వైభవ్‌ సూర్యవంశీ,,,14 ఏళ్లకే ఐపీఎల్‌ అరంగేట్రం

ఇండియన్ ప్రీమియర్ లీగ్‌లో ఓ అరుదైన రికార్డు నమోదైంది. రాజస్థాన్ రాయల్స్‌కు చెందిన వైభవ్ సూర్యవంశీ.. లీగ్‌లో మ్యాచ్ ఆడిన అతి చిన్న వయస్కుడిగా చరిత్ర సృష్టించాడు. ఈ కుర్రాడు కేవలం 14 ఏళ్ల 23 రోజుల వయసులోనే అంతర్జాతీయ క్రికెట్‌లో అరంగేట్రం చేశాడు. దీంతో ఐపీఎల్‌ అతితక్కువ వయసులో మ్యాచ్‌ ఆడిన ప్లేయర్‌గా రికార్డుల్లోకి ఎక్కాడు.

నిజానికి వైభవ్ సూర్యవంశీ.. ఐపీఎల్ 2025 మెగావేలంనే చరిత్ర సృష్టించాడు. 13 ఏళ్ల వయసులోనే అతడు వేలంలోకి వచ్చాడు. అయితే డేవిడ్ వార్నర్, జానీ బెయిర్‌స్టో లాంటి ప్లేయర్లే అన్‌సోల్డ్‌గా మిగిలిన ఈ వేలంలో సూర్యవంశీకి భారీ డిమాండ్ దక్కింది. అతడి కోసం ఫ్రాంఛైజీలు పోటీ పడ్డాయి. రూ.30 లక్షల కనీస ధరతో వేలంలోకి వచ్చిన అతడిని రాజస్థాన్ రాయల్స్‌ రూ. 1.10 కోట్లకు సొంతం చేసుకుంది.

ఇదీ నేపథ్యం..

2011లో బీహార్‌లోని తాజ్‌పుర్ గ్రామంలో సూర్యవంశీ జన్మించాడు. మహేంద్ర సింగ్ ధోనీ నాయకత్వంలో భారత క్రికెట్ జట్టు వన్డే ప్రపంచకప్ విజేతగా నిలిచిన నాటికి వైభవ్ వయస్సు కేవలం 5 రోజులు. ఐపీఎల్ 2008లో ప్రారంభం కాగా.. అప్పటికింకా వైభవ్ పుట్టనేలేదు. ఐపీఎల్ ప్రారంభమైన మూడేళ్లకు జన్మించాడు. సూర్యవంశీ తండ్రి ఒక రైతు. నాలుగేళ్ల వయసులోనే వైభవ్ క్రికెట్ బ్యాట్‌ పట్టగా.. అతడి తండ్రి సంజీవ్ ప్రత్యేకంగా మైదానాన్ని తయారు చేయించారు.

ఆ తర్వాత క్రికెట్‌లో రాణించిన వైభవ్.. పదేళ్లు కూడా నిండకుండానే అండర్-16 జట్టులోకి వచ్చేశాడు. ఈ ఏడాది చెన్నైలో ఆస్ట్రేలియాతో జరిగిన భారత్ అండర్-19 యూత్ టెస్టులో.. 62 బంతుల్లో 104 పరుగులు చేసి క్రికెట్ ప్రపంచాన్ని తన వైపునకు తిప్పుకున్నాడు. దీంతో అండర్‌-19 టెస్టు క్రికెట్‌లో వేగవంతమైన సెంచరీ కొట్టిన భారతీయుడిగా నిలిచాడు.

ఇక వైభవ్ సూర్యవంశీ కంటే ముందు అత్యంత పిన్న వయసులో ఐపీఎల్ అరంగేట్రం చేసిన ప్లేయర్‌గా ప్రయాస్ రే బర్మన్ ఉన్నాడు. అతడు 2019 సీజన్‌లో ఆర్సీబీ తరఫున 16 ఏళ్ల 157 రోజుల వయసులోనే తొలి మ్యాచ్ ఆడాడు.

అతి పిన్న వయసులో ఐపీఎల్‌ అరంగేట్రం చేసిన ఆటగాళ్లు వీరే..

14 ఏళ్ల 23రోజులు - వైభవ్ సూర్యవంశీ, 2025*

16 ఏళ్ల 157 రోజులు - ప్రయాస్ రే బర్మన్, 2019

17 ఏళ్ల 11 రోజులు - ముజీబ్ ఉర్ రెహమాన్, 2018

17 ఏళ్ల 152 రోజులు - రియాన్ పరాగ్, 2019

17 ఏళ్ల 179 రోజులు - ప్రదీప్ సాంగ్వాన్, 2008