వస్తువులు నల్లగా మారాయా, ఇంట్లోని పదార్థాలతోనే క్లీన్ చేస్తే కొత్తవాటిలా మెరుస్తాయ్

వెండిపట్టీలు, వెండి రింగ్స్, వెండి వస్తువులు ఇలా ఇంట్లో చాలా వస్తువులనే వాడతాం. అయితే, వీటిని ఎక్కువగా వాడడం వల్ల గాలి, నీరు, ఇతర కెమికల్స్ కారణంగా అవి రంగు మారతాయి. ఇలాంటి వాటిని మనం ఎంత తోమినా ముందులా కొత్తవాటిలా మెరవవు. అయితే, కొన్నిసార్లు కొన్ని కెమికల్స్ వాడితే తెల్లగా వస్తాయి. కానీ, ఆ తర్వాత అవి వాటి మెరుపుని కోల్పోతాయి. అలా కాకుండా ఇంట్లోనే కొన్ని వాడి క్లీన్ చేస్తే వెండి వస్తువులు తిరిగి తెల్లగా మారతాయి. అవేంటో తెలుసుకోండి.

శనగపిండి, పసుపు

ఈ రెండింటి కలయిక కూడా వెండి వస్తువుల్ని చక్కగా మెరిపిస్తాయి. అంతేకాకుండా వాటికి చక్కని కళ తసీుకొస్తాయి. రెండింటిని సమాన పరిమాణంలో తీసుకుని కొద్దిగా నీటితో పేస్టులా చేయండి. వీటిని వెండి వస్తువులపై రాసి రుద్దుతూ క్లీన్ చేయాలి. దీని వల్ల మురికి తొలగిపోయి కొత్తవాటిలా మారతాయి.

టూత్‌పేస్ట్

టూత్‌పేస్ట్, పౌడర్‌ని వాడి కూడా మనం వెండి వస్తువుల్ని క్లీన్ చేయొచ్చు. అయితే వీటిని వాడినప్పుడు కొన్నిసార్లు వస్తువులు నల్లగా మారే అవకాశం ఉంది. కాబట్టి కొద్దిగా ప్యాచ్ టెస్ట్ చేసి ఆ తర్వాత వాడండి. పేస్ట్‌ని లేదా పౌడర్‌ని నీటితో కలిపి పేస్టులా చేసి వస్తువులకి కొద్దిగా రుద్దండి. కొన్ని నిమిషాల తర్వాత వీటిని చక్కగా స్క్రబ్ చేస్తూ క్లీన్ చేయండి. ఇలా చేయడం వల్ల కూడా వస్తువులు కొత్తగా మెరుస్తాయి.

రాతి ఉప్పు, నిమ్మరసం

రాళ్ల ఉప్పు, నిమ్మరసం మిశ్రమం కూడా వెండి వస్తువుల్ని తెల్లగా మెరిపిస్తాయి. దీనికోసం ఓ పాత్రలో కొద్దిగా రాళ్ల ఉప్పు వేసి దానికి తగినంత నిమ్మరసం కలపండి. ఈ మిశ్రమాన్ని బ్రష్‌తో వెండివస్తువల్ని క్లీన్ చేయండి. తర్వాత కాసేపటికి నీటితో క్లీన్ చేసి ఆరబెట్టండి. ఇలా చేస్తే కొత్తవాటిలా వెండి వస్తువులు మెరుస్తాయి.

అల్యూమినియం ఫాయిల్‌తో

ఓ గిన్నెలో అల్యూమినియం ఫాయిల్ వేసి గోరువెచ్చని నీరు, బేకింగ్ సోడా వేసి అందులో వెండి వస్తువులని వేసి కాసేపు ఉంచండి. అల్యూమినియం, వెండి మధ్య కాస్తా కెమికల్ రియాక్షన్ జరిగి మచ్చలు తొలగిపోతాయి. అయితే, వీటిని మరి గట్టిగా రుద్దొద్దు. నీటికింద క్లీన్ చేస్తే చాలు.

బేకింగ్ సోడా పేస్ట్

ఇది చాలా మంచి ఎఫెక్టివ్‌గా పనిచేస్తుంది. పైగా అందరికీ ఇష్టమైనది ఏంటంటే చాలా తక్కువ ఖర్చుతో వెండి వస్తువులని తళతళ మెరిపించొచ్చు. దీనికోసం మనం బేకింగ్ సోడాని నీటితో కలిపి పేస్టులా చేయాలి. దీనిని వెండి వస్తువులపై రాసి కాసేపు ఉంంచాలి. తర్వాత సాఫ్ట్ స్క్రబ్బర్‌తో రుద్దండి. నీటితోనే కడిగి ఆరబెట్టండి. చూడండి. వెండి వస్తువులు తళతళగా మెరుస్తాయి.