డెన్మార్క్, కువైట్ విదేశాంగ మంత్రులతో జైశంకర్ ఫోన్ సంభాషణలు
international | Suryaa Desk | Published : Thu, May 01, 2025, 08:08 AM
జమ్మూకశ్మీర్లోని పహల్గామ్లో జరిగిన ఉగ్రదాడి ఘటనపై భారత్ తన దౌత్యపరమైన ప్రయత్నాలను ముమ్మరం చేసింది. ఈ దాడి వెనుక ఉన్న సరిహద్దు ఉగ్రవాద కోణాన్ని, వాస్తవాలను అంతర్జాతీయ సమాజానికి వివరించే ప్రక్రియను కొనసాగిస్తోంది. ఇందులో భాగంగా భారత విదేశాంగ మంత్రి ఎస్. జైశంకర్ బుధవారం కీలక దేశాలైన డెన్మార్క్, కువైట్ల విదేశాంగ మంత్రులతో టెలిఫోన్లో సంభాషించారు.డెన్మార్క్ విదేశాంగ మంత్రి లార్స్ లొక్కె రాస్ముస్సెన్, కువైట్ విదేశాంగ మంత్రి అబ్దుల్లా అలీ అల్-యహ్యాలతో జైశంకర్ వేర్వేరుగా మాట్లాడారు. పహల్గామ్ దాడి తర్వాత ఆయా దేశాలు అందించిన మద్దతు, సంఘీభావానికి ఆయన కృతజ్ఞతలు తెలిపినట్లు 'ఎక్స్' వేదికగా వెల్లడించారు. ఈ సందర్భంగా, దాడికి పాల్పడిన వారిని చట్టం ముందు నిలబెట్టాలన్న భారత ప్రభుత్వ దృఢ నిశ్చయాన్ని ఆయన మరోసారి స్పష్టం చేశారు.ఈ సంభాషణలకు ముందు, ఐక్యరాజ్యసమితి భద్రతా మండలిలోని ఏడు తాత్కాలిక సభ్య దేశాల విదేశాంగ మంత్రులతో కూడా జైశంకర్ చర్చలు జరిపారు. పహల్గామ్ దాడి వివరాలను, దాని వెనుక ఉన్న శక్తుల గురించి వారికి వివరించారు. కాగా, 2025-26 సంవత్సరానికి పాకిస్థాన్ కూడా భద్రతా మండలిలో తాత్కాలిక సభ్యదేశంగా ఎన్నికైన నేపథ్యంలో, భారత్ చేపడుతున్న ఈ దౌత్యపరమైన చర్చలు ప్రాధాన్యతను సంతరించుకున్నాయి. భారత్ తన వాదనలను, ఆధారాలను అంతర్జాతీయ వేదికలపై ఉంచుతూ, ఉగ్రవాదంపై పోరులో ప్రపంచ దేశాల మద్దతును కూడగట్టే ప్రయత్నం చేస్తోంది.
|
|