భార్యతో ఒబామా విడాకులు.. లవ్ ఆఫ్ మై లైఫ్ అంటూ ఆమె ఫొటో షేర్ చేసి క్లారిటీ!

ఎప్పుడూ భర్తతో కలిసి కనిపించే మిచెల్ ఒబామా ఈమధ్య భర్తతో కలిసి కనిపించడం లేదు. సతీమణి లేకుండానే బరాక్ ఒబామా.. ఒంటరిగా పలు కార్యక్రమాలకు హాజరు అవుతున్నారు. దీంతో అందర వీరిద్దరూ విడాకులు తీసుకోబోతున్నట్లు భావించారు. ఈక్రమంలోనే పెద్ద ఎత్తున వార్తలు కూడా వచ్చాయి. ఇప్పటికే ఈ విడాకుల గురించి మిచెల్ టీం స్పందించగా.. తాజాగా ఒబామా స్పందించారు. ఇండైరెక్టుగానే విడాకుల గురించి చెప్పి అందరినీ ఆశ్చర్యపరిచారు. ఆ పూర్తి వివరాలు ఏంటో మనం ఇప్పుడు తెలుసుకుందాం.

బరాక్ ఒబామా దంపతులు విడాకులు తీసుకోబోతున్నారంటూ గొత కొంత కాలంగా వార్తలు వస్తున్నాయి. ముఖ్యంగా ఇటీవలే అమెరికా మాజీ అధ్యక్షుడు జిమ్మీ కార్టర్ మృతి చెందగా.. అతడి అంత్యక్రియలకు ఒబామా ఒక్కరే వచ్చారు. మిచెల్ మాత్రం ఈ అంత్యక్రియల్లో పాల్గొనలేదు. అలాగే ఇటీవలే అమెరికా ఎన్నికల్లో విజయం సాధించి రెండోసారి అమెరికా అధ్యక్షుడిగా పదవీ బాధ్యతలు స్వీకరించబోతున్నారు డొనాల్డ్ ట్రంప్. ఈ కార్యక్రమానికి కూడా మిచెల్ హాజరు కావడం లేదు. కానీ ఒంటరిగానే ఒబామా ఈ కార్యక్రమంలో పాల్గొనబోతున్నట్లు తెలిపారు.

  దీంతో వీరిద్దరూ కచ్చితంగా విడాకులు తీసుకోబోతున్నారంటూ పెద్ద ఎత్తున వార్తలు వచ్చాయి. అయితే వీటిపై శుక్రవారం రోజే మిచెల్ టీం స్పందించింది. ఆ వార్తలన్నీ అవాస్తవం అని కొట్టి పరేసింది. ముఖ్యంగా జిమ్మీ కార్టర్ అంత్యక్రియల సమయంలో ఆమె వేరే ప్రాంతంలో ఉండడం వల్లే తాను హాజరు కాలేకపోయారని కూడా చెప్పుకొచ్చారు. వీరి వైవాహిక జీవితం చాలా సాఫీగా సాగుతోందని కూడా స్పష్టం చేశారు. అలాగే ట్రంప్ వైఖరి నచ్చకపోవడం వల్లే.. ఆయన ప్రమాణ స్వీకారోత్సవానికి హాజరు కావట్లేరని వెల్లడించారు.

కానీ విడాకుల విషయంపై ఒబామా ఇప్పటి వరకు స్పందించలేదు. కానీ తాజాగా ఓ పోస్ట్ పెట్టి అందరికీ క్లారిటీ ఇచ్చేశారు. ఈరోజు ఆయన భార్య మిచెల్ పుట్టిన రోజు. ఈక్రమంలోనే ఆమెను డిన్నర్‌కు తీసుకెళ్లిన ఫొటోను షేర్ చేసి.. లవ్ ఆఫ్ మై లైఫ్ అంటూ రాసుకొచ్చారు. నా జీవితాన్ని ప్రేమతో నింపిన నా ప్రేయసి ఒబామాకు పుట్టిన రోజు శుభాకాంక్షలు అంటూ వెల్లడించారు. తన జీవితంలో ప్రతీ సందర్భాన్ని తన వెచ్చదనం, జ్ఞానం, హాస్యంతో నింపినట్లు చెప్పుకొచ్చారు. నీతో జీవితాన్ని పంచుకోవడం నాకు సంతోషాన్ని ఇస్తుందని కూడా స్పష్టం చేశారు. విడాకుల నేపథ్యంలో ఒబామా ఈ పోస్టు చేయడంతో పెద్ద ఎత్తున వైరల్ అవుతోంది.