ధనిక మహిళలతో రిలేషన్‌షిప్.. నెలకు రూ.6 లక్షల సంపాదన

డబ్బు సంపాదించేందుకు ప్రతీ ఒక్కరు ఏదో ఒక పని చేస్తూ ఉంటారు. కొందరు శారీరకంగా పనిచేస్తే.. మరికొందరు స్మార్ట్ వర్క్ చేసి ఆదాయం పొందుతూ ఉంటారు. ఇక కొందరు ఉద్యోగాలు చేసి డబ్బు సంపాదిస్తే.. మరికొందరు బిజినెస్ చేసి ఆదాయాన్ని సమకూర్చుకుంటారు. చేసే పని ఏదైనా అంతా డబ్బు కోసమే. ఇక కొందరు డబ్బు సంపాదించే విధానం చూసి.. చాలా ఆశ్చర్యం వేస్తూ ఉంటుంది. ఇలా కూడా డబ్బు సంపాదించవచ్చా అనుకునేలా ధనాన్ని ఆర్జించిన వారి గురించి ఇప్పటివరకు చాలా సార్లు విని ముక్కున వేలేసుకున్నాం. అయితే తాజాగా ఈ యువకుడు చేసే పని.. దాని నుంచి సంపాదించే డబ్బు గురించి వింటే మాత్రం మీ కళ్లు గిర్రున తిరుగుతాయి. జపాన్‌కు చెందిన టకుయా ఇకోమా అనే 31 ఏళ్ల యువకుడు.. ధనవంతులైన మహిళలకు ఎమోషనల్ సపోర్ట్ అందిస్తూ నెలకు లక్షలు జేబులో వేసుకుంటున్నాడు.

ఈ టకుయా ఇకోమా జీవితం అందరిలాగా కాకుండా చాలా విచిత్రంగా ఉంటుంది. ఇతడు ఏకంగా 15 మంది ధనవంతులు, అందమైన మహిళలకు సేవలు అందిస్తూ.. డబ్బు సంపాదిస్తున్నాడు. ఒకేసారి 15 మందికి ఎమోషనల్ సపోర్ట్ అందిస్తూ నెలకు దాదాపు రూ.6 లక్షల వరకు ఆర్జిస్తున్నాడు. ఇలాంటి అందమైన, ధనవంతులైన క్లయింట్ల కోసం టకుయా ఇకోమా ఏం చేస్తాడనే కదా మీ సందేహం. అతడు వారితో కలిసి భోజనం చేస్తాడు, డ్రింక్స్ తాగుతాడు, వారితో మాట్లాడుతాడు. వారికి మానసికంగా మద్దతు ఇస్తూ ఉంటాడు. అంతేకాకుండా వారితో కలిసి ఇంటి పనులు చేయడం, శుభ్రం చేయడం వంటి చిన్న చిన్న పనులు కూడా చేస్తాడు.

అయితే ఈ పని చేయడం చాలా కష్టమైన పని అని టకుయా ఇకోమా చెబుతున్నాడు. చాలామంది అనుకుంటున్నట్లు ఇది అంత సులువైన జీవితం కాదని పేర్కొంటున్నాడు. ఒకేసారి అంత మంది మహిళలను చూసుకోవడం, వారి అవసరాలను తీర్చడం చాలా కష్టమైన పని అని వెల్లడించాడు. ఇక వారిని కలిసే ముందు ప్రత్యేకంగా మేకప్ వేసుకోవడం, మంచి బట్టలు ధరించడం చేస్తున్నట్లు చెప్పాడు. అయితే చాలామంది కెప్ట్ మ్యాన్ అంటే బాగా డబ్బు, ఖాళీ సమయం ఉంటుంది అనుకుంటారని.. కానీ ఒకేసారి 15 మంది సంపన్న మహిళలకు సేవలు అందించడం సరదాగా ఉన్నప్పటికీ.. చాలా అలసట ఉంటుందని టకుయా ఇకోమా చెప్పినట్లు సౌత్ చైనా మార్నింగ్ పోస్ట్ వెల్లడించింది.

కేవలం 3 గంటల ఇంటి పనికి అతడు 1.60 లక్షల యెన్‌లు మన భారత కరెన్సీలో దాదాపు రూ.95 వేలు సంపాదించాడు. 2019లో కేవలం 8 రోజులు పనిచేసి.. 15 మంది సంపన్న క్లయింట్‌లకు సేవలు అందించి నెలకు 1 మిలియన్ యెన్ వరకు సంపాదించినట్లు చెప్పాడు. అయితే ఒకసారి ఒక డబ్బున్న మహిళ.. కేవలం తనకు మాత్రమే పనిచేయాలని.. అందుకు నెలకు 1 మిలియన్ యెన్‌లు ఇస్తానని ఒక భారీ ఆఫర్ ఇచ్చింది. అయితే తాను అందరికీ అందుబాటులో ఉండాలని భావించి.. ఆ ఆఫర్‌ను తిరస్కరించినట్లు ఇకోమా వెల్లడించాడు. మరోవైపు.. టకుయా ఇకోమా డిమాండ్ భారీగా పెరిగి.. ఎక్కువ మంది మహిళలు అతడి కోసం ఎదురుచూస్తుండటంతో ఇప్పుడు కేవలం అందమైన క్లయింట్‌లను మాత్రమే ఎంచుకుంటున్నట్లు పేర్కొన్నాడు.