ఏడాదిలో 25 శాతం పెరిగిన గోల్డ్ రేటు

 ప్రస్తుతం బంగారం ధరలు భారీగా పెరుగుతున్నాయి. అమెరికా ప్రెసిడెంట్ డొనాల్డ్ ట్రంప్ సుంకాల వల్ల ఏర్పడిన ఆర్థిక అనిశ్చితి, అమెరికా ఆర్థిక వ్యవస్థ మందగమనం చెందుతుందనే భయాలు దీనికి కారణం. ఈ ఏడాది ఇప్పటివరకు ఎంసీఎక్స్ బంగారం ధర దాదాపు 25 శాతం పెరిగింది. గత ఐదేళ్లలోనే (ఏప్రిల్ 17, 2020 నుంచి ఏప్రిల్ 17, 2025 వరకు) రూ. 44,906 నుంచి రూ. 95,239కి చేరుకుని 110 శాతం కంటే ఎక్కువ లాభాన్ని నమోదు చేసింది. అయితే, స్వల్పకాలంలో గణనీయమైన లాభాలు వచ్చినప్పుడు, లాభాల స్వీకరణ జరిగే ప్రమాదం కూడా పెరుగుతుంది. స్టాక్ మార్కెట్ తిరిగి పుంజుకుంటున్న నేపథ్యంలో బులియన్ మార్కెట్‌లో లాభాల స్వీకరణ జరుగుతుందా లేదా రెండు ఆస్తులు ఒకే ధోరణిని కొనసాగిస్తాయా అని ఇన్వెస్టర్లు ఎదురు చూస్తున్నారు.

బంగారం ధరలు ఎందుకు పెరుగుతున్నాయి?

స్వల్పకాలంలో బంగారం ధరలను ప్రభావితం చేసే అంశాలపై హెచ్డీఎఫ్సీ సెక్యూరిటీస్‌లోని కమోడిటీ & కరెన్సీ హెడ్ అనుజ్ గుప్తా మాట్లాడుతూ, "ట్రేడ్ వార్ తీవ్రతరం కావడం, ట్రంప్ సుంకాల వల్ల ఏర్పడిన ఆర్థిక అనిశ్చితి కారణంగా బంగారం ధరలు ఆకాశాన్నంటుతున్నాయి. యూఎస్ ఫెడ్ ఛైర్మన్ జెరోమ్ పావెల్‌తో సహా చాలా మంది ఆర్థికవేత్తలు చెప్పినట్లుగా, ఒక శాతం సుంకాల పెరుగుదల యూఎస్ ఆర్థిక వృద్ధిని దాదాపు 0.10 శాతం తగ్గిస్తుంది; యూఎస్ మాంద్యం వస్తుందని మార్కెట్ భయపడుతోంది. ఈ కారణాల వల్ల సురక్షిత పెట్టుబడి సాధనంగా బంగారం డిమాండ్ పెరిగింది, ఇది ఈ ఏడాది ఇప్పటివరకు బంగారం ధరలు దాదాపు 25 శాతం, గత ఐదేళ్లలో 110% కంటే ఎక్కువ పెరగడానికి దారితీసింది."

బంగారం ధరల్లో భారీ పతనం ఉంటుందా?

స్టాక్ మార్కెట్ ర్యాలీ నేపథ్యంలో బంగారం ధరల దృక్పథం గురించి అనుజ్ గుప్తా మాట్లాడుతూ, "బంగారం ధరలను పెంచిన కారణాలు ఇంకా కొనసాగుతున్నాయి, కాబట్టి భారీ పతనం వచ్చే అవకాశాలు చాలా తక్కువగా ఉన్నాయి. గ్లోబల్ బ్రోకరేజ్ గోల్డ్‌మన్ సాచ్స్ తన బంగారం ధర లక్ష్యాన్ని ఔన్సుకు 3,300 డాలర్ల నుంచి 3,700 డాలర్లకు పెంచింది. అధిక-రిస్క్ సందర్భాల్లో, బంగారం ధర ఔన్సుకు 4,500 డాలర్లను తాకొచ్చని గోల్డ్‌మన్ సాచ్స్ అంచనా వేసింది. కాబట్టి, బంగారం ధరల్లో పెరుగుదల ధోరణి కొనసాగుతుందని భావిస్తున్నారు. బంగారం ధరల్లో ఏదైనా తగ్గుదల.. కొనుగోలు అవకాశంగా చూడాలి."

