ప్రార్థనా స్థలాల అంశంపై సుప్రీంకోర్టు కీలక వ్యాఖ్యలు

ప్రార్థన స్థలాల అంశంలో కొత్త పిటిషన్లు దాఖలు చేయడంపై సర్వోన్నత న్యాయస్థానం తీవ్ర అసంతృప్తిని వ్యక్తం చేసింది. ప్రార్థనా స్థలాల చట్టం 1991 కింద దాఖలైన పిటిషన్లపై సోమవారం నాటి విచారణ సమయంలో ప్రధాన న్యాయమూర్తి జస్టిస్ సంజీవ్ ఖన్నా నేతృత్వంలోని ధర్మాసనం... ‘ఇప్పటి వరకూ జరిగింది చాలు... ఇలాంటి పిటిషన్లకు ముగింపు ఉండాలి’ అని వ్యాఖ్యానించింది. దీనికి సంబంధించి కొత్త పిటిషన్లను విచారణ చేపట్టబోమని జస్టిస్ ఖన్నా స్పష్టం చేశారు. అయితే అదనపు అంశాలను జోడించి కొత్త పిటిషన్ దాఖలు చేయడానికి మాత్రం అనుమతించింది. కానీ, ఇప్పటివరకు దాఖలైన కొత్త పిటిషన్లపై ఎలాంటి స్పష్టత ఇవ్వకపోవడం గమనార్హం.

ఇటీవల దేశంలోని పలు ప్రాంతాల్లో కొత్తగా మందిరం-మసీదు వివాదాలు పుట్టుకొస్తున్నాయి. అయోధ్య వివాదం ముగిసిన తర్వాత కాశీ విశ్వనాథ్-జ్ఞానవాపీ, శ్రీకృష్ణ జన్మస్థలం- మధుర ఈద్గావ్, తాజాగా శంభాల్ దర్గా వంటి వివాదాలు తెరపైకి వచ్చాయి. ఈ క్రమంలో కాంగ్రెస్‌, మజ్లిస్‌తో పాటు పలు రాజకీయ పార్టీలు ప్రార్థనా స్థలాల చట్టం 1991ను కఠినంగా అమలు చేయాలని కోరుతూ సుప్రీంకోర్టులో పిటిషన్లు వేశాయి. ఈ పిటిషన్ల తరఫున సీనియర్‌ లాయర్ వికాస్‌ సింగ్‌ వాదనలు వినిపిస్తున్నారు. తాజాగా, సోమవారం నాటి విచారణలో ప్రధాన న్యాయమూర్తి జస్టిస్ సంజీవ్ ఖన్నా నేతృత్వంలోని ధర్మాసనం కీలక వ్యాఖ్యలు చేసింది.

గతంలో కొత్త పిటిషన్లు వేయడానికి అనుమతించామని, కానీ ఇలాంటి వ్యాజ్యాలకు ఒక పరిమితి ఉండాలని సూచించింది.. ప్రార్థన స్థలాలకు సంబంధించిన పిటిషన్లు దాఖలు చేస్తే.. అందులో కొత్త అంశాలను జోడించాలని పేర్కొంది. అలా అయితేనే వాటిని విచారణకు స్వీకరిస్తామని ధర్మాసనం స్పష్టం చేసింది. తదుపరి విచారణను ఏప్రిల్ మొదటి వారానికి వాయిదా వేసింది. కాగా, 1991 ప్రార్థనా స్థలాల పరిరక్షణ చట్టం ప్రకారం.. 1947 అంటే స్వాతంత్య్రం వచ్చేనాటికి దేశంలోని ఉన్న ప్రార్థనా స్థలాల యథాతథ స్థితిని కొనసాగించాలి. అయితే, దీనిని నుంచి అయోధ్య రామమందిరం-బాబ్రీ మసీదు వివాదాన్ని మినహాయించారు.

కాగా, ఈ చట్టం చెల్లుబాటును సవాల్ చేస్తూ ముందుగా అశ్విని కుమార్ ఉపాధ్యాయ్ వ్యాజ్యం దాఖలు చేశారు, అయితే గతేడాది ఏకంగా మసీదులను తిరిగి స్వాధీనం చేసుకోవాలని కోరుతూ హిందూ పార్టీలు దాఖలు చేసిన 18 వ్యాజ్యాలను మందిర-మసీదు వివాదాలకు సంబంధించిన అన్ని కేసులతో కలిపి విచారణ చేపట్టింది. వీటిలో షాహి ఇద్గా-కృష్ణ జన్మభూమి, కాశీ విశ్వనాథ్-జ్ఞాన్‌వాపి మసీదు, సంభాల్ మసీదు వంటి కొత్త కొత్త వివాదాలు ఉన్నాయి.