ఆంధ్రప్రదేశ్‌కు మరో ప్రతిష్టాత్మక లులు గ్రూపు షాపింగ్ మాల్‌

లులు గ్రూప్ భారతదేశంలో కార్యకలాపాలు విస్తరించాలని నిర్ణయించింది. లులు గ్రూప్ ఇంటర్నేషనల్ నాగ్‌పూర్, విశాఖపట్నం, అహ్మదాబాద్‌లలో ప్రాజెక్టులు చేపట్టాలని.. తన కార్యకలాపాలను విస్తరించాలని యోచిస్తోంది. ప్రధానమంత్రి నరేంద్ర మోదీ నాయకత్వంలో భారతదేశం అభివృద్ధి సాధిస్తుందంటున్న లులు గ్రూపు ఛైర్మన్ యూసఫ్ అలీ.. భారతదేశ ఆర్థిక వ్యవస్థలో తమ భాగస్వా్మ్యం కూడా ఉండాలని కోరుకుంటున్నట్లు చెప్పారు. ఆర్టిఫిషియల్ ఇంటెలిజెన్స్, ఐటీ, ఫుడ్ ప్రాసెసింగ్ రంగాలలో ఇండియా, ఖతార్ మధ్య సంబంధాలు మెరుగుపడాలని కాంక్షించారు. ఈ క్రమంలోనే భారతదేశంలోని విశాఖపట్నం, అహ్మదాబాద్ వంటి చోట్ల తమ కార్యకలాపాలు విస్తరిస్తున్నట్లు తెలిపారు.

అహ్మదాబాద్‌లో అతిపెద్ద షాపింగ్ మాల్‌ నిర్మిస్తున్నామన్న లులు గ్రూపు ఇంటర్నేషనల్ ఛైర్మన్.. విశాఖపట్నంలో మరొకదానికి చర్చలు ప్రారంభించినట్లు చెప్పారు, వీటితో పాటుగానాగ్‌పూర్‌లో కొత్త ప్రాజెక్ట్ కోసం ఆలోచిస్తున్నట్లు తెలిపారు. మరోవైపు గతేడాది సెప్టెంబర్ నెలాఖర్లో లులు గ్రూప్ ఇంటర్నేషనల్ ఛైర్మన్ యూసఫ్ అలీ.. ఏపీ ముఖ్యమంత్రి నారా చంద్రబాబు నాయుడుతో భేటీ అయ్యారు. సచివాలయంలో చంద్రబాబుతో భేటీయైన లులు గ్రూప్ ప్రతినిధులు .. ఏపీలో పెట్టుబడులు పెట్టేందుకు ఉన్న అవకాశాల గురించి చర్చించారు. దీనిపై సీఎం చంద్రబాబు ట్వీట్ కూడా చేశారు.

విశాఖపట్నంలో లులూ గ్రూప్ షాపింగ్ మాల్, మల్టీప్లెక్స్ నిర్మాణంపై యూసఫ్ అలీతో చర్చించినట్లు చంద్రబాబు తెలియజేశారు.తిరుపతిలో లులూ మల్టీప్లెక్స్, విజయవాడలో లులూ హైపర్ మార్కెట్ నిర్మాణం గురించి చర్చించినట్లు తెలిపారు.ఫుడ్ ప్రాసెసింగ్ సెక్టార్‌లోనూ పెట్టుబడులు పెట్టేందుకు ఉన్న అవకాశాల గురించి వివరించినట్లు చంద్రబాబు తెలిపారు. ప్రభుత్వం నుంచి అన్నిరకాలుగా ప్రోత్సాహం అందిస్తామని వారికి తెలియజేశారు. ఈ నేపథ్యంలో తమ భవిష్యత్ ప్రణాళికల గురించి వివరిస్తూ విశాఖపట్నంలో ప్రాజెక్టు గురించి లులు గ్రూప్ ఛైర్మన్ యూసఫ్ అలీ ప్రస్తావించడంతో.. త్వరలోనే విశాఖపట్నం వాసులను లులు ఇంటర్నేషనల్ షాపింగ్ మాల్ పలకరించే అవకాశాలు కనిపిస్తున్నాయి.