ఆర్టీసీ బస్సును ఢీకొట్టిన కారు.. ఐదుగురు సజీవదహనం

తమిళనాడులో బుధవారం తెల్లవారుజామున ఘోర రోడ్డు ప్రమాదం సంభవించింది. కరూర్ జిల్లా కుళితలై జాతీయ రహదారిపై ఆర్టీసీ బస్సు, కారు ఢీకొని మంటలు వ్యాపించాయి. ఈ ఘటనలో కారు పూర్తిగా దగ్దమై.. అందులోని ఐదుగురు సజీవదహనమయ్యారు. ప్రమాదం గురించి సమాచారం అందుకున్న పోలీసులు, ఫైర్ సిబ్బంది ఘటనా స్థలికి చేరుకున్నారు. సహాయక చర్యలు చేపట్టి.. ఫైర్ ఇంజిన్ సాయంతో మంటలను అదుపు చేశారు. అనంతరం మృతదేహాలను కారులో నుంచి బయటకు తీశారు. మృతదేహాలను స్వాధీనం చేసుకుని పోస్ట్‌మార్టం కోసం తరలించారు. బాధితులను గుర్తించాల్సి ఉందని పోలీసులు తెలిపారు.

ఇక, ప్రమాదంతో కరూర్-తిరుచ్చి జాతీయ రహదారిపై కిలోమీటర్ల మేర వాహనాలు నిలిచిపోయి ట్రాఫిక్ జామ్ అయ్యింది. ఘటన అనంతరం మంటలు చెలరేగడంతో వాహనాలు ఎక్కడవక్కడే నిలిచిపోయాయి. మంటలను ఆర్పడానికి అగ్నిమాపక సిబ్బంది తీవ్రంగా శ్రమించాల్సి వచ్చింది. అతివేగమే ప్రమాదానికి కారణమని ప్రాథమికంగా నిర్దరించారు. ఎదురెదురుగా వస్తోన్న కారు, బస్సు ఒకదానినొకటి వేగంగా వచ్చి ఢీకొట్టినట్టు పేర్కొన్నారు. కాగా, ఈ ఘటన గురించి పూర్తి వివరాలు తెలియాల్సి ఉంది.

అరంతంగి నుంచి ప్రయాణికులతో తిర్‌పూర్‌కు వెళ్తోన్న ఆర్టీసీ బస్సును.. కరూర్-తిరుచ్చి బైపాస్ వద్ద ఎదురుగా వస్తోన్న కారు ఢీకొట్టింది. దీంతో కారులోని ఇద్దరి మహిళలు సహా ఐదుగురు చనిపోయినట్టు పోలీసులు తెలిపారు. వీరిలో నలుగురు ఒకే కుటుంబసభ్యులు కాగా.. ఒకరు డ్రైవర్ ఉన్నట్టు తెలిపారు. ప్రమాదం జరిగిన వెంటనే ఇంజిన్‌లో మంటలు చెలరేగి.. కారు కాలిబూడిదయ్యింది. అరగంట పాటు ఫైర్ సిబ్బంది శ్రమించి మంటలను అదుపుచేసి.. లోపలి నుంచి అతికష్టంతో మృతదేహాలను బయటకు తీశారని అన్నారు. ఘటనపై కేసు నమోదుచేసి దర్యాప్తు చేపట్టినట్టు తెలిపారు.

బాధితులను కోయంబత్తూరు జిల్లా కునియముతూరుకు చెందినవారిగా గుర్తించారు. సెల్వరాజ్ (52), అతడి భార్య కాళియరసి, వారి కుమార్తె అగల్య, కుమారుడు అరుణ్‌ కాగా.. కారు నడుపుతోన్న డ్రైవర్ ఈ రోడ్ జిల్లా విల్లరసంపట్టికి చెందిన విష్ణుగా గుర్తించినట్టు కరూర్ జిల్లా కలెక్టర్ తంగవేల్ తెలిపారు. ప్రమాద స్థలిని పరిశీలించిన కలెక్టర్.. బాధిత కుటుంబాలను కలిశారు.