చీపెస్ట్ పర్సనల్ లోన్స్.. టాప్ బ్యాంకుల్లో వడ్డీ రేట్లు ఇలా

మీకు అత్యవసరంగా డబ్బు కావాలి.. ఏం చేస్తారు.. బంధువులనో.. స్నేహితులనో అడుగుతారు. అప్పుడు కూడా దొరక్కపోతే..? తెలిసిన వారి దగ్గర ట్రై చేస్తారు.. అక్కడా లేకుంటే.. నెక్ట్స్ ఆప్షన్ బ్యాంకుల్లో లోన్ తీసుకోవడమే. అవును ఇటీవలి కాలంలో బ్యాంకుల్లో పర్సనల్ లోన్లు తీసుకునే వారి సంఖ్య పెరిగిపోయింది. ఒకప్పటితో పోలిస్తే లోన్ ప్రాసెస్ సింపుల్‌గా ఉండటం.. బ్యాంకులు కూడా వేగంగా డబ్బులు మంజూరు చేస్తుండటం.. పెద్దగా డాక్యుమెంటేషన్ లేకపోవడం వంటివి కారణాలుగా ఉన్నాయి. ఇక్కడ ఏదైనా మెడికల్ ఎమర్జెన్సీ కోసమో.. వెకేషన్లకు వెళ్లాల్సి వచ్చినప్పుడు లేదా ఇంటికి సంబంధించిన పునరుద్ధరణ పనులు.. ఇంట్లో వేడుకలు ఇలా వేటి కోసమైనా పర్సనల్ లోన్ ఉపయోగపడుతుందని చెప్పొచ్చు.

పర్సనల్ లోన్ అనేది అన్ సెక్యుర్డ్ లోన్ అన్న సంగతి తెలిసిందే. అంటే ఇక్కడ మనం గోల్డ్ లోన్ అంటే బంగారం తాకట్టు పెడతాం.. హోం లోన్ కోసం ఆస్తి పత్రాలు పెట్టాల్సి ఉంటుంది. అదే పర్సనల్ లోన్ కోసం హామీగా ఏం ఉండదు. అందుకే ఈ తాకట్టు లేని రుణాల వడ్డీ రేట్లు ఇతర లోన్లతో పోలిస్తే కాస్త ఎక్కువే ఉంటాయి.

ముఖ్యంగా పర్సనల్ లోన్లు తీసుకునే ముందు క్రెడిట్ స్కోరు చూసుకోవాలి. మెరుగైన క్రెడిట్ స్కోరు ఉన్నప్పుడే బ్యాంకుల్లో లోన్లు పొందడం దగ్గర నుంచి .. తక్కువ వడ్డీకే లోన్ వచ్చే అవకాశం ఉంటుంది. సాధారణంగా 750 కంటే ఎక్కువ ఉంటే మెరుగైన క్రెడిట్ స్కోరుగా భావిస్తుంటాయి బ్యాంకులు. ఎక్కువ సిబిల్ స్కోరు ఉంటే వడ్డీ రేట్లు తక్కువగా ఉండి.. అప్పుడు చెల్లించాల్సిన ఈఎంఐ తగ్గుతుందని చెప్పొచ్చు. ఇప్పుడు మనం దేశంలోని ప్రముఖ బ్యాంకుల్లో పర్సనల్ లోన్లపై వడ్డీ రేట్ల గురించి చూద్దాం.

అతిపెద్ద ప్రైవేట్ బ్యాంక్ హెచ్‌డీఎఫ్‌సీ బ్యాంకులో రూ. 40 లక్షల వరకు లోన్ పొందొచ్చు. ఇక్కడ వడ్డీ రేట్లు 10.85 శాతం నుంచి ప్రారంభం అవుతుండగా.. టెన్యూర్ ఐదేళ్ల వరకు పెట్టుకోవచ్చు. ఐసీఐసీఐ బ్యాంకులో రూ. 50 లక్షల వరకు లోన్ పొందొచ్చు. దీంట్లో కూడా 10.85 శాతం నుంచే వడ్డీ రేట్లు ప్రారంభం అవుతున్నాయి. ఆరేళ్ల టెన్యూర్ పెట్టుకోవచ్చు. కోటక్ మహీంద్రా బ్యాంకులో రూ. 35 లక్షల వరకు లోన్ తీసుకోవచ్చు. ఇక్కడ ఆరేళ్ల టెన్యూర్‌పై వడ్డీ రేట్లు 10.99 శాతం నుంచే మొదలవుతున్నాయి.

ఐడీఎఫ్‌సీ బ్యాంకులో రూ. కోటి వరకు లోన్ పొందొచ్చు. ఇక్కడ ఏడేళ్ల వరకు టెన్యూర్ పెట్టుకోవచ్చు. వడ్డీ రేట్లు 10.99 శాతం నుంచే ప్రారంభం అవుతున్నాయి. ఇక యాక్సిస్ బ్యాంకులో చూస్తే 11.10 శాతం నుంచి ప్రారంభం అవుతున్నాయి. టెన్యూర్ ఏడేళ్ల వరకు ఉంటుంది. రూ. 40 లక్షల వరకు లోన్ పొందే వెసులుబాటు ఉంది.