ఒక్కసారిగా దిగొచ్చిన బంగారం ధరలు

పసిడి ప్రియులకు అదిరిపోయే శుభవార్త. ఇటీవల భారీగా పెరిగిన బంగారం ధరల్లో ఒక్కసారిగా భారీ మార్పు కనిపించింది. అంతర్జాతీయ మార్కెట్లో సడెన్‌గా భారీ స్థాయిలో గోల్డ్ రేట్లు దిగిరావడం విశేషం. అమెరికాలో జనవరిలో ద్రవ్యోల్బణం మరోసారి భారీగా పెరగడం.. రిటైల్ సేల్స్ కూడా పడిపోవడం.. వెరసి యూఎస్ ఫెడరల్ రిజర్వ్ వడ్డీ రేట్లను తగ్గించే అవకాశాలు లేకపోవడం నేపథ్యంలో బంగారం ధరలు సడెన్‌గా భారీగా దిగొచ్చాయి. ఈ కారణాల నేపథ్యంలో ఇదివరకు అమెరికా అధ్యక్షుడు డొనాల్డ్ ట్రంప్ దూకుడైన, కఠిన నిర్ణయాలతో.. ఇప్పటికే ఆల్ టైమ్ గరిష్ట స్థాయిల్లో బంగారం ట్రేడవుతుండగా.. లాభాల్ని సొమ్ముచేసుకునేందుకు ఇన్వెస్టర్లు ప్రాఫిట్ బుకింగ్ చేసుకున్నారు. అంటే ఇలా ఒక్కసారిగా పసిడి ధరలు దిగొచ్చేందుకు ప్రాఫిట్ బుకింగ్.. ప్రధాన కారణంగా నిలిచిందని ఇన్వెస్టర్లు చెబుతున్నారు.

ముందటి రోజు అంటే శుక్రవారం రోజు ఇంటర్నేషనల్ మార్కెట్లో స్పాట్ గోల్డ్ రేటు ఔన్సుకు (31.10 గ్రాములు) ఏకంగా 2940 డాలర్లపైన ఉండగా.. ఇప్పుడు అది పెద్ద మొత్తంలో దిగొచ్చింది. ఇప్పుడు స్పాట్ గోల్డ్ ధర 2882.90 డాలర్లకు దిగొచ్చింది. అంటే చూడండి రోజు వ్యవధిలోనే ఇది దాదాపు 60 డాలర్ల వరకు పడిపోవడం గమనార్హం. స్పాట్ సిల్వర్ ధర కూడా 33.40 డాలర్ల నుంచి 32.17 డాలర్లకు దిగొచ్చింది. ఇదే సమయంలో ఆర్బీఐ జోక్యం కారణంగా రూపాయి విలువ కూడా క్రమంగా పుంజుకుంటూ వస్తోంది. ప్రస్తుతం డాలర్‌తో పోలిస్తే రూపాయి మారకం విలువ రూ. 86.76 వద్ద కొనసాగుతోంది.

ఇదే సమయంలో మల్టీ కమొడిటీ ఎక్స్చేంజిలో బంగారం ధరలు తీవ్ర ఒడుదొడుకులకు లోనై ఆఖర్లో భారీగా దిగొచ్చాయి. అంతర్జాతీయంగా అనిశ్చిత పరిస్థితుల నేపథ్యంలో మల్టీ కమొడిటీ ఎక్స్చేంజి గోల్డ్ రేటు రూ. 86 వేల మార్కుకు చేరి.. చివరకు అది రూ. 84,687 వద్ద క్లోజ్ అయింది. డాలర్ ఇండెక్స్ కూడా తగ్గింది. బంగారం, వెండి వంటి విలువైన లోహాల ధరలు అంతర్జాతీయ విపణికి అనుగుణంగానే ఉంటాయన్న సంగతి తెలిసిందే. అక్కడ పెరిగితే ఇక్కడా పెరుగుతుంది. అక్కడ తగ్గితే ఇక్కడా తగ్గుతుంది. ఇదే సమయంలో దేశీయంగా గోల్డ్ రేట్లు కూడా మరుసటి రోజు భారీగా తగ్గనున్నాయి.

ఇంకా బంగారం ధరలు తగ్గేందుకు.. ఇటీవల యూఎస్ ఫెడరల్ రిజర్వ్ ఛైర్మన్ జెరోమ్ పావెల్ కీలక వ్యాఖ్యలు చేయడం కూడా ఒక ప్రధాన కారణం. అంటే.. ట్రంప్ టారిఫ్స్ నేపథ్యంలో ఆయన స్పందించారు. అన్ని పరిస్థితులకు సిద్ధంగా ఉన్నామని చెప్పిన పావెల్.. వడ్డీ రేట్లను తగ్గించేందుకు తొందరేమీ లేదని అన్నారు. అంటే ఫెడ్ వడ్డీ రేట్లను తగ్గించకపోతే.. అప్పుడు బంగారం ధరలు దిగొచ్చే అవకాశం ఉంటుందన్నమాట. సాధారణంగా ఫెడ్ వడ్డీ రేట్లు తగ్గించిన సమయంలోనే బంగారం ధరలు పెరుగుతుంటాయి. ఇప్పుడా అవకాశం లేదు. ఇంకా యూఎస్‌లో ద్రవ్యోల్బణం పెరగ్గా.. దీనికి మరింత బలం చేకూరినట్లయింది. ద్రవ్యోల్బణం పెరిగినప్పుడు కూడా వడ్డీ రేట్లను తగ్గించే అవకాశాలు ఎక్కువగా ఉండవు. ఇప్పుడు రిటైల్ సేల్స్ కూడా పడిపోయాయి. ఈ నేపథ్యంలోనే బంగారం ధరలు తగ్గేందుకు ఇంకా ఎక్కువగా అవకాశాలు ఉన్నట్లు ప్రముఖ నిపుణులు వెల్లడిస్తున్నారు.