కుండీలోనే బాదం మొక్కను సులభంగా పెంచుకోవచ్చు

చాలా మందికి గార్డెనింగ్ అంటే ఇష్టం. రకరకాల మొక్కల్ని ఇంట్లో పెంచుకుంటారు. బాదం మొక్కను కూడా ఇంట్లోనే పెంచుకోవచ్చని మీకు తెలుసా? పంజాబ్‌కు చెందిన సోషల్ మీడియా ఇన్‌ఫ్లుయెన్సర్, యూట్యూబర్ భవ్య, బాదం విత్తనాల్ని తయారు చేయడం నుంచి మొక్కను పెంచడం వరకు ఏం చేయాలో వివరించారు.

డ్రై ఫ్రూట్స్‌లో ముఖ్యంగా ఎక్కువ మంది బాదం పప్పును తింటున్నారు. బాదం పప్పు తినడానికి రుచిగా ఉంటుంది. చిన్నా, పెద్దా తేడా లేకుండా చాలా మంది దీన్ని ఇష్టంగా తింటారు. అంతేకాకుండా బాదం పప్పు వల్ల ఎన్నో ఆరోగ్య ప్రయోజనాలు ఉన్నాయి. బాదం పప్పును నానబెట్టి తినడం వల్ల శరీరానికి ఎంతో మేలు జరుగుతుంది. కానీ డిమాండ్ ఎక్కువగా ఉండటం వల్ల ధర కూడా చాలా ఎక్కువగా ఉంటుంది. బాదం పప్పులను ఇష్టపడినప్పటికీ, ధరలు ఎక్కువగా ఉండటం వల్ల చాలా మంది వాటిని కొనలేరు.

ఇక, చాలా మందికి గార్డెనింగ్ అంటే ఇష్టం. రకరకాల మొక్కల్ని ఇంట్లో పెంచుకుంటారు. బాదం మొక్కను కూడా ఇంట్లోనే పెంచుకోవచ్చని మీకు తెలుసా? పంజాబ్‌కు చెందిన సోషల్ మీడియా ఇన్‌ఫ్లుయెన్సర్, యూట్యూబర్ భవ్య, బాదం విత్తనాల్ని తయారు చేయడం నుంచి మొక్కను పెంచడం వరకు ఏం చేయాలో వివరించారు. మీరు కూడా ఈ చిట్కాలతో సులభంగా బాదం మొక్కను ఇంట్లోనే పెంచుకోవచ్చు. బాదం మొక్కను ఇంట్లోనే ఎలా పెంచుకోవాలో ఇక్కడ తెలుసుకుందాం.

విత్తనాల్ని ఇలా సిద్ధం చేసుకోండి

ఒక కుండీలో బాదం మొక్కను పెంచాలంటే, ముందుగా విత్తనాలను సిద్ధం చేయాలి. ఇందుకోసం 5 నుంచి 6 మంచి నాణ్యమైన బాదంపప్పులను తీసుకొని , వాటిని ఒక కాటన్ గుడ్డ మీద ఉంచండి. ఆ తర్వాత వాటిపై నీటిని స్ప్రే చేసుకోండి లేదా చల్లుకోండి. ఆ తర్వాత బాదం పప్పుల్ని గుడ్డలో మడిచి గాలి చొరబడని కంటైనర్‌లో ఉంచండి. బాదంపప్పులు మొలకెత్తేవరకు వాటిని భద్రంగా ఉంచండి.

మట్టిని సిద్ధం చేసుకోండి

బాదం మొలకెత్తే సమయానికి, మీరు పెద్ద సైజు కుండీ కోసం మట్టిని సిద్ధం చేసుకోవాలి. ఏదైనా మొక్కను పెంచాలంటే నేల శుభ్రంగా ఉండటం చాలా ముఖ్యమని గుర్తుంచుకోండి. ఇది జరగకపోతే మొక్క ఎండిపోతుంది. కాబట్టి, నేలలో ఉన్న మురికిని శుభ్రం చేసి ఎండలో ఉంచాలి. మీరు 70 శాతం మట్టి, 30 శాతం సహజ ఎరువుతో తయారు చేసిన మట్టిని ఉపయోగించవచ్చు. నల్ల మట్టి అయితే మంచి ఆప్షన్.

విత్తనాల్ని ఇలా నాటండి

బాదం గింజలు మొలకెత్తినప్పుడు, మీరు వాటిని మట్టిలో నాటవచ్చు. మొలకెత్తిన బాదం గింజలను 2 నుంచి 3 అంగుళాల లోతులో నాటాలి. విత్తనంలో మొలకెత్తిన భాగం క్రిందికి ఉండేలా చూసుకోండి. మొలకెత్తిన విత్తనాలు నాటిన తర్వాత నీరు పోయడం మర్చిపోకండి. ఇక, ఇన్‌ఫ్లుయెన్సర్ భవ్య ప్రకారం ఒక ప్లాస్టిక్ పాత్రలో ఆ విత్తనాల్ని కవర్ చేయండి. ఆ తర్వాత కుండీని తగినంత సూర్యకాంతి పొందే ప్రదేశంలో ఉంచండి.

బాదం మొక్కను పెంచే పద్ధతి

ఈ విషయాలను గుర్తుంచుకోండి

* బాదం మొక్కకు రోజుకు రెండుసార్లు నీరు పెట్టాలి.

* బాదం మొక్కకు 6 నుంచి 8 వారాల వ్యవధిలో ఎరువులు వేయాలి.

* మీరు విత్తనాల కోసం విరిగిన బాదం పప్పును వాడకూడదు. పూర్తి బాదం గింజని మాత్రమే విత్తనాల కోసం వాడండి.

* మొక్కకు బాదం కాయలు రావడానికి కనీసం 4 నుంచి 5 ఏళ్లు పడుతుంది. కాబట్టి కొంచెం ఓపిక పట్టండి.