రూ. 75 లక్షల వరకు హోం లోన్.. ఎస్బీఐ, హెచ్‌డీఎఫ్‌సీ బ్యాంకులలో వడ్డీ రేటు ఎంతో తెలుసా

సొంతింటి కలను నిజం చేసుకోవాలనుకునే వారికి ఇది మరింత అనుకూలమైన సమయం. రిజర్వ్ బ్యాంక్ ఆఫ్ ఇండియా (RBI) రెపో రేటును తగ్గించడంతో, గృహ రుణాలపై వడ్డీ రేట్లు తగ్గుముఖం పట్టాయి. మే 2025 నాటికి ప్రముఖ బ్యాంకులు అందిస్తున్న వివిధ రుణ మొత్తాలపై తాజా వడ్డీ రేట్లను ఇప్పుడు పరిశీలిద్దాం.

స్టేట్ బ్యాంక్ ఆఫ్ ఇండియా (ఎస్బీఐ): ఈ బ్యాంకు రూ. 30 లక్షల వరకు; రూ. 30-75 లక్షల వరకు, ఆపైన కూడా గృహ రుణాలపై 8 శాతం నుంచి 9.15 శాతం వరకు వడ్డీ రేట్లను అందిస్తోంది.

హెచ్డీఎఫ్సీ బ్యాంక్: ఈ ప్రైవేట్ బ్యాంకులో రూ. 75 లక్షల వరకు ఆపైన కూడా రుణాలపై 8.70 శాతం నుంచి వడ్డీ రేట్లు ప్రారంభమవుతున్నాయి.

ఐసీఐసీఐ బ్యాంక్: ఈ బ్యాంకులో రూ. 30 లక్షల వరకు, ఆపైన గృహ రుణాలపై 8.75 శాతం నుంచి వడ్డీ రేట్లు ప్రారంభమవుతున్నాయి.

యాక్సిస్ బ్యాంక్: ఈ బ్యాంకు రూ. 30 లక్షల వరకు అలాగే రూ. 75 లక్షల వరకు లోన్లపై కనీసం 8.75 శాతం నుంచి 12.80 శాతం వరకు వడ్డీ రేట్లను వసూలు చేస్తోంది. ఇక ఇక్కడ రూ. 75 లక్షలపైన మొత్తంపై హోం లోన్ వడ్డీ రేటు 8.75 శాతం నుంచి మొదలుకొని గరిష్టంగా 9.65 శాతం వరకు ఉంది.

కోటక్ మహీంద్రా బ్యాంక్: ఈ బ్యాంకు రూ. 30 లక్షల వరకు, అలాగే ఆపైన రుణాలపై 8.65 శాతం నుంచి వడ్డీ వసూలు చేస్తోంది.

బ్యాంక్ ఆఫ్ బరోడా: ఈ ప్రభుత్వ రంగ బ్యాంకు రూ. 30 లక్షల వరకు, అలాగే రూ. 75 లక్షల వరకు గృహ రుణాలపై 8.40 శాతం నుంచి 10.40 శాతం వరకు వడ్డీని వసూలు చేస్తోంది. ఇక ఇక్కడ రూ. 75 లక్షలపైన హోం లోన్‌పై వడ్డీ రేటు 8.40 శాతం నుంచి 10.65 శాతంగా ఉంది.

 ఇక్కడ గమనించాల్సిన విషయం ఏమిటంటే, ఈ వడ్డీ రేట్లు రుణగ్రహీత క్రెడిట్ స్కోర్, రుణ కాలవ్యవధి, ఇతర ప్రమాణాల ఆధారంగా మారొచ్చు. మంచి క్రెడిట్ స్కోర్ ఉన్నవారికి తక్కువ వడ్డీ రేటు లభించే అవకాశం ఉంది. కాబట్టి, గృహ రుణం తీసుకునే ముందు వివిధ బ్యాంకుల ఆఫర్లను పూర్తిగా పరిశీలించడం. మీ అవసరాలకు తగినదాన్ని ఎంచుకోవడం చాలా ముఖ్యం. అప్పుడు మాత్రమే ఈఎంఐ తక్కువ చెల్లించే అవకాశం ఉంటుంది.