స్నేహితుడితో అరవింద్ కేజ్రీవాల్ కుమార్తె వివాహం,,,,కేజ్రీ దంపతులు, పంజాబ్ సీఎం దంపతుల డ్యాన్స్

ఢిల్లీ మాజీ ముఖ్యమంత్రి, ఆమ్‌ ఆద్మీ పార్టీ అధినేత అరవింద్‌ కేజ్రీవాల్‌ ఇంట పెళ్లి భాజాలు మోగాయి. ఆయన కుమార్తె హర్షిత వివాహం.. సంభవ్‌ జైన్‌తో న్యూఢిల్లీలొని కపుర్తలా హౌస్‌లో శుక్రవారం రాత్రి ఘనంగా జరిగింది. ఈ వివాహ వేడుకకు పంజాబ్‌ సీఎం భగవంత్‌ మాన్, ఢిల్లీ మాజీ డిప్యూటీ సీఎం మనీశ్‌ సిసోడియా, పలువురు ఆప్‌ సీనియర్‌ నేతలు, అతికొద్ది మంది సన్నిహితులు హాజరయ్యారు. దీనికి ముందు ఏప్రిల్ 17న గురువారం రాత్రి ఢిల్లీలోని ఓ హోటల్‌లో హర్షిత-సంభవ్‌ నిశ్చితార్థం జరిగింది. ఈ వేడుకలో కేజ్రీవాల్‌, ఆయన భార్య సునీత దంపతులు ‘పుష్ప2’ సినిమాలోని పాటకు డ్యాన్స్ చేశారు. ‘సూసేకీ’ పాట హిందీ వెర్షన్‌కు ఇరువురూ స్టెప్పులేశారు.

పంజాబ్‌ సీఎం భగవంత్‌ మాన్‌ దంపతులు కూడా డ్యాన్స్‌తో ఇరగదీశారు. ప్రస్తుతం ఈ వీడియోలు సోషల్ మీడియాలో తెగ వైరల్‌ అవుతున్నాయి. ఏప్రిల్‌ 20న కేజ్రీవాల్‌ కుమార్తె రిసెప్షన్ ఏర్పాటు చేశారు. సంభవ్‌ జైన్‌, హర్షితలకు కాలేజీలో ఏర్పడిన పరిచయం స్నేహంగా.. తర్వాత ప్రేమగా మారింది. ఇరు కుటుంబాల అంగీకారంతో ఇప్పుడు వివాహ బంధంలోకి ఈ జంట అడుగుపెట్టారు. అయితే, ఈ ఇద్దరూ కలిసి బాసిల్ హెల్త్ పేరుతో ఓ స్టార్టప్‌ను ఏర్పాటుచేశారు. కేజ్రీవాల్‌కు ఇద్దరు పిల్లలు కాగా.. కుమార్తె హర్షిత, కుమారుడు పులకిత్. ప్రస్తుతం పులకిత్ ఐఐటీ ఢిల్లీలో చదువుతున్నారు.

ఇటీవల జరిగిన ఢిల్లీ అసెంబ్లీ ఎన్నికల్లో, కేజ్రీవాల్ నేతృత్వంలోని ఆమ్ ఆద్మీ పార్టీ ఓటమి పాలైంది. న్యూఢిల్లీ స్థానంలో కేజ్రీవాల్ సైతం ఓటమి చవిచూశారు. దాదాపు 30 సంవత్సరాల తర్వాత ఢిల్లీ ఎన్నికల్లో బీజేపీ విజయం సాధించి.. అధికారం చేపట్టింది. సీఎంగా రేఖా గుప్తాను అధిష్ఠానం నియమించింది. కాగా, గతంలో కేజ్రీవాల్ తీసుకున్న పలు నిర్ణయాలను బీజేపీ ప్రభుత్వం సమీక్షిస్తోంది. ప్రభుత్వ ప్రధాన కార్యాలయం పునరుద్ధరణపై కేంద్ర విజిలెన్స్ కమిషన్ విచారణ ఆదేశించింది .. , 2025 మార్చిలో ఢిల్లీ పోలీస్, పబ్లిక్ ప్రాపర్టీ డిఫేస్‌మెంట్ యాక్ట్ ఉల్లంఘనపై కేజ్రీవాల్‌పై ఎఫ్ఐఆర్ నమోదు చేసింది. ఈ కేసు ప్రస్తుతం విచారణలో ఉంది.