ఇంట్లో శవమై కనిపించిన మాజీ డీజీపీ, భార్యపైనే అనుమానాలు

కర్ణాటకలో మాజీ డీజీపీ ఓం ప్రకాష్ అనుమానాస్పద మృతి కలకలం రేపుతోంది. కర్ణాటక డీజీపీగా, ఐజీపీగా పనిచేసి రిటైర్ అయిన ఓంప్రకాష్.. అతని ఇంట్లో శవమై కనిపించారు. బెంగళూరులోని హెచ్ఎస్ఆర్ లేఅవుట్లో‌ని ఆయన నివాసంలో ఓంప్రకాష్ హత్యకు గురయ్యారు. ఆదివారం సాయంత్రం ఈ ఘటన చోటుచేసుకుంది. ఓంప్రకాష్ హత్య కేసులో ఆయన భార్యను ప్రధాన అనుమానితురాలిగా భావిస్తున్నారు. ఓం ప్రకాష్ హత్యకు గురైన విషయాన్ని పోలీస్ కమిషనర్ దయానంద ధ్రువీకరించారు. అయితే ఈ ఘటనకు సంబంధించిన పూర్తి వివరాలు తెలియాల్సి ఉంది.

ఓం ప్రకాష్ మృతదేహాన్ని ఆదివారం సాయంత్రం 5 గంటల 30 నిమిషాల సమయంలో బెంగళూరులోని హెచ్ఎస్ఆర్ లేఅవుట్‌లో ఉన్న ఆయన నివాసంలో గుర్తించారు. రక్తపు మడుగులో ఓం ప్రకాష్ మృతదేహం పోలీసులకు కనిపించింది. ప్రత్యక్ష సాక్షులు చెప్తున్న వివరాల ప్రకారం కర్ణాటక మాజీ డీజీపీ ఓంప్రకాష్‌ను ఆయన భార్యే హత్య చేసినట్లు అనుమానిస్తున్నారు. ఓం ప్రకాష్ శరీరంపై కత్తిపోట్లు ఉన్నట్లు తెలిసింది. అయితే ఈ ఘటనపై తామింకా ప్రత్యక్ష సాక్షులతో మాట్లాడలేదని సీనియర్ పోలీస్ అధికారి ఒకరు వెల్లడించారు. పూర్తి సమాచారం అందిన తర్వాత ఓం ప్రకాష్ మృతిపై మాట్లాడతామని చెప్తున్నారు.

మరోవైపు ఓం ప్రకాష్ భార్య అంతకుముందు ఓ వాట్సప్ మెసేజ్ షేర్ చేసినట్లు తెలిసింది. తన భర్త ఇంట్లో తుపాకీ పట్టుకుని తిరుగుతున్నాడని.. తనను చంపాలనే ఉద్దేశంతో ఉన్నాడని అందులో ఓంప్రకాష్ భార్య పేర్కొన్నట్లు సమాచారం, అయితే ఆమెకు మానసిక ఆరోగ్యం సరిగా లేదని తెలిసింది. దీనిపైనా పోలీసులు ఎలాంటి స్పష్టత ఇవ్వడం లేదు. ఓం ప్రకాష్ భార్యను పోలీసులు విచారిస్తున్నట్లు తెలిసింది.

మరోవైపు 1981 బ్యాచ్ ఐపీఎస్ ఆఫీసర్ అయిన ఓంప్రకాష్.. కర్ణాటక డీజీపీ, ఐజీపీగా పనిచేశారు. రిటైరయ్యే వరకూ సుమారుగా రెండేళ్లు ఆయన ఆ పదవిలో కొనసాగారు. బిహార్‌కు చెందిన ఈయన.. బళ్లారి జిల్లా హరప్పణహళ్లిలో అడిషనల్ ఎస్పీగా తన కెరీర్ ప్రారంభించారు. శివమొగ్గ, ఉత్తర కన్నడ, చిక్కమగళూరు ప్రాంతాల్లో పనిచేశారు. కర్ణాటక లోకాయుక్తగానూ సేవలందించారు. ఫైర్ అండ్ ఎమర్జెన్సీ సర్వీసెస్ అండ్ సీఐడీ డీఐజీగానూ పనిచేశారు. 2015లో కర్ణాటక డీజీపీగా బాధ్యతలు స్వీకరించిన ఆయన.. 2017లో రిటైర్ అయ్యే వరకూ ఆ పదవిలో కొనసాగారు.