61 ఏళ్ల వయసులో మూడోసారి ప్రేమలో పడ్డ లలిత్ మోదీ

ఇండియన్ ప్రమీయర్ లీగ్ వ్యవస్థాపకుడు, మాజీ ఛైర్మన్ లలిత్ మోదీ ముచ్చటగా మూడో సారి ప్రేమలో పడ్డారు. ఈ విషయాన్ని నేరుగా ఆయనే సోషల్ మీడియా వేదికగా వెల్లడించారు. ప్రేమికుల దినోత్సవం సందర్భంగా తన కొత్త ప్రియురాలిని అందరికీ పరిచయం చేశారు. ఆమెతో కలిసి దిగిన ఎన్నెన్నో ఫొటోలను షేర్ చేస్తూ.. పాతికేళ్ల స్నేహం ప్రేమగా మారిందంటూ చెప్పుకొచ్చారు. అయితే లలిత్ మోదీ చేసిన ఈ ఒక్క పోస్టుతో అతడి కొత్త ప్రియురాలు ఎవరో తెలియడమే కాకుండా.. మాజీ విశ్వ సుందరి సుస్మితా సేన్‌తో బ్రేకప్ విషయం కూడా వెలుగులోకి వచ్చింది. ఆ పూర్తి వివరాలు మీకోసం.

మనీలాండరింగ్‌తో పాటు పన్ను ఎగవేత కేసుల్లో ఇరుక్కున్న లలిత్ మోదీ.. 2010లోనే దేశం విడిచి పారిపోయారు. లండన్ వెళ్లిపోయిన అతడు అక్కడే తలదాచుకుంటున్నారు. అయితే 2018లో ఆయన భార్య మిలాన్ క్యాన్సర్‌తో పోరాడుతూ ప్రాణాలు కోల్పోయారు. అలా కొన్నేళ్ల పాటు ఒంటరిగానే ఉన్న ఈయన మూడేళ్ల క్రితమే ప్రేమలో పడ్డట్లు తెలిపారు. ముఖ్యంగా మాజీ విశ్వసుందరి, బాలీవుడ్ హాట్ బ్యూటీ సుస్మితా సేన్‌తో డేటింగ్ కూడా చేస్తున్నట్లు 2022 జులై నెలలో ప్రకటించారు.

తమకింకా పెళ్లి కాలేదని.. కానీ భవిష్యత్తులో చేసుకునే అవకాశం ఉంటుందని చెప్పారు. అంతేకాకుండా ఆమెతో కలిసి దిగిన ఫొటోలను కూడా షేర్ చేశారు. అప్పట్లో ఈ వార్త దేశ వ్యాప్తంగా సంచలనం రేపింది. 59 ఏళ్ల వయసులో ప్రేమ ఏంటని కొందరు విమర్శించగా.. అతడితో హీరోయిన్‌కు ప్రేమేంటని మరికొంత మంది విమర్శించారు. అయితే వీటిపై మాత్రం సుస్మితా సేన్ స్పందించలేరు. కానీ ఓ ఇంటర్వ్యూలో సూటి ప్రశ్న ఎదురు కాగా.. విమర్శలను తాను పట్టించుకోనని.. తన వ్యక్తిగత జీవితానికి సంబంధించిన విషయాలను అందరితో పంచుకోనని చెప్పారు.

ఈమె మాటలు విన్న వారంతా లలిత్ మోదీకి ఈమె బ్రేకప్ చెప్పేసి ఉంటారని కూడా భావించారు. మరికొంత మంది చాటుగానే వీళ్లు ప్రేమాయణం సాగిస్తున్నారని చెప్పుకొచ్చారు. కానీ తాజాగా లలిత్ మోదీ ఇన్‌స్టాగ్రామ్ వేదికగా ఓ పోస్టు పెట్టారు. ప్రేమికుల దినోత్సవం సందర్భంగా ఆయన మరోసారి ప్రేమలో పడ్డట్లు చెప్పారు. స్నేహం నుంచి ప్రేమ వరకు వారిద్దరూ కలిసి దిగిన ఫొటోలను ఓ వీడియోగా మలిచి పెట్టారు. దీంతో పాటే ఓ ఎమోషనల్ మెసేజీ రాసుకొచ్చారు.

అదృష్టం ఒక్కసారే వస్తుందని అంతా అంటారని.. కానీ తనను మాత్రం రెండుసార్లు అదృష్టం వరించందని చెప్పుకొచ్చారు. 25 ఏళ్ల స్నేహం ప్రేమగా మారిందంటూ.. అందరూ ఇలాంటి అనుభూతిని పొందాలని కోరుకుంటున్నట్లు కూడా వెల్లడంచారు. అలాగే ప్రజలందరికీ వాలెంటైన్స్ డే శుభాకాంక్షలు చెప్పారు. కానీ ఇందులో కొత్త ప్రేయసికి సంబంధించిన వివరాలను మాత్రం లలిత్ మోదీ చెప్పలేదు.