వెలుగుబాట పట్టిన అమరావతి.. వీడియో షేర్ చేసిన టీడీపీ

ఆంధ్రప్రదేశ్ రాజధాని అమరావతి పునర్నిర్మాణానికి సిద్ధమైంది. అమరావతి రీలాంఛింగ్‌కు సమయం సమీపిస్తోంది. నవ్యాంధ్ర కలల రాజధాని అమరావతిని ప్రపంచస్థాయి నగరంగా తీర్చిదిద్దాలని ఆంధ్రప్రదేశ్ ప్రభుత్వం భావిస్తోంది. ఈ క్రమంలోనే మే 2వ తేదీ రాజధాని అమరావతి నిర్మాణ పనులకు పునఃప్రారంభోత్సవం చేయనున్నారు. ప్రధానమంత్రి నరేంద్ర మోదీ చేతుల మీదుగా ఈ కార్యక్రమం జరగనుంది. ఈ నేపథ్యంలో అమరావతిపై టీడీపీ వీడియో విడుదల చేసింది.

మంత్రి నారా లోకేష్‌తో పాటుగా పలువురు మంత్రులు, ఎమ్మెల్యేలు ఈ వీడియోను సోషల్ మీడియాలో షేర్ చేస్తున్నారు. ఈ వీడియోను ఎక్స్ అకౌంట్ ద్వారా షేర్ చేశారు మంత్రి నారా లోకేష్. గ్రహణం అనేది ఎంతో కాలం ఉండదు. స్వయం ప్రకాశకాలు అయిన సూర్యచంద్రుల మాదిరిగానే... స్వయం సమృద్ధి ప్రాజెక్ట్ అయిన ప్రజా రాజధాని అమరావతి కూడా ఐదేళ్ళ గ్రహణం నుండి బయటపడి మళ్ళీ వెలుగుబాట పట్టింది. పునర్నిర్మాణానికి సిద్ధం అవుతోంది.. అంటూ నారా లోకేష్ ట్వీట్ చేశారు.

మరోవైపు ప్రధానమంత్రి నరేంద్ర మోదీ మే 2వ తేదీన అమరావతిలో పర్యటించనున్నారు. ఈ నేపథ్యంలో మోదీ అమరావతి పర్యటన ఏర్పాట్లపై సీఎం నారా చంద్రబాబు నాయుడు సమీక్ష నిర్వహించారు. మంత్రులు, ఉన్నతాధికారులతో ఉన్నత స్థాయి సమీక్ష నిర్వహించారు. ప్రధాని మోదీ సభకు జరుగుతున్న పనులు తీరును అడిగి తెలుసుకున్నారు. ప్రధాన వేదిక నిర్మాణంతో పాటుగా, పార్కింగ్ ఏర్పాట్లపై అధికారులకు పలు సూచనలు చేశారు. మరోవైపు ప్రధాని మోదీ సభకు కూటమి పార్టీల ప్రజాప్రతినిధులను టెలీకాన్ఫరెన్స్‌ ద్వారా చంద్రబాబు ఆహ్వానించనున్నారు. అలాగే సభకు వచ్చే ప్రజలు, కార్యకర్తలకు మజ్జిగ, మంచినీళ్లు పంపిణీ చేయాలని సూచించారు.

మరోవైపు ప్రధాని నరేంద్ర మోదీ అమరావతి సభకు 5 లక్షల మంది వచ్చే అవకాశం ఉందని అంచనా. ఈ నేపథ్యంలో ప్రభుత్వ యంత్రాంగం అందుకు తగినట్లు ఏర్పా్ట్లు చేస్తోంది. విద్యార్థులను భాగస్వామ్యం చేయాలనే ఉద్దేశంతో.. ప్రధాని మోదీ సభలో విద్యార్థుల కోసం ప్రత్యేకంగా గ్యాలరీ ఏర్పాటు చేయనున్నారు. అలాగే ప్రధాని మోదీ చేతుల మీదుగా రూ.లక్ష కోట్లకు పైగా అభివృద్ధి పనులకు శంకుస్థాపన చేయించేలా ప్రణాళికలు రూపొందించారు. అమరావతి పనుల పునఃప్రారంభానికి సంకేతంగా ప్రధాని నరేంద్ర మోదీ పైలాన్‌ ఆవిష్కరించనున్నారు. వెలగపూడి సచివాలయం వెనుక ఉన్న 250 ఎకరాలలో రాజధాని పనుల పునః ప్రారంభానికి ఏర్పాట్లు జరుగుతున్నాయి.