5 ఏళ్లలోనే హైరిటర్న్స్.. టాప్-5 లార్జ్ క్యాప్ ఫండ్స్ ఇవే

 మీరు మ్యూచువల్ ఫండ్స్‌లో ఇన్వెస్ట్ చేయాలనుకుంటున్నారా? అందులోనూ లార్జ్ క్యాప్ ఫండ్స్ గురించి చూస్తున్నారా? అయితే, ఈ కథనం మీకోసమే. గడిచిన 5 సంవత్సరాల కాలంలో హైరిటర్న్స్ అందించిందిన టాప్-5 లార్జ్ క్యాప్ ఫండ్స్ గురించి ఇప్పుడు మనం తెలుసుకుందాం. సాధారణంగా ఈక్విటీల్లో ఇన్వెస్ట్ చేయాలనుకునే వారు తమ ఆర్థిక లక్ష్యాలు, రిస్క్ సామర్థ్యం వంటి కీలక అంశాలను పరిగణనలోకి తీసుకోవాలి. తమ లక్ష్యాలకు అనుగుణంగా రిటర్న్స్ అందించే ఫండ్స్ ఎంచుకోవాలి. లార్జ్ క్యాప్ ఫండ్స్‌లో కాస్త రిస్క్ తక్కువ ఉంటుంది. దీర్ఘకాలంలో మంచి రాబడులు అందుతాయి. అలా గత 5 ఏళ్లలో 33 శాతం వరకు రాబడులు అందించిన టాప్-5 పథకాల లిస్ట్ ఇప్పుడు చూద్దాం.

భరత్ 22 ఈటీఎఫ్ ఫండ్ అదరగొట్టింది. తమ ఇన్వెస్టర్లకు ఊహించని రిటర్న్స్ అందించింది. గత 5 సంవత్సరాల కాలంలో ఈ ఫండ్ పని తీరు గమనిస్తే ఏకంగా 33.38 శాతం మేర రాబడులు అందించింది. ఇతర ఫండ్స్‌తో పోలిస్తే ఈ పథకంలో పెట్టుబడి పెట్టిన వారికి అధిక రాబడి అందిందని చెప్పవచ్చు. ఆ తర్వాత ప్రముఖ అసెట్ మేనేజ్మెంట్ కంపెనీ ఐసీఐసీఐ ప్రుడెన్షియల్ ఫండ్స్ నుంచి వచ్చిన ఐసీఐసీఐ ప్రుడెన్షియల్ భరత్ 22 ఫండ్ ఆఫ్ ఫండ్ స్కీమ్ హైరిటర్న్స్ ఇచ్చింది. గత 5 సంవత్సరాల్లో చూస్తే 33.16 శాతం మేర లాభాలు అందించింది.

జాబితాలో ఎస్‌బీఐ స్కీమ్..

గత 5 సంవత్సరాల్లో అదరగొట్టిన లార్జ్ క్యాప్ ఫండ్లలో ప్రముఖ అసెట్ మేనేజ్మెంట్ కంపెనీ ఎస్‌బీఐ మ్యూచువల్ ఫండ్ స్కీమ్ సైతం ఉంది. ఎస్‌బీఐ బీఎస్ఈ సెన్సెక్స్ నెక్ట్స్ 50 ఈటీఎఫ్ ఫండ్ గత 5 సంవత్సరాల్లో మంచి లాభాలు అందించింది. ప్రతి ఏటా సగటున 27.30 శాతం మేర రాబడులు అందించింది.

ఆ తర్వాత యూటీఐ మ్యూచువల్ ఫండ్ తెచ్చిన యూటీఐ బీఎస్ఈ సెన్సెక్స్ నెక్ట్స్ 50 ఈటీఎఫ్ ఫండ్  స్కీమ్ అదరగొట్టింది. గత 5 సంవత్సరాల్లో చూస్తే 27.25 శాతం మేర రాబడులు ఇచ్చింది. ఇక నిప్పాన్ ఇండియా మ్యూచువల్ ఫండ్ అందిస్తోన్న నిప్పాన్ ఇండియా ఈటీఎఫ్ బీఎస్ఈ సెన్సెక్స్ నెక్ట్స్ 50  ఫండ్ గత 5 సంవత్సరాల్లో 27.01 శాతం రాబడులు అందించింది.