ప్రియురాలిని సూట్‌కేస్‌లో కుక్కి తీసుకెళ్లింది ప్రియుడు కాదు

ప్రియురాలిని సూట్‌కేస్‌లో కుక్కి ఎవరి కంటా పడకుండా తన హాస్టల్ గదికి తీసుకెళ్తుండగా.. ఓ విద్యార్థి పట్టుబడినట్లు పెద్ద ఎత్తున వార్తలు వచ్చాయి. ఇందుకు సంబంధించిన వీడియో కూడా నెట్టింట తెగ వైరల్ అయింది. శనివారం రోజు సూట్‌కేసులో ప్రియురాలిని కుక్కి ఓ యూనివర్సిటీ అబ్బాయి బాయ్స్ హాస్టల్‌కు తీసుకెళ్లగా.. పట్టుబడ్డాడంటూ పెద్ద ఎత్తున వార్తలు వచ్చాయి. అయితే అందుకు సంబంధించిన వీడియో కూడా వైరల్ కాగా అంతా నిజమేనని అనుకున్నారు. కానీ తాజాగా యూనివర్సిటీ గట్టి షాక్ ఇచ్చింది. అమ్మాయిని సూట్‌కేసులో కుక్కిన విషయం వాస్తవమే అయినా అది చేసింది ప్రియుడు కాదని చెప్పింది. అలాగే ఈ ఘటన అబ్బాయిల హాస్టల్లో జరగలేదని.. కాలేజీ బిల్డింగులోనే చోటు చేసుకున్నట్లు వివరించింది. మరి ఇదంతా ఎవరు చేశారు, ప్రియుడు కాకపోతే అమ్మాయిని సూట్‌కేసులో బంధించింది ఎవరో మనం ఇప్పుడు తెలుసుకుందాం.

హరియాణాలోని సోనిపత్‌లో ఉన్న జిందాల్ విశ్వవిద్యాలయంలో ఈ ఘటన జరిగింది. సాధారణంగా బాయ్స్ హాస్టల్‌కు అమ్మాయిలను తీసుకెళ్లడం కుదరదు. కానీ ఓ అబ్బాయి మాత్రం తన గర్ల్ ఫ్రెండ్‌ను ఓ సూట్‌కేసులో కూర్చోబెట్టి బాయ్స్ హాస్టల్‌కు తీసుకెళ్లడానికి ప్రయత్నించాడు. ఇందుకు సంబంధించి వీడియో ఒకటి నిన్నటి నుంచి సామాజిక మాధ్యమాల్లో తెగ వైరల్ అయ్యింది. తాజాగా సదరు జిందాల్ యూనివర్సిటీ అధికారులు ఈ వైరల్ అవుతున్న వీడియోపై స్పందించారు. అబ్బాయి సూట్‌కేసులో అమ్మాయిని హాస్టల్‌కు తీసుకువెళ్తుండగా పట్టుబడినట్లు వస్తున్న వార్తల్లో నిజం లేదని స్పష్టం చేశారు.

బాయ్స్ ఎవరూ ఇలా సూట్‌కేసులో తన గర్ల్ ఫ్రెండ్‌ను తీసుకెళ్లలేదని చెప్పుకొచ్చారు. యూనివర్సిటీ హాస్టల్‌లో కొంత మంది అమ్మాయిలే సరాదాగా ఇలా ప్రాంక్ చేశారని పేర్కొన్నారు. కొందరు విద్యార్థినులు సరదాగా చేసిన పనిగా గుర్తించారని చెప్పారు. వీడియో వైరల్ అవ్వగానే ఉన్నతాధికారులు దర్యాప్తు ప్రారంభించారని, విద్యార్థులతో, సెక్యూరిటీతో మాట్లాడిన అనంతరం ఇది అమ్మాయిలు చేసిన ప్రాంక్ గా తేలినట్లు యూనివర్సిటీ చీఫ్ కమ్యూనికేషన్స్ ఆఫీసర్ అంజూ మోహన్ ప్రకటన విడుదల చేశారు.

అమ్మాయిలే మరో అమ్మాయిని సూట్‌కేసులో కూర్చోబెట్టి క్యాంపస్‌లోని మైదానానికి, మేడ మీదకు తీసుకెళ్లారని, ఇది గమనించిన సెక్యూరిటీ సిబ్బంది వారిని ఆపి తనిఖీ చేయగా అందులో నుంచి అమ్మాయి వచ్చినట్లు తెలిపారు. ఈ వీడియో సామాజిక మాధ్యమాల్లో తప్పుగా వైరల్ అయినట్లు చెప్పారు. ఈ విధంగా ప్రవర్తించిన విద్యార్థులకు యూనివర్సిటీ క్రమ శిక్షణణా కమిటీ నోటీసులు జారీ చేసినట్లు పేర్కొన్నారు. దీనిపై ఒక్కొక్కరూ ఒక్కో విధంగా స్పందిస్తున్నారు. కావాలనే యూనివర్సిటీ తప్పుడు ప్రకటన చేసిందని కొందరు, అమ్మాయిలకు ఇదేం పిచ్చి అంటూ మరికొందరు తమ మనసులోని భావాలను కామెంట్ల రూపంలో వెల్లడిస్తున్నారు.