ఎన్నికల్లో ఓడిపోయుంటే నా జీవితం నాశనమయ్యేది..: ట్రంప్

అగ్రరాజ్యం అమెరికా అధ్యక్షుడు డొనాల్డ్ ట్రంప్ షాకింగ్ కామెంట్ల చేశారు. తమ దేశంతో పాటు ఇతర దేశాల అధ్యక్షులు, ప్రధాన మంత్రులను సైతం తన మాటలు, చేతలతో భయపెట్టే ఈయన.. ఎన్నికల్లో ఓడిపోతే తన పరిస్థితో ఎలా ఉండేందో వివరించారు. గత ఎన్నికల్లో ఓడిపోయినందుకే.. గత సర్కారు తనకు చుక్కలు చూపించిందని చెప్పారు. ఇప్పుడు ఓడిపోయి ఉంటే మాత్రం తన జీవితం నాశనం అయ్యేదని.. తరచుగూ కోర్టులు, కేసులంటూ తిరగాల్సి వచ్చేదన్నారు. ఆ పూర్తి వివరాలు మీకోసం.

అమెరికా 47వ అధ్యక్షుడిగా డొనాల్డ్ ట్రంప్ పదవీ బాధ్యతలు స్వీకరించిన విషయం అందరికీ తెలిసిందే. అయితే రెండోసారి అధ్యక్షుడిగా అమెరికా అధికార పగ్గాలు చేపట్టినప్పటి నుంచే ట్రంప్ చాలా దూకుడుగా వ్యవహరిస్తున్నారు. అక్రమంగా తమ దేశంలోకి వలస వచ్చిన విదేశీయులను ప్రత్యేక సైనిక విమానాల ద్వారా వారి స్వస్థలాలకు పంపిస్తున్నారు. దీనిపై ఎంత వ్యతిరేకత వస్తున్నా ఏమాత్రం పట్టించుకోకుండా తన పని తాను చేసుకుపోతున్నారు.

అంతేకాకుండా అనేక మందిని ఉద్యోగాల నుంచి తొలగించి.. పాలన కొనసాగిస్తున్నారు. ఓవైపు పనామా కాలువను చేజిక్కుంచుకోవాలని, గ్రీన్‌లాండ్ దీవిని కొనుగోలు చేయాలని, కెనడాను అమెరికా 51 రాష్ట్రాంగా మార్చాలని ఉందంటూ వివరించారు. ఇలా ఇంత మంది కోపానికి కారణం అవుతూనే, అనేక మందిని భయభ్రాంతులకు గురి చేస్తున్న ట్రంప్ తాజాగా షాకింగ్ కామెంట్లు చేశారు. ఎవరికీ భయపడని ఆయన ఎన్నికల్లో ఓడిపోతే తన జీవితం దుర్భరంగా మారి ఉండేదని చెప్పారు.

ఈ ఎన్నికల్లో ఓడిపోయి ఉంటే తన పరిస్థితి చాలా ఘోరంగా ఉండేదని ట్రంప్ వ్యాఖ్యానించారు. గత సర్కారు తనతో చాలా దారుణంగా వ్యవహరించిందని మియామీలో నిర్వహించిన ఓ సదస్సులో పాల్గొని ఆరోపించారు. అంతేకాకుండా న్యాయపరమైన సవాళ్లను ఎదుర్కుంటూ జీవితం గడిపే పరిస్థితి వచ్చుండేదన్నారు. అలాగే ఈ ఎన్నికల్లో ఓడిపోతే.. వచ్చే ఎన్నికల్లో పోటీ చేసేందుకు చాలా ఆలోచించే వాడినని చెప్పారు. ట్రంప్ ఇలాంటి వ్యాఖ్యలు చేయడంతో అంతా షాక్ అవుతున్నారు. ఎంతో ధైర్యంగా ఉండే ఈయన కూడా భయపడతారా అంటూ కామెంట్లు చేస్తున్నారు.