వరుసగా విఫలమవుతున్న నికోలస్ పూరన్,,,,,ఆఖరి ఐదు మ్యాచ్‌లలో 61 పరుగులే!

నికోలస్ పూరన్ సిక్సర్ల మోతతో ఐపీఎల్ 2025ని దద్దరిల్లించాడు. పూరన్ క్రీజులోకి వచ్చాడంటే బౌలర్ల గుండెల్లో రైళ్లు పరిగెత్తాల్సిందే. ఈ ఐపీఎల్‌లో అతి తక్కువ మ్యాచ్‌లలోనే అంత ఎత్తుకు ఎదిగిన పూరన్.. అంతలోనే కిందక పడిపోయాడు. మొదటి ఆరు మ్యాచ్‌లలో తుఫాన్ ఇన్నింగ్స్ ఆడిన వెస్టిండీస్ డైనమైట్.. చివరి ఐదు మ్యాచ్‌లలో తుస్సుమన్నాడు.

ఐపీఎల్ 2025 మెగా వేలంలో నికోలస్ పూరన్‌ను లక్నో సూపర్ జెయింట్స్ జట్టు రిటైన్ చేసుకుంది. ఐపీఎల్ 2024లో 499 పరుగులతో రాణించిన పూరన్.. ఈ సీజన్ ఆరంభం నుంచే తన మార్క్ బ్యాటింగ్‌తో ఆకట్టుకున్నాడు. ఈ సీజన్‌లో ఇప్పటి వరకు 11 మ్యాచ్‌లు ఆడిన పూరన్ 87 బెస్ట్‌తో 410 పరుగులు నమోదు చేశాడు.

మొదటి ఆరు మ్యాచ్‌లు

ఈ సీజన్‌లో మొత్తం 410 పరుగులు చేసిన నికోలస్ పూరన్ మొదటి ఆరు మ్యాచ్‌లలో 349 పరుగులు చేశాడు. మిగతా ఐదు మ్యాచ్‌లలో కలిపి కేవలం 61 పరుగులు మాత్రమే నమోదు చేశాడు. ఢిల్లీ క్యాపిటల్స్‌తో ఆడిన తొలి మ్యాచ్‌లో కేవలం 30 బంతుల్లోనే ఆరు ఫోర్లు, ఏడు సిక్సర్లతో 75 పరుగులు చేశాడు. సన్‌రైజర్స్‌తో జరిగిన మ్యాచ్‌లో కూడా కేవలం 26 బంతుల్లోనే ఆరు ఫోర్లు ఆరు సిక్సర్లతో వీరబాదుడు బాది 70 పరుగులు చేశాడు.

పంజాబ్ కింగ్స్‌పై 30 బంతుల్లో 44, ముంబైపై 12 పరుగులు చేశాడు. కోల్‌కతా నైట్ రైడర్స్‌పై 36 బంతుల్లో ఏడు ఫోర్లు, ఎనిమిది సిక్సర్లతో 87 పరుగులతో నాటౌట్‌గా నిలిచాడు. గుజరాత్ టైటాన్స్‌పై 34 బంతుల్లో ఒక్క ఫోర్, ఏడు సిక్సర్లతో 61 పరుగులు నమోదు చేశాడు. పూరన్ స్ట్రయికింగ్‌లో ఉన్నప్పుడు లక్నో మొదటి ఆరు మ్యాచ్‌లలో నాలుగు గెలవడం విశేషం.

ఆఖరి ఐదు మ్యాచ్‌లలో

పూరన్ రాణించకపోవడంతో ఆఖరి ఐదు మ్యాచ్‌లలో లక్నో కేవలం ఒక్క మ్యాచ్‌లోనే గెలిచి, నాలుగు మ్యాచ్‌లలో ఓడింది. ఆఖరి మూడు మ్యాచ్‌లలో ఢిల్లీ, ముంబై, పంజాబ్‌పై లక్నో ఘోర ఓటమిని చవిచూసింది. పూరన్ చివరి ఐదు మ్యాచ్‌ల స్కోర్‌ను పరిశీలిస్తే 8, 11, 9, 27, 6 పరుగులు మాత్రమే చేశాడు.

టాప్ ప్లేస్ కోల్పోయి

మొదటి ఆరు మ్యాచ్‌లలో భారీ స్కోర్ చేసిన నికోలస్ పూరన్ ఆ తర్వాత విఫలమవ్వడంతో మోస్ట్ రన్స్ క్యాటగిరీలోనూ కిందకు వచ్చాడు. ఈ సీజన్‌లో 410 పరుగులతో ఆరెంజ్ క్యాప్ లిస్ట్‌లో ఎనిమిదో స్థానానికి పడిపోయాడు. సిక్సర్ల విభాగంలో మాత్రం ఇప్పటికీ టాప్ ప్లేస్‌లో ఉన్నాడు. 11 ఇన్నింగ్స్‌లలో కలిపి 34 సిక్సర్లు బాదడం విశేషం.