భారతీయులకు బిగ్ రిలీఫ్.. ఆ ఉత్తర్వులను కొట్టేసిన అమెరికా కోర్టు

అమెరికా వీసా, గ్రీన్ కార్డుల కోసం ఎదురుచూస్తోన్న విద్యార్థులు, వృత్తినిపుణులకు భారీ ఊరట. జన్మతః పౌరసత్వ హక్కును రద్దుచేస్తూ అధ్యక్షుడు డొనాల్డ్ ట్రంప్ జారీచేసిన కార్యనిర్వహాక ఉత్తర్వులను మరో ఫెడరల్ కోర్టు కొట్టివేసింది. అంతేకాదు, చట్టపరమైన నియమాలను ట్రంప్ ఉల్లంఘించి.. రాజ్యాంగం విధానాలతో ఆటలాడేందుకు ప్రయత్నిస్తున్నారని మండిపడింది. మేరీల్యాండ్ ఫెడరల్ కోర్టు సైతం ట్రంప్ ఉత్తర్వులను రద్దుచేసిన విషయం తెలిసిందే. అమెరికా జిల్లా న్యాయమూర్తి జాన్ కఫెనౌర్ ‘మన అధ్యక్షుడికి చట్ట పాలన అనేది తన విధాన లక్ష్యాలకు ఒక అవరోధం మాత్రమే అని మరింత స్పష్టమవుతోంది. వ్యక్తిగత లేదా రాజకీయ స్వలాభం కోసమే చట్టపాలన అనేది ఆయన అభిప్రాయమే అయినా రాజ్యాంగ నిబంధనలు ఉల్లంఘించడానికి వీల్లేదు’ అని వ్యాఖ్యానించారు.

రాజ్యాంగం అనేది ప్రభుత్వం విధానాలతో ఆటలాడుకునేది కాదని న్యాయమూర్తి స్ఫష్టం చేశారు. ఒకవేళ, జన్మతహః పౌరసత్వ హక్కును మార్చాలనుకుంటే, అది రాజ్యాంగ సవరణ చేయాలి’ అని న్యాయమూర్తి నొక్కి చెప్పారు. కాగా, బుధవారం నాడు యుఎస్ డిస్ట్రిక్ట్ జడ్జి డెబోరా బోర్డ్‌మన్ ట్రంప్ ఉత్తర్వులకు వ్యతిరేకంగా ప్రాథమిక నిషేధాన్ని జారీ చేశారు. ఆ మర్నాడే తాజా ఉత్తర్వులు వెలువడటం గమనార్హం.

ఈ రెండు కోర్టుల ఉత్తర్వులు దేశవ్యాప్తంగా వర్తిస్తాయి. ఈ కేసు కొనసాగే వరకు అమలులో ఉంటాయి. మరోవైపు, సియాటిల్ కోర్టు ఉత్తర్వులపై తాను సుప్రీంకోర్టులో అప్పీల్ చేయనున్నట్టు ట్రంప్ ఇప్పటికే ప్రకటించారు. తాజాగా, న్యాయ శాఖ సైతం ధ్రువీకరించింది. కాగా, రెండోసారి అమెరికా అధ్యక్షుడిగా గత నెల 20న బాధ్యతలు చేపట్టిన డొనాల్డ్ ట్రంప్.. విదేశీయులకు జన్మతః పౌరసత్వ హక్కును రద్దుచేస్తూ కార్యనిర్వాహక ఉత్తర్వులపై సంతకం చేశారు. రాజ్యాంగంలోని 14వ సవరణను దీనికి కారణంగా చూపించారు. అయితే 22 రాష్ట్రాలు ట్రంప్ నిర్ణయాన్ని కోర్టుల్లో సవాలు చేశాయి.

మరోవైపు, బైఅవుట్స్ పేరుతో ఉద్యోగులను ఇంటికి సాగనంపడానికి ట్రంప్ చేస్తోన్న మరో ప్రయత్నానికి కోర్టు మోకాలడ్డింది. రాజీనామాకు ముందుకొచ్చే వారికి ఇన్సెంటివ్‌ ఇస్తానన్న ట్రంప్‌ ఆదేశాలను బోస్టన్‌లోని యూఎస్‌ డిస్ట్రిక్ట్‌ జడ్జి జార్జి ఒ టూల్‌ జూనియర్‌ గురువారం తాత్కాలికంగా నిలిపివేశారు.