ఐపీఎల్‌లో గోదారోళ్ల క్యాస్ట్ ఫీలింగ్ ,,,నెట్టింట వైరల్ అవుతున్న వీడియో

తెలుగు వాడు ఏ గొప్ప స్థాయికి వెళ్లినా గూగుల్‌లో వాడి క్యాస్టే సెర్చింగ్ అవుతుంది. పీవీ సింధు, నితీష్ కుమార్ రెడ్డి ఇన్సిడెంట్లే ప్రత్యక్ష ఉదాహరణలు. ఇప్పుడు ఐపీఎల్‌కు కూడా అది అంటుకుంది. మంబై ఇండియన్స్ తరఫున ఆడుతున్న పెనుమత్స సత్యనారాయణ రాజు వీడియో ఒకటి ఇప్పుడు సోషల్ మీడియాలో ట్రెండింగ్ అవుతుంది.

ఐపీఎల్‌ 2025లో తెలుగు కుర్రాడు అయిన సత్యనారాయణ రాజును ముంబై ఇండియన్స్ ఫ్రాంచైజీ రూ.30 లక్షలకు కొనుగోలు చేసింది. ఫాస్ట్ బౌలర్ అయిన సత్యనారాయణ రాజుతో ముంబై ఇండియన్స్ తన మొదటి రెండు మ్యాచ్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌లలో బౌలింగ్ చేయించింది. చెన్నై సూపర్ కింగ్స్‌పై ఒక్క ఓవర్ వేసిన రాజు 13 పరుగులు ఇచ్చాడు. గుజరాత్ టైటాన్స్‌పై మూడు ఓవర్లు వేసి 40 పరుగులు ఇచ్చి ఒక వికెట్ తీసుకున్నాడు.

అయితే, తాజాగా సత్యనారాయణ రాజు వీడియో ఒకటి నెట్టింట వైరల్ అయింది. సత్యనారాయణ రాజు కోసం వచ్చామంటూ గోదావరి జిల్లాలకు చెందిన ఒకరు వీడియో తీసి సోషల్ మీడియాలో పోస్ట్ చేశారు. అయితే, అది కాస్త క్యాస్ట్ ఫీలింగ్ లెక్కలోకి వెళ్లింది. ఆ వీడియో కింద సోషల్ మీడియాలో మన కులపోడే అంటూ కామెంట్స్ చేయడం మొదలు పెట్టారు. మరికొందరు అయితే ఇంక మీరు మారరా అంటూ చీవాట్లు పెట్టారు.

"హలో హలో పెనమత్స, పెనుమత్సా.. రాజులం బాబూ రాజులం. ఈస్ట్, వెస్ట్ రాజులం. నీ కోసం, తిలక్ కోసం వచ్చాం. బోల్డు డబ్బులు పెట్టి.. పన్నెండు వేలు పెట్టాం మనిషికి. వైజాగ్ ఎమ్మెస్కే ఫ్రెండ్, ఇద్దరు కాకినాడ. ఈ స్టేడియం మొత్తం మనమే కట్టాం, ఎయిర్‌పోర్ట్ కూడా మనమే కట్టాం" అంటూ ఆ వీడియో తీసిన వ్యక్తి సత్యనారాయణ రాజుతో సంభాషించాడు.

సత్యనారాయణ రాజుతో ఫొటోలు దిగేందుకు అక్కడున్న వాళ్లు ఆసక్తి చూపారు. ఆడపిల్లలు అడగడంతో కాదనలేకపోయిన సత్యనారాయణ రాజు ఇక్కడ తీసుకోవడం కుదరదు, అటు ముందుకు రావాలని చెప్పాడు. మన తెలుగోడు అన్న సంతోషం కంటే మన కులపోడు అనేసి అందర్నీ కొంచెం బాధకు గురి చేశారు.