మఖానా లేదా వేరుశెనగ రెండింటిలో ఏది బెస్ట్

మారుతున్న జీవనశైలి, బిజీ షెడ్యూల్ కారణంగా ఈ రోజుల్లో చాలా మంది అనేక సమస్యలు ఎదుర్కొంటున్నారు. రోజంతా ఆఫీస్‌లో ల్యాప్‌టాప్ లేదా కంప్యూటర్ స్క్రీన్ ముందు కూర్చోవడం వల్ల ఊబకాయం బారిన పడుతున్నారు. చిన్న వయసులోనే బెల్లీ ఫ్యాట్ సమస్య ఎదుర్కొంటున్నారు. ఊబకాయం అనేక తీవ్రమైన వ్యాధులకు కారణమవుతుంది. ఇలాంటి పరిస్థితుల్లో ఆరోగ్యంగా, ‌ఫిట్‌గా ఉండటం కోసం బరువును అదుపులో ఉంచుకోవడం చాలా ముఖ్యం.

ఇక, బరువు పెరగడం లేదా తగ్గడంలో తినే ఆహారం కీలక పాత్ర పోషిస్తుంది. ఏది పడితే అది తింటే అధిక బరువు పెరిగే ప్రమాదముంది. బరువు తగ్గాలనుకునేవారు తమ డైట్‌లో మంచి ఆహారాన్ని భాగం చేసుకోవాలి. కేలరీలు తక్కువగా ఉండేలా చూసుకోవాలి. మఖానా, వేరుశెనగ రెండు ఆరోగ్యానికి చాలా మేలు చేస్తాయి. ఈ రెండింటిలో ఎన్నో పోషకాలు ఉన్నాయి. అయితే, మఖానా లేదా వేరుశెనగ రెండింటిలో ఏది తింటే బరువు తగ్గుతారో ఇక్కడ తెలుసుకుందాం.

మఖానా పోషకాల ఖజానా

​మఖానాను ఫాక్స్ నట్స్ లేదా లోటస్ సీడ్స్ అని పిలుస్తారు. ఇది ఒక పోషకమైన, తక్కువ కేలరీల చిరుతిండి. బరువు తగ్గడానికి ఇది బెస్ట్ ఆప్షన్. మఖానాలో కేలరీలు తక్కువగా ఉంటాయి. కానీ ఫైబర్, ప్రోటీన్, యాంటీఆక్సిడెంట్లు పుష్కలంగా ఉంటాయి. అంతేకాకుండా మెగ్నిషియం, పొటాషియం వంటి అవసరమైన పోషకాలు కూడా ఉన్నాయి. ఇవన్నీ రోగనిరోధక శక్తిని పెంచుతాయి. అందుకే దీన్ని సూపర్ ఫుడ్ అంటారు.

మఖానాతో ప్రయోజనాలు

* తక్కువ కేలరీలు - 100 గ్రాముల మఖానాలో దాదాపు 350 కేలరీలు ఉంటాయి. బరువు తగ్గాలని ప్రయత్నిస్తున్న వారికి ఇది మంచి ఎంపిక.

* అధిక ఫైబర్ - మఖానాలో ఫైబర్ అధికంగా ఉంటుంది. ఇది జీర్ణక్రియకు సాయపడుతుంది. మఖానా తినడం వల్ల ఎక్కువసేపు కడుపు నిండిన అనుభూతి కలుగుతుంది. దీనివల్ల అదనపు కేలరీల తీసుకోవడం తగ్గుతుంది.

* ప్రోటీన్ అధికంగా ఉంటుంది - మఖానాలో మంచి మొత్తంలో ప్రోటీన్ కూడా ఉంటుంది. ఇది కండరాలను నిర్మించడంలో, జీవక్రియను పెంచడంలో సాయపడుతుంది.

* గ్లూటెన్-రహిత, తక్కువ గ్లైసెమిక్ ఇండెక్స్ - మఖానా గ్లూటెన్-రహిత, తక్కువ గ్లైసెమిక్ ఇండెక్స్‌ను కలిగి ఉంటుంది. ఇది రక్తంలో చక్కెర స్థాయిలను అదుపులో ఉంచుతుంది.

వేరుశెనగలో పోషకాలు మెండు

​వేరుశనగను సామాన్యుడి జీడిపప్పు అని అంటూ ఉంటారు. ఇది అనేక పోషకాలు ఉంటాయి. గుప్పెడు పల్లీలు తింటే శరీరానికి ఎనర్జీ వస్తుంది. వేరుశనగలో లిపిడ్లు, ఫాస్పరస్, ప్రొటీన్లు, విటమిన్లు, ఫైబర్, పొటాషియం, కాపర్‌, ఐరన్‌, సెలీనియం, జింక్‌, కాల్షియం వంటి పోషకాలు పుష్కలంగా ఉన్నాయి. అందుకే ఇవి హెల్తీ స్నాక్స్‌లో ఒకటి. ఎముకల బలంగా ఉండటానికి, గుండె ఆరోగ్యంగా ఉండేందుకు వేరుశెనగ సాయపడుతుంది.

వేరుశెనగతో ప్రయోజనాలు

* అధిక కేలరీలు - 100 గ్రాముల వేరుశెనగలో దాదాపు 567 కేలరీలు ఉంటాయి. ఇది మఖానా కంటే చాలా ఎక్కువ.

* ఆరోగ్యకరమైన కొవ్వులు - వేరుశెనగలో మోనోఅన్‌శాచురేటెడ్, పాలీఅన్‌శాచురేటెడ్ కొవ్వులు ఉంటాయి. ఇవి గుండెకు మేలు చేస్తాయి. కానీ అధిక మొత్తంలో కొవ్వులు కేలరీల సంఖ్యను పెంచుతాయి.

* ప్రోటీన్, ఫైబర్ - వేరుశెనగలో మంచి మొత్తంలో ప్రోటీన్, ఫైబర్ ఉంటాయి. వీటిని తినడం వల్ల ఆకలి నియంత్రణలో ఉంటుంది.

* విటమిన్లు, ఖనిజాలు- వేరుశెనగలో శరీరానికి అవసరమైన విటమిన్ ఈ, బీ విటమిన్లు, మెగ్నీషియం, ఫాస్ఫరస్ వంటి పోషకాలు పుష్కలంగా ఉంటాయి. ఇవి ఆరోగ్యానికి ఎంతో మేలు చేస్తాయి.

బరువు తగ్గడానికి ఏది బెస్ట్?

మఖానా, వేరుశెనగ రెండూ బరువు తగ్గడానికి ప్రయోజనకరంగా ఉంటాయి. అయితే, ఈ రెండింటిలో మఖానా మెరుగైన ఎంపిక. ఎందుకంటే మఖానాలో కేలరీలు తక్కువగా ఉంటాయి. ఫైబర్, ప్రోటీన్లు పుష్కలంగా ఉంటాయి. ఇవి బరువు తగ్గడానికి బాగా సాయపడతాయి. అదే వేరుశెనగలో కేలరీలు, కొవ్వులు ఎక్కువగా ఉంటాయి. వీటిని మితంగా తీసుకుంటే ఆరోగ్యానికి మేలు జరుగుతుంది. బరువు కూడా తగ్గవచ్చు. కానీ, ఎక్కువగా తీసుకుంటే మాత్రం బరువు తగ్గడం కష్టమంటున్నారు నిపుణులు.