బ్యాగ్ మర్చిపోయి సికింద్రాబాద్‌లో దిగేసిన ప్రయాణికుడు..తెరిచి చూడగా

భారతీయ రైల్వేలు కేవలం ప్రయాణ సాధనమే కాదు.. దేశంలోని వివిధ ప్రాంతాలు, భాషలు, సంస్కృతుల కలయికకు వేదిక. నిత్యం లక్షలాది మంది రైళ్లలో తమ గమ్యస్థానాలకు చేరుకుంటారు. అయితే.. ఈ ప్రయాణాల్లో కొన్నిసార్లు వస్తువులు లేదా బ్యాగ్స్ లాంటివి మర్చిపోవడాలు, పోగొట్టుకోవడాలు జరుగుతుంటాయి. ముఖ్యంగా లగేజీ విషయంలో ప్రయాణికులు అప్రమత్తంగా ఉండాల్సిన అవసరం ఎంతైనా ఉంది. అయినప్పటికీ.. పొరపాటున తమ విలువైన వస్తువులను రైళ్లలో వదిలి వెళ్లిన వారికి రైల