నూజివీడుపై పీట ముడి..! టీడీపీ గుర్తు ఎవరికి..?

ఎన్నికల షెడ్యూల్‌ ఊహించని విధంగా ముందుకు రావడంతో పాటు ఎన్నికల సమరానికి సమయం తక్కువగా ఉండ టంతో పెండింగ్‌లో ఉన్న అభ్యర్థిత్వాలను ఖరారు చేసే కార్యక్రమాన్ని టీడీపీ వేగవంతం చేసింది. అభ్యర్థుల వెదుకులాట, ప్రయోగాలపై విశ్లేషించి నిర్ణయం తీసుకునే సమయం లేకపోవడం కొందరు అభ్యర్థులకు వరంగా మారనుంది. అయితే రాష్ట్ర అగ్రనేతలు అభ్యర్థుల గెలుపు విషయంపైనే ప్రధానంగా దృష్టి సారిస్తున్నారు. జిల్లాలో నూజివీడు, కైకలూరు, గుడివాడ, పామర్రు, తిరువూరు పెండింగ్‌లో ఉండగా, గుడివాడ అభ్యర్థిని ఖరారు చేశారు. వీటిలో పామర్రు, తిరువూరు ఎస్సీ కాగా, మిగిలిన నూజివీడు, కైకలూరు, పెడన ఓసీ సెగ్మెంట్‌లు. వీటిలోనే బీసీలకు కూడా టికెట్‌ కేటాయించాల్సి ఉంది. ఈ మూడు సెగ్మెంట్‌ల టికెట్‌ రేస్‌లో ముందు వరుసలో ఉంది బీసీలే.నూజివీడు టీడీపీ అభ్యర్థిత్వం నేడు ఖరారు కానుందా? అంటే అవుననే సమాధానం వినిపిస్తోంది. మంగళవారం ఉదయం పార్టీ రాష్ట్ర కమిటీ ముందు హాజరు కావాలని నూజివీడు ఇన్‌చార్జి ముద్దరబోయిన వెంకటేశ్వరరావు, మార్కెటింగ్‌ కమిటీ చైర్మన్‌ కాపా శ్రీనివాసరావు, నియోజక వర్గంలోని జడ్పీటీసీ, ఎంపీటీసీ సభ్యులు కలిసి మొత్తం పది మందికి ఆదేశాలు అందాయి. కేంద్ర మాజీమంత్రి సుజనాచౌదరి, ఎమ్మెల్సీ బుద్దా వెంకన్న, మంత్రి యనమల రామకృష్ణుడు, దశరథ జనార్ధన్‌లతో ఏర్పడిన కమిటీ, పెండింగ్‌లో ఉన్న అసెంబ్లీ స్థానాలపై నియోజకవర్గ నాయకులతో చర్చించి, అభ్యర్థులపై తుది నిర్ణయం తీసుకోనుంది. అభ్యర్థి ఆర్థిక, అంగబలాలను కమిటీ విచారించి, అభ్యర్థిత్వాన్ని ఖరారు చేస్తున్నట్లు సమాచారం.
ఒకవేళ ఈ మూడు సెగ్మెంట్‌లలో రెండు బీసీలకు కేటాయిస్తే, మిగిలిన ఒకటి ఓసీలకు మిగులుతుంది. అది ఏ నియోజకవర్గం అనేది ప్రస్తుతం జిల్లావ్యాప్తంగా చర్చనీయాంశమైంది. నూజివీడు టికెట్‌ తనకే దక్కుతుందని ముద్దరబోయిన వెంకటేశ్వరరావు ఆశాభావంతో ఉన్నారు. దీంతో నియోజకవర్గ ముఖ్య నాయకులను తీసుకుని కమిటీ ముందు హాజరుకానున్నారు. నూజివీడు టికెట్‌ విషయంలో ఏర్పడిన సందిగ్ధత ఏ క్షణమైనా తొలగిపోతుందని ఆశ పడుతున్నారు.