బంగారం ధర రూ. లక్ష మార్క్ తాకుతుందా?

స్వల్పకాలంలో బంగారం ధరలు రూ. 1 లక్షను తాకుతుందా అనే ప్రశ్నకు మోతీలాల్ ఓస్వాల్‌లో కమోడిటీ & కరెన్సీ రీసెర్చ్ హెడ్ నవనీత్ దమాని మాట్లాడుతూ, "బంగారం ధరల దృక్పథం సానుకూలంగా ఉంది. కొనసాగుతున్న వాణిజ్య ఉద్రిక్తతలు, ద్రవ్యోల్బణ ఒత్తిళ్లు, సెంట్రల్ బ్యాంకుల బంగారం కొనుగోళ్లు ధరలకు మద్దతునిస్తూనే ఉంటాయి. సాంకేతిక స్థాయిలు ఎంసీఎక్స్‌పై రూ. 91,000 వద్ద బలమైన మద్దతును, రూ. 99,000 వద్ద నిరోధాన్ని సూచిస్తున్నాయి. అయితే COMEXపై 3100 డాలర్లు, 3400 డాలర్లు ముఖ్యమైన స్థాయిలు."

బంగారంపై ఇన్వెస్ట్ చేసేవారు 'డిప్స్‌లో కొనండి' అనే వ్యూహాన్ని కొనసాగించాలని మోతీలాల్ ఓస్వాల్‌కు చెందిన నవనీత్ దమాని సూచించారు. అంటే ఇక్కడ రేటు పడుతున్న కొద్దీ కొనాలని, పెట్టుబడులు పెట్టాలని సూచిస్తున్నారన్నమాట. "ప్రపంచ ఆర్థిక వ్యవస్థ విధానపరమైన అనిశ్చితి, వృద్ధి మందగమనం ద్వారా సాగుతున్నందున, బంగారం ఆకర్షణీయమైన ఆస్తి తరగతిగా కొనసాగే అవకాశం ఉంది. విధానపరమైన అనిశ్చితి, ద్రవ్యోల్బణ ఒత్తిళ్లు, అస్థిర భౌగోళిక రాజకీయాల ఆధిపత్యం ఉన్న వాతావరణంలో, బంగారం స్థిరత్వానికి చిహ్నంగా ఉంటుంది. సెంట్రల్ బ్యాంకులు తమ నిల్వలను పెంచుకుంటున్నందున, ఇన్వెస్టర్లు భద్రతను కోరుకుంటున్నందున, బంగారం ప్రాధాన్యత కలిగిన ఆస్తిగా కొనసాగుతుంది. ప్రపంచ వాణిజ్య ఉద్రిక్తతల్లో గణనీయమైన పరిష్కారం లేకపోతే, మధ్య నుంచి దీర్ఘకాలిక దృక్పథంలో 'డిప్స్‌లో కొనండి' అనే అభిప్రాయాన్ని మేము కొనసాగిస్తాము." అని దమాని అన్నారు.

బంగారం ధర ఎంతకు వెళ్లొచ్చు..?

"గోల్డ్‌మన్ సాచ్స్ అంచనా ప్రకారం చూస్తే, బంగారం ధరలు ఏడాది చివరి నాటికి ఔన్సుకు 3,700 డాలర్ల స్థాయిని తాకితే, ఎంసీఎక్స్ బంగారం ధర రూ. 1 లక్ష వద్ద ఉంటుంది. అయితే.. యూఎస్-చైనా వాణిజ్య యుద్ధం మరింత తీవ్రమైతే ఔన్సుకు 4,500 డాలర్లకు చేరి.. అప్పుడ ఎంసీఎక్స్ బంగారం ధర రూ. 1.25 లక్షలను తాకుతుంది. అయితే, స్వల్పకాలిక లక్ష్యాలను చూడాలి. ప్రస్తుత మార్కెట్ దృష్టాంతంలో, బంగారం ధర రూ. 91,000 నుంచి రూ. 97,000 పరిధిలో ఉంది. యూఎస్-చైనా వాణిజ్య ఒప్పంద చర్చల్లో కొంత పురోగతి వచ్చే వరకు పెరుగుదల ధోరణి కొనసాగుతుంది."