంతతికి చెందిన యువకుడు.. ట్రక్కుతో దాడికి యత్నించిన ఘటన ప్రపంచవ్యాప్తంగా కలకలం రేపింది. ఈ ఘటనలో ప్రధాన నిందితుడు, తెలుగు సంతతికి వ్యక్తి కందుల సాయి వర్షిత్‌ ను అక్కడి పోలీసులు అరెస్టు చేసిన విషయం తెలిసిందే. తాజాగా, ఈ కేసులో అమెరికా న్యాయస్థానం తీర్పును వెలువరించింది. నిందితుడు సాయి వర్షిత్‌ను దోషిగా నిర్దారించి.. అతడికి 8 ఏళ్ల జైలు శిక్ష ఖరారు చేసింది. నాజీ భావజాలంతో విద్వేషాన్ని పెంచుకున్న యువకుడు.. డెమొక్రటిక్‌ ప్రభుత్వాన్ని కూల్చేందుకు యత్నించాడని న్యాయమూర్తి డాబ్నీ ఫ్రెడ్రిచ్‌ వెల్లడించారు. పేర్కొన్నారు.

‘‘ప్రజాస్వామ్యబద్దంగా ఏర్పడిన ప్రభుత్వాన్ని నాజీ భావజాలంతో కూలదూయాలనే దురుద్దేశంతో సాయివర్షిత్‌ ఈ దాడికి ప్రయత్నించాడు.. అవసరమైతే అధ్యక్షుడి ప్రాణాలు కూడా తీయాలని నిర్ణయించుకున్నట్లు ఒప్పుకున్నాడు. దీంతో అతడికి ఎనిమిదేళ్లు శిక్ష విధించాలని నిర్ణయించాం... అతడి చర్యల కారణంగా ధ్వంసమైన నిర్మాణాల తొలగింపు, పునర్నిర్మాణం ఖర్చులు సహా నేషనల్ పార్క్ సర్వీస్‌కు 4,322 అమెరికా డాలర్ల (సుమారు రూ.3,74,000) నష్టం వాటిల్లింది’’ అని న్యాయస్థానం అభిప్రాయపడింది.

న్యాయస్థానం వెలువరించిన పత్రాల ప్రకారం.. నిందితుడు సాయి వర్షిత్ 2023 మే 22న మిస్సోరిలోని సెయింట్‌ లూయిస్‌ నుంచి బయలుదేరి.. అదే రోజు సాయంత్రం 5.20 గంటలకు వాషింగ్టన్‌ డీసీకి చేరుకున్నాడు.. అనంతరం అక్కడ ఓ ట్రక్కును అద్దెకు తీసుకొని రాత్రి 9.35 గంటల సమయంలో శ్వేతసౌధం వద్ద ఫుట్‌పాత్‌పైకి వాహనంతో దూసుకొచ్చాడు. దీంతో భయాందోళనకు గురైన పాదచారులు పరుగులు తీశారు.. ఆ తర్వాత వైట్‌హౌస్ ఉత్తరభాగంలో భద్రత కోసం ఏర్పాటుచేసిన బారికేడ్లను ఢీకొట్టాడు. మళ్లీ ట్రక్కును రివర్స్‌ చేసి ఢీకొట్టిన అనంతరం వాహనం నుంచి దిగి నాజీ జెండాను పట్టుకొని నినాదాలు చేశాడు. ఈ సమయంలో అప్రమత్తమైన భద్రతా సిబ్బంది వెంటనే అతడిని అదుపులోకి తీసుకున్నారు.

ఉద్దేశపూర్వకంగానే దాడిచేశాడని, అధ్యక్షుడు జో బైడెన్‌ను హత్య చేయాలనే లక్ష్యంతో వచ్చాడని అధికారులు పేర్కొన్నారు. ఇందుకోసం అతడు ఆరు నెలలుగా ప్రణాళిక వేసి ఈ ఘటనకు పాల్పడినట్లు తేలింది. మే 4, 2023లో భారీ వాణిజ్య ట్రక్కుల అద్దె కోసం ఎంక్వైరీ చేశాడని చెప్పారు. విచారణలో నిందితుడు సాయి వర్షిత్‌ దీనిని అంగీకరించినట్లు సీక్రెట్ సర్వీస్‌ ఏజెంట్ వర్గాలు మీడియాకు వెల్లడించాయి. దీంతో అతడ్ని అరెస్ట్‌ చేసి జైలుకు తరలించారు.