మహా కుంభమేళాలో భారీ అగ్నిప్రమాదం.. పేలిన సిలిండర్‌.. 25 గుడారాలు దగ్ధం..!

యూపీలోని ప్రయాగ్‍‌రాజ్‌లో జరుగుతున్న మహా కుంభమేళాలో భారీ అగ్ని ప్రమాదం చోటుచేసుకుంది. భక్తుల గుడారాల్లో ఒక్కసారిగా పెద్ద ఎత్తున మంటలు చెలరేగాయి. మంటల దాటికి గుడారాలు కాలిబూడిదయ్యాయి. ఎగిసిపడిన మంటలను చూసి.. భక్తులు భయభ్రాంతులకు గురయ్యారు. మిగతా శిబిరాల నుంచి భక్తులు బయటకు పరుగులు తీశారు. సమాచారం అందుకున్న ఫైర్ సిబ్బంది హుటాహుటిన ఘటనా స్థలికి చేరుకుని మంటలు అదుపు చేశారు.

అయితే.. ప్రయాగ్‌రాజ్‌లోని మహాకుంభమేళాలోని సెక్టార్-5లో మంటలు చెలరేగాయి. వారణాసిలోని వివేకానంద సేవా సమితి గుడారంలో భోజనం వండుతుండగా.. ప్రమాదవశాత్తు సిలిండర్ పేలటంతో.. ప్రమాదం సంభవించినట్టు తెలుస్తోంది. గ్యాస్ సిలిండర్ పేలటంతో.. ఒక్కసారిగా మంటలు చెలరేగాయి. దీంతో.. గుడారాలను మంటలు చుట్టుముట్టి అగ్ని కీలకల ఎగిసిపడ్డాయి. పెద్ద ఎత్తున నల్లటి పొగ వ్యాపించింది.

ఈ ప్రమాదంలో 20 నుంచి 25 టెంట్లు కాలి బూడిదైనట్లు సమాచారం. మంటలను అదుపు చేసేందుకు ఆరు అగ్నిమాపక యంత్రాలు రంగంలోకి దిగాయి. గుడారాలన్ని పక్కపక్కనే ఉండటంతో.. మంటలు అన్ని వైపులా విస్తరించాయి. దీంతో.. పోలీసులు, ఎన్డీఆర్‌ఎఫ్ బృందాలు రంగంలోకి దిగి పరిసర ప్రాంతాలను ఖాళీ చేయిస్తున్నారు. మహాకుంభమేళా పరిధిలోకి వచ్చే శాస్త్రి బ్రిడ్జి, రైల్వే బ్రిడ్జి మధ్య ప్రాంతంలో వేసిన గుడారాల్లో ఈ మంటలు చెలరేగాయి. ఘటన జరిగిన ప్రాంతంలో పెద్ద ఎత్తున పొగలు వ్యాపించాయి.

ప్రమాదానికి సంబంధిత వీడియోలు సోషల్ మీడియాలో వైరల్ అవుతున్నాయి. అగ్నిమాపక సిబ్బంది సంఘటనా స్థలానికి చేరుకుని మంటలను ఆర్పేందుకు తీవ్రంగా ప్రయత్నిస్తున్న దృశ్యాలు వీడియోల్లో కనిపిస్తున్నాయి. అయితే.. ప్రమాదం జరిగిన చోట.. వందలకొద్దీ గుడారాలు ఉండటం ఆందోళనకు గురిచేస్తోంది. కాగా.. ఈ మంటలు పక్కనున్న గుడారాలుకు వ్యాపించకుండా అగ్నిమాపక సిబ్బంధి ప్రయత్నిస్తున్నారు. మరోవైపు.. ఈ ప్రమాదంలో ఎవరికైనా గాయాలు జరిగాయా.. ఎంత నష్టం వాటిల్లింది అన్న విషయాలపై ఇంకా ఎలాంటి అధికారిక ప్రకటన రాలేదు. ఘటన స్థలికి యూపీ సీఎం యోగి ఆధిత్యనాథ్ చేరుకుని పరిస్థితిని సమీక్షించారు. పరిస్థితి అదుపులోకి వచ్చిందని.. ఎవరికీ ఎలాంటి ప్రమాదం జరగలేదని సీఎం యోగి ఆదిత్యనాథ్ తెలిపారు. ఇదిలా ఉంటే... యూపీ ప్రభుత్వం విడుదల చేసిన అధికారిక సమాచారం ప్రకారం.. ఆదివారం (జనవరి 19న) రోజు ఉదయం 8 గంటల వరకూ సుమారు 17 లక్షలకు పైగా యాత్రికులు మహాకుంభమేళాను సందర్శించినట్టు తెలుస్తోంది.