కుమార్తెకు ఘనంగా పెళ్లి జరిపించి,,,హెలికాప్టర్ వద్ద అప్పగింతలు

పెళ్లి ప్రతి ఒక్కరి జీవితంలో అత్యంత ముఖ్యమైన ఘట్టం. పెద్దలు పెళ్లంటే నూరేళ్ల పంట అన్నారు. అందుకే ఈ వేడుకను కలకాలం గుర్తుండిపోయేలా చేసుకోవాలని చాలా మంది భావిస్తుంటారు. ఈ క్రమంలో ఓ తండ్రి తన కుమార్తె వివాహాన్ని కూడా అంగరంగ వైభవంగా జరిపించి.. ఆమెను అత్తారింటికి హెలికాప్టర్‌లో సాగనంపాడు. ఈ ఘటన రాజస్థాన్‌లోని ఝలావార్ జిల్లాలో చోటుచేసుకుంది. ఝాలావార్ జిల్లాలోని అరిహంత్ నగర్‌కు చెందిన సీతారాాం చౌధరి అనే వ్యాపారవేత్త తన కుమార్తె చాందినీకి.. జైపూర్‌కు చెందిన రామ్‌ అనే యువకుడితో వివాహం జరిపించారు.

ఫిబ్రవరి 20న గురువారం స్థానికంగా ఓ ప్రయివేటు రిసార్టులో ఈ పెళ్లి అత్యంత ఘనంగా జరిగింది. వివాహం అనంతరం తన కుమార్తెను అత్తవారింటికి పంపడానికి ఓ హెలికాప్టరును అద్దెకు తీసుకున్నాడు. లోహవిహంగంలో వధువును సాగనంపుతున్న దృశ్యాలను చూసేందుకు స్థానికులు పెద్దసంఖ్యలో గుమికూడారు. హెలిప్యాడ్‌ వద్దే అప్పగింతల కార్యక్రమాన్ని నిర్వహించారు. సీతారామ్ కుటుంబసభ్యులు అప్పగింతల పాటను పాడి.. వధూవరులను హెలికాప్టర్ ఎక్కించారు. ఈ దృశ్యాలను అక్కడున్నవారంతా వీడియోలు, ఫోటోలు తీయడానికి ఎగబడ్డారు.

అయితే,, ముందుగానే హెలికాప్టరు ల్యాండింగుకు పోలీసులు, అగ్నిమాపక అధికారుల నుంచి సీతారామ్ అనుమతి తీసుకున్నారు. అప్పగింతల కార్యక్రమాన్ని ప్రత్యేకంగా చేయడానికి నెల రోజులుగా ప్లాన్‌ చేసినట్లు సీతారాం చౌధరి తెలిపారు. ఇది పెద్దలు కుదిర్చినే వివాహమని ఆయన వివరించారు. ఇదిలా ఉండగా, గతంలోనూ ఇలాంటి ఘటనలు జరిగాయి. ఏపీలో కూడా ఓ తండ్రి తన కూతురి పెళ్లిని ఇలాగే గ్రాండ్‌గా జరిపించి, హెలికాప్టర్‌లో ఆమెను అత్తారింటికి పంపించారు. నెల్లూరుకు చెందిన రాజకీయ నేత, మాజీ మున్సిపల్ ఛైర్మన్ ముక్కాల ద్వారకానాథ్‌ తన కుమార్తె ఉషశ్రీకి విజయవాడకు చెందిన యువకుడితో పెళ్లిచేసి హెలికాప్టర్‌లో సాగనంపారు. దాదాపు రెండేళ్ల కిందట జరిగిన ఈ వివాహం గురించి తెలుగు రాష్ట్రాల్లో చర్చ జరిగింది. అయితే, ఉత్తర్‌ప్రదేశ్‌ రూడ్కీలోని చావ్‌మండీకి చెందిన సంజయ్‌ కుమార్‌ అనే వ్యక్తి తన కుమారుడికి పెళ్లి చేసి.. కోడలిని హెలికాప్టర్‌లో ఇంటికి తీసుకొచ్చాడు.