బంగారం ధరల్లో ఊహించని మార్పు..మళ్లీ సీన్ రివర్స్..

భారతీయులకు బంగారంతో ఉన్న అనుబంధం ప్రత్యేకమైనది. ఇది కేవలం పెట్టుబడి సాధనం మాత్రమే కాదు, మన సంస్కృతిలో ఒక భాగం. పండుగలు, పెళ్లిళ్లు వంటి శుభకార్యాలలో బంగారం ఒక ముఖ్యమైన స్థానాన్ని కలిగి ఉంటుంది. అందుకే, అంతర్జాతీయ మార్కెట్‌లో జరిగే చిన్న కదలికలు కూడా దేశీయంగా బంగారం ధరలపై గణనీయమైన ప్రభావాన్ని చూపుతాయి. తాజాగా, అంతర్జాతీయంగా బంగారం ధరలు పెరగడంతో, దేశీయంగా బంగారం కొనుగోలు చేయాలనుకునే వారికి ఇది షాకింగ్ వార్తే. బంగారం ధరలు సోమవారం ఒక్కసారిగా పెరిగాయి. అంతర్జాతీయ మార్కెట్‌లో డాలర్ బలహీనంగా ఉండటం సహా కొనుగోలుదారుల నుంచి డిమాండ్ పెరగడంతో ఈ పరిస్థితి నెలకొంది. ఇటీవల ఆల్ టైమ్ గరిష్ట స్థాయిల నుంచి గోల్డ్ రేట్లు భారీగా పడిపోయిన సంగతి తెలిసిందే.

మల్టీ కమోడిటీ ఎక్స్ఛేంజ్‌లో జూన్ 5 కాంట్రాక్టుల బంగారం ధర సాయంత్రం 4:50 గంటల సమయంలో 2.14 శాతం పెరిగి రూ. 94,615 వద్ద ట్రేడ్ అయింది. అంతర్జాతీయ మార్కెట్‌లో కూడా బంగారం ధర ఒక శాతం కంటే ఎక్కువ పెరిగింది. అమెరికా-చైనా వాణిజ్య ఉద్రిక్తతలు, అమెరికా ఫెడరల్ రిజర్వ్ యొక్క విధాన నిర్ణయంపై మదుపరులు దృష్టి సారించడంతో ఈ పెరుగుదల కనిపించింది.

అమెరికా ఆర్థిక వ్యవస్థ మాంద్యంలోకి జారుకునే అవకాశం ఉందనే భయాలతో డాలర్ సూచీ దాదాపు అర శాతం క్షీణించింది. బలహీనమైన డాలర్ ఇతర కరెన్సీలలో బంగారం ధరను చౌకగా చేస్తుంది, తద్వారా డిమాండ్ పెరిగి ధరలకు మద్దతు లభిస్తుంది. ప్రపంచంలోని రెండు అతిపెద్ద ఆర్థిక వ్యవస్థల మధ్య వాణిజ్య చర్చలు.. బంగారం ధరలను ప్రభావితం చేసే ముఖ్యమైన అంశంగా కొనసాగుతున్నప్పటికీ, ప్రస్తుతం అందరి దృష్టి.. అమెరికా ఫెడరల్ రిజర్వ్ ఆర్థిక అంచనాలు, వడ్డీ రేట్లపై దాని సంకేతాలపైనే ఉంది. బుధవారం జరిగే సమావేశంలో ఫెడ్ వడ్డీ రేట్లను యథాతథంగా ఉంచే అవకాశం ఉంది.

ఎల్‌కేపీ సెక్యూరిటీస్‌లోని వీపీ రీసెర్చ్ అనలిస్ట్ (కమోడిటీ అండ్ కరెన్సీ) జతీన్ త్రివేది మాట్లాడుతూ, ఈ వారం అమెరికా ఫెడరల్ రిజర్వ్ వడ్డీ రేట్లను తగ్గిస్తుందనే అంచనాలతో బంగారం ధరలు ఒక్కసారిగా పెరిగాయని తెలిపారు. 'ట్రంప్, ఫెడ్ ఛైర్మన్ జెరోమ్ పావెల్ మధ్య వడ్డీ రేట్ల విషయంలో ఇటీవల బహిరంగంగా విభేదాలు వచ్చిన తర్వాత మార్కెట్లు FOMC నిర్ణయం కోసం ఆసక్తిగా ఎదురు చూస్తున్నాయి. ఫెడ్ సానుకూల సంకేతాలిస్తే బంగారం ధర మరింత పెరిగే అవకాశం ఉంది. ఒకవేళ ప్రతికూల సంకేతాలు వస్తే మాత్రం మార్కెట్‌లో ఒత్తిడి పెరిగే అవకాశం ఉంది" అని త్రివేది అభిప్రాయపడ్డారు. స్వల్పకాలికంగా బంగారం ధర రూ. 93,000- 96,000 మధ్య ఊగిసలాడే అవకాశం ఉందని ఆయన అంచనా వేశారు.

పృథ్విఫిన్‌మార్ట్ కమోడిటీ రీసెర్చ్‌కు చెందిన మనోజ్ కుమార్ జైన్.. బంగారం ధరలు అస్థిరంగా ఉంటాయని అంచనా వేస్తూ, ధర పెరిగినప్పుడు అమ్మడం మంచిదని ఇన్వెస్టర్లకు సూచిస్తున్నారు. మొత్తానికి, అంతర్జాతీయ మార్కెట్‌లోని ఈ కదలికలు దేశీయంగా బంగారం ధరలపై మంగళవారం ప్రభావం చూపే అవకాశం ఉంది. కొనుగోలు చేయాలనుకునేవారు అప్రమత్తంగా ఉండటం మంచిది.