పంజాబ్ హిట్టర్లు అవుట్,,,టాప్ ఆర్డర్‌లో సెంచరీతో ప్రియాన్షు ఆర్య

ఐపీఎల్ 2025లో పంజాబ్ కింగ్స్ థ్రిల్లింగ్ విక్టరీ నమోదు చేసింది. ఆఖరి వరకూ ఉత్కంఠ‌గా సాగిన ఈ మ్యాచ్‌లో చెన్నై సూపర్ కింగ్స్ 18 పరుగుల తేడాతో ఓటమిపాలయింది. పంజాబ్ కింగ్స్ భారీ స్కోర్ చేసినప్పటికీ ఒక్క ప్రియాన్షు ఆర్య తప్ప నిలకడగా క్రీజులో నిల్చున్న టాప్ ఆర్డర్ ఆటగాళ్లు ఎవ్వరూ లేరు. కానీ ఆఖరి ఆరు ఓవర్లలో వికెట్ పడకుండా పంజాబ్‌ని కింగ్‌గా నిలిపింది మాత్రం ఆ ఇద్దరు ఆటగాళ్లే.

టాస్ గెలిచిన పంజాబ్ కింగ్స్ జట్టు కెప్టెన్ శ్రేయాస్ అయ్యర్ బ్యాటింగ్ ఎంచుకున్నాడు. ఓపెనర్ ప్రియాన్షు ఆర్య మొదటి బంతి నుంచే విధ్వంసం సృష్టించగా.. మిగతా బ్యాటర్లు కనీసం పట్టుమని పది బంతులు కూడా ఆడలేకపోయారు. ప్రభుసిమ్రాన్ సింగ్ డకౌట్ కాగా, కెప్టెన్ శ్రేయాస్ అయ్యర్ ఖలీల్ అహ్మద్ బౌలింగ్‌లో క్లీన్ బౌల్డ్ అయ్యాడు. మార్కస్ స్టాయినీస్, నేహాల్ వధేరా, మ్యాక్స్‌వెల్ లాంటి స్టార్ బ్యాటర్లు ఇలా వచ్చి అలా పెవిలియన్‌కు వెళ్లారు.

ప్రభుసిమ్రాన్ సింగ్ 2 బంతుల్లో 0 పరుగులు, శ్రేయాస్ అయ్యర్ 7 బంతుల్లో ఒక సిక్సర్‌తో 9 పరుగులు, మార్కస్ స్టాయినీస్ 7 బంతుల్లో 4 పరుగులు, నేహాల్ వధేరా 7 బంతుల్లో ఒక సిక్సర్‌తో 9 పరుగులు, గ్లెన్ మ్యాక్స్‌వెల్ 2 బంతుల్లో 1 పరుగు మాత్రమే చేశారు. 8 ఓవర్లకే పంజాబ్ కింగ్స్ సగం ఖాళీ అయింది. 83 పరుగులకే టాప్ ఆర్డర్ మొత్తం కుప్పకూలింది.

నిలబెట్టిన శశాంక్ సింగ్

తొమ్మిదో ఓవర్‌లో గ్రౌండ్‌లోకి వచ్చిన శశాంక్ సింగ్ ఆఖరి ఓవర్ వరకూ క్రీజులోనే కొనసాగాడు. ఎక్కువ ఓవర్లు తక్కువ వికెట్లు ఉండటంతో స్టాండర్డ్ గేమ్‌తో రాణించాడు. ప్రియాన్షు ఆర్య సెంచరీ చేసే వరకూ అతనికి స్ట్రయికింగ్ ఇస్తూ సింగిల్స్‌తో స్కోర్ బోర్డును ముందుకు నడిపించాడు. 14వ ఓవర్‌లో ప్రియాన్షు ఆర్య వికెట్ కోల్పోయింది. దాంతో పంజాబ్ 154 పరుగులకే ఆరు వికెట్లు కోల్పోయింది.

రాణించిన మార్కో యాన్సన్

ప్రియాన్షు ఆర్య అవుటైన తర్వాత క్రీజులోకి వచ్చిన మార్కో యాన్సన్ తనదైన స్టయిల్‌లో స్కోర్ బోర్డును పరుగులు పెట్టించాడు. ఆఖరి ఆరు ఓవర్లలో శశాంక్ -యాన్సన్ కలిసి 60కి పైగా పరుగులు జోడించారు. శశాంక్ సింగ్ 36 బంతుల్లో 2 ఫోర్లు, మూడు సిక్సర్లతో 52, మార్కో యాన్సన్ 19 బంతుల్లో రెండు ఫోర్లు, రెండు సిక్సర్లతో 34 పరుగులతో నాటౌట్‌గా నిలిచి పంజాబ్ కింగ్స్‌కి 219 పరుగులను అందించారు.