లిఫ్టులోకి కుక్కను తీసుకురావద్దన్నందుకు.. బాలుడిని పొట్టుపొట్టు కొట్టిన మహిళ

8 ఏళ్ల వయసున్న ఓ బాలుడు తమ అపార్ట్‌మెంట్‌లోని లిఫ్టులోకి ఎక్కి నిల్చున్నాడు. ఈక్రమంలోనే అక్కడకు ఓ మహిళ వచ్చింది. వెంట పెంపుడు కుక్కను కూడా తీసుకు వచ్చింది. కానీ శునకాన్ని చూసి భయపడ్డ బాలుడు.. ఆంటీ ప్లీజ్, ఆంటీ ప్లీజ్ దాన్ని లోపలికి తీసుకు రావొద్దంటూ బతిమాలాడు. అది చూసిన ఆమెకు జాలి కల్గడానికి బదులు కోపం వచ్చింది. నా ఇష్టం నేను తీసుకొస్తానంటూనే కుక్కను లోపలికి తీసుకు వచ్చింది. బాలుడు భయంతో అక్కడక్కడే పరుగులు తీస్తుండగా.. మహిళ అతడిని పట్టుకుని పొట్టు పొట్టు కొట్టింది. ఆపై లిఫ్టులోంచి బయటకు తోసేసింది. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది. ఆ పూర్తి వివరాలు మీకోసం.

ఢిల్లీ శివారు ప్రాంతమైన ఉత్తర ప్రదేశ్‌లోని గ్రేటర్ నోయాడా.. గౌర్ సిటీ 2 అపార్ట్‌మెంట్‌లో తల్లిందడ్రులతో పాటు ఓ బాలుడు నివాసం ఉంటున్నాడు. 8 ఏళ్ల వయసు కల్గిన ఇతడు ఫిబ్రవరి 19వ తేదీన సాయంత్రం బడికి వెళ్లొచ్చాక ట్యూషన్‌కు వెళ్లాడు. అదయ్యాక ఇంటికి వచ్చాడు. ముఖ్యంగా అపార్ట్‌మెంట్‌కు చేరుకున్న అతడు.. తమ ఫ్లాట్‌కు వెళ్లేందుకు లిఫ్టులోకి ఎక్కాడు. అప్పుడే అక్కడకు ఓ మహిళ వచ్చింది. వెంట కుక్కను కూడా తీసుకు వచ్చింది.

కానీ ఆ బాలుడికి చిన్నప్పటి నుంచి కుక్కలు అంటే విపరీతమైన భయం. అందువల్లే కుక్కను లోపలికి తీసుకు రావద్దంటూ ఆమెను బతిమాలాడు. కానీ ఆమె మాత్రం అందుకు ఏమాత్రం అంగీకరించలేదు. అతడు ఎంత వద్దని చెబుతున్నా పట్టించుకోకుండా కుక్కను పట్టుకుని లోపలికి వచ్చేసింది. ఈక్రమంలోనే బాలుడు ఏడవడం ప్రారంభించగా.. సదరు మహిళ అతడిని కొట్టడం మొదలు పెట్టింది. అతడిపై దాడి చేస్తూనే.. లిఫ్టు నుంచి బయటకు తోసేసింది. ఈక్రమంలోనే అతడు బయటకు వెళ్లకుండా లోపలికి వచ్చేందుకు ప్రయత్నించాడు.

అప్పుడే కుక్క కూడా బయటకు వెళ్లగా.. మహిళ బాలుడిని బయట కూడా కొట్టింది. తన శక్తినంతా కూడదీసుకుని సదరు బాలుడు మహిళ నుంచి తప్పించుకుని లిఫ్టులోకి చేరాడు. ఆమె కూడా లోపలికి వచ్చేందుకు ప్రయత్నించేసరికి తలుపులు మూసుకున్నాయి. అప్పటికే ఆమె కొట్టడం, కుక్కపై భయంతో.. బాలుడు ఏడుస్తూనే ఉన్నాడు. కాళ్లు, చేతులు కూడా వణుకుతుండగానే బాలుడి ఇంటికి వెళ్లి తల్లిదండ్రులకు విషయం చెప్పాడు.

ఈక్రమంలోనే తల్లిదండ్రులు ఆమె ఇంటికి వెళ్లి గొడవ చేశారు. అపార్ట్‌మెంట్ వాసులు సైతం వారికి అండగా నిలిచారు. చాలా రోజులుగా ఆమె అందరితో ఇలాగే గొడవ పడుతుందని చెప్పి మహిళపై పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు. ముఖ్యంగా సీసీ టీవీ ఫుటేజీ ఆధారంగా ఏం జరిగిందో తెలుసుకున్నారు. ప్రస్తుతం ఇందుకు సంబంధించిన వీడియో నెట్టింట వైరల్ అయింది. ఇది చూసిన ప్రతీ ఒక్కరూ మహిళ తీరుపై ఆగ్రహం వ్యక్తం చేస్తున్నారు. ఇలాంటి వారికి కఠిన శిక్షలు వేయాలని.. అప్పుడే బుద్ధి వస్తుందంటూ చెప్పుకొస్తున్నారు.