నా జీవితాన్ని నాశనం చేసే కుట్రలు..జనసేన వీర మహిళ ఆవేదన

జనసేన పార్టీ .. అభిమానమే అండగా, యువతే వెన్నెముకగా ఏర్పడిన రాజకీయ పార్టీ. పవన్ కళ్యాణ్ ఫ్యాన్ బేస్, ఛరిష్మాతో ఏపీ రాజకీయ యవనికపై అడుగిడిన పార్టీ. 2019 ఎన్నికల్లో తొలిసారిగా పోటీ చేసి ఘోరంగా ఓటమి పాలైనప్పటికీ ఎంతో మంది జనసైనికులు, వీర మహిళల పోరాటంతో 2024 ఎన్నికల నాటికి ఏపీ రాజకీయాల్లో సెంటర్ ఆఫ్ అట్రాక్షన్‌గా నిలిచింది జనసేన. ఎన్నికల్లోనూ వంద శాతం స్ట్రెక్ రేటుతో పోటీ చేసిన అన్ని స్థానాల్లోనూ విజయ ఢంకా మోగించింది. టీడీపీ, బీజేపీలతో కలిసి ప్రభుత్వాన్ని ఏర్పాటు చేసింది. అయితే జనసైనికులు, వీరమహిళలు అంటేనే కొంతమంది మన మదిలో మెదులుతుంటారు. అలాంటి వారిలో ఒక్కరు కొట్టే కావ్య.

2020లో పవన్ కళ్యాణ్ ప్రకాశం జిల్లా పర్యటనకు వెళ్లిన సమయంలో కొట్టె కావ్య వెలుగులోకి వచ్చారు. ప్రకాశం జిల్లా పర్యటనలో భాగంగా పవన్ కళ్యాణ్.. కాలేజీ విద్యార్థులతో సమావేశమయ్యారు. ఈ సందర్భంగా కొట్టే కావ్య మాట్లాడిన మాటలు, చేసిన ప్రసంగం సోషల్ మీడియాలో వైరల్ అయ్యింది. జనసేన వీర మహిళ పవర్ ఫుల్ స్పీచ్ అంటూ ఈ వీడియోలు వైరల్ అయ్యాయి. అయితే ఆ కొట్టే కావ్య ఇప్పుడు ఇబ్బందుల్లో ఉన్నట్లు తెలిసింది. తాజాగా ఆమె విడుదల చేసిన వీడియో.. ఈ వార్తలకు బలం చేకూరుస్తోంది.

"గత ప్రభుత్వంలో జరగని న్యాయం మన కూటమి ప్రభుత్వంలో జరుగుతుందనే నమ్మకంతో గత ఎనిమిది నెలలుగా నేను ప్రభుత్వ అధికారులు, పాలకులు, నాయకుల చుట్టూ తిరుగుతూ న్యాయం కోసం పోరాడుతున్నా. చివరగా అనుకున్నది సాధిస్తున్నాననుకునే సమయంలో.. అధికారులు నాపై అక్రమ కేసులు బనాయించి, ఎఫ్ఐఆర్ పెట్టి నా జీవితాన్ని నాశనం చేసేందుకు కుట్రలు చేస్తున్నారు. మన ప్రభుత్వంలో ఇలాంటి రోజు వస్తుందని అనుకోలేదు. నాలాంటి దిగువ మధ్యతరగతి కుటుంబానికి చెందిన ఆడపిల్లకు ఇలాంటి రోజు వస్తునందని అనుకోలేదు. అయినా కూడా నా సమస్యపై నేను న్యాయపోరాటం చేస్తూనే ఉంటా.." అంటూ కొట్టే కావ్య సోషల్ మీడియాలో వీడియో విడుదల చేశారు. ఈ వీడియో నెట్టింట వైరల్ అవుతోంది.

అయితే ఊరిలో ఓ పొలం వివాదంలో కొట్టే కావ్య మీద కేసు నమోదు చేశారంటూ సోషల్ మీడియాలో ప్రచారం జరుగుతోంది. దీనిపైనే అక్రమ కేసులు పెట్టారంటూ ఆమె వీడియో విడుదల చేసినట్లు సమాచారం. అయితే ఈ వ్యవహారం జనసేన అధిష్టానానికి చేరటంతో పార్టీ స్పందించినట్లు తెలిసింది. ఈ విషయాన్ని కొట్టే కావ్య తెలియజేశారు. తన వీడియోపై జనసేన పార్టీ కేంద్ర కార్యాలయం నుంచి స్పందన వచ్చిందని.. సంబంధిత అధికారులతో మాట్లాడతామని చెప్పారని కొట్టే కావ్య తెలిపారు. తన కేసును జనసేన ఆఫీసు పర్యవేక్షిస్తోందంటూ ధన్యవాదాలు తెలియజేశారు.