భారత బీ టీమ్‌పై కూడా పాక్ గెలవదు.. సునీల్ గవాస్కర్

ఛాంపియన్స్ ట్రోఫీలో వరుసగా రెండు మ్యాచుల్లో ఓడిన పాకిస్థాన్.. టోర్నీ నుంచి నిష్క్రమించింది. డిఫెండింగ్ ఛాంపియన్ హోదాలో బరిలోకి దిగినా.. ఇప్పటివరకు విజయాల ఖాతా తెరవలేకపోయింది. బ్యాటింగ్‌లో విఫలమవడం, బౌలింగ్‌లో రాణించకపోవడం ఆ జట్టుకు ఇబ్బందిగా మారింది. దీంతో సొంతగడ్డపై ఆడుతున్నా.. ఆ జట్టు మాత్రం బలహీనంగా కనిపిస్తోంది. ఈ నేపథ్యంలో ఆ జట్టుపై పాకిస్థాన్ మాజీలు, ఫ్యాన్స్ నుంచి తీవ్రస్థాయిలో విమర్శలు వస్తున్నాయి.

ఇదే విషయంపై టీమిండియా క్రికెట్ దిగ్గజం సునీల్ గవాస్కర్ కీలక వ్యాఖ్యలు చేశాడు. ఆ జట్టుపై వ్యంగ్యాస్త్రాలు సంధించాడు. ప్రస్తుతం ఉన్న పాకిస్థాన్ క్రికెట్ జట్టును.. భారత్ బి జట్టు కూడా ఓడిస్తుందని ఎద్దేవా చేశాడు. ఆ జట్టు భారత బి టీమ్‌పై కూడా గెలవలేదని వ్యాఖ్యానించాడు. పాకిస్థాన్ జట్టులో ఒకప్పుడు ఎంతో మంది ప్రతిభావంతులైన క్రికెటర్లు ఉండేవారని.. కానీ ప్రస్తుతం ఆ పరిస్థితి లేదన్నాడు. అంతర్జాతీయ స్థాయిలో రాణించే ఆటగాళ్లను తయారు చేయడంలో పాకిస్థాన్ క్రికెట్ బోర్డు విఫలమైందని చెప్పుకొచ్చాడు.

"పాకిస్థాన్ జట్టులో క్వాలిటీ తగ్గింది. ఆ జట్టు ప్రస్తుతం ఇండియా-బిపై కూడా గెలవలేదు. సీ టీమ్‌ను పాక్ ఓడిస్తుందా అంటే అది కూడా కచ్చితంగా చెప్పలేను. బలమైన రిజర్వ్ ఆటగాళ్లు లేకపోవడం పాకిస్థాన్‌కు ఇబ్బందిగా మారింది. ఒకప్పుడు ఆ జట్టులో ఎంతో మంది ప్రతిభావంతులు ఉండేవాళ్లు. ఉదాహరణకు ఇంజమామ్ ఉల్ హక్. అతడు తన టెంపర్‌మెంట్‌తో లోపాలను అధిగమించేవాడు. ఇప్పుడు అలాంటి వాళ్లు లేరు. అత్యున్నతమైన ఆటగాళ్లను తీర్చిదిద్దడంలో పాక్ విఫలమైంది" అన సునీల్ గవాస్కర్ అన్నాడు.

"ఇండియన్ ప్రీమియర్ లీగ్ కారణంగా వన్డే, టీ20లకు భారత్‌కు ఎంతోమంది యంగ్ టాలెంటెడ్ ఆటగాళ్లు దొరికారు. వారంతా ఐపీఎల్‌తో పాటు.. దేశవాళీ క్రికెట్‌లో రాణిస్తున్నారు. పాకిస్థాన్‌కు కూడా పాకిస్థాన్ సూపర్ లీగ్ ఉంది. కానీ ఆ జట్టుకు రిజర్వ్ బెంచ్ ఎందుకు లేదు? ఈ విషయంపై పాక్ ఆలోచించుకోవాలి. దీనిపై ఆత్మవిమర్శ చేసుకుని.. అధిగమించేందుకు మార్గాలు వెతకాలి" అని భారత క్రికెట్ దిగ్గజం గవాస్కర్ వ్యాఖ్యానించాడు.