పైకేమే యూట్యూబ్ ఛానెల్ సెటప్.. లోన చూస్తే

రోడ్డు మీద నుంచి అలా వెళ్తూ.. బయటి నుంచి చూస్తే యూట్యూబ్ ఛానెల్ పేరుతో ఓ బోర్డు కనిపిస్తుంది. అలా అని లోపలికి వెళ్దామంటే కుదరదండోయ్. బయటి వ్యక్తులు లోపలికి రాకుండా డిజిటల్ డోర్లు ఉంటాయి. ఆ పక్కనే స్వైపింగ్ మెషీన్లు ఏర్పాటు చేసి ఉంటాయి. ఇది చూసి కార్పొరేట్ తరహాలో యూట్యూ్బ్ ఛానెల్ నడిపిస్తున్నారని భ్రమపడకండి. అసలు యవ్వారం వేరే. యూట్యూబ్ ఛానెల్ ముసుగులో వ్యభిచారం నిర్వహిస్తున్న వైనాన్ని మాచవరం పోలీసులు బట్టబయలు చేశారు. యూట్యూబ్ ఛానెల్ ముసుగులో స్పా సెంటర్‌లో వ్యభిచారం నిర్వహిస్తు్న్నట్లు గుర్తించారు. మాచవరం పోలీసులు జరిపిన ఆకస్మిక తనిఖీలలో ఈ వ్యవహారం బయటపడింది.

వెటర్నరీ కాలనీలోని ఓ స్పా సెంటర్‌లో వ్యభిచారం జరుగుతున్నట్లుగా పోలీసులకు సమాచారం అందింది. దీంతో మాచవరం పోలీసులు శుక్రవారం రాత్రి ఆకస్మిక తనిఖీలు నిర్వహించారు. ఈ తనిఖీల్లో వ్యభిచారం జరుగుతున్న విషయాన్ని గుర్తించిన పోలీసులు.. 10 మంది మహిళలు, మరో పది మంది విటులు, స్పా సెంటర్‌ మేనేజర్‌ను అదుపులోకి తీసుకున్నారు. స్పా సెంటర్ నిర్వాహకులు పరారీలోఉండగా.. పోలీసులు కేసు నమోదు చేసి దర్యాప్తు జరుపుతున్నారు.

ఆయిల్ డ్రమ్ముల్లో గంజాయి

మరోవైపు ఆయిల్ డ్రమ్ముల్లో అరలు ఏర్పాటు చేసి గంజాయి అక్రమ రవాణా చేస్తున్న వ్యక్తిని విజయవాడ టాస్క్ ఫోర్స్ పోలీసులు అరెస్ట్ చేశారు. వివరాల్లోకి వెళ్తే.. మహారాష్ట్రకు చెందిన శేషారావు అనే వ్యక్తి ఓ కాంట్రాక్టర్ వద్ద డ్రైవర్‌గా పని చేస్తున్నాడు. అయితే విశాఖపట్నంలో గంజాయి తీసుకుని, కర్ణాటకలో అందిస్తే ఎక్కువ డబ్బులు ఇస్తామని శేషారావుకు ఆశచూపారు. డబ్బు మీద ఆశతో శేషారావు అందుకు అంగీకరించాడు. విశాఖపట్నం చేరుకుని అక్కడ ఇద్దరు వ్యక్తుల సహకారంతో నాలుగు ఆయిల్ డ్రమ్ములు ఏర్పాటు చేసుకున్నాడు. అందులో సగం వరకు అరలు ఏర్పాటు చేయించాడు. పైన సగం ఆయిల్ నింపిన శేషారావు.. అడుగు భాగంలో గంజాయి ఉంచాడు.

 ఈ డ్రమ్మలను తీసుకుని వ్యానులో కర్ణాటక బయల్దేరాడు. అయితే గంజాయి రవాణాపై పోలీసులకు సమాచారం రావటంతో టాస్క్ ఫోర్స్ పోలీసులు తనిఖీలు నిర్వహించారు. ఈ సందర్భంగా ఈ వాహనాన్ని ఆపి తనిఖీ చేయగా.. గంజాయి రవాణా బయటపడింది. వ్యానులో నుంచి 78 కిలోల సరకును పోలీసులు స్వాధీనం చేసుకున్నారు. శేషారావును అరెస్ట్ చేశారు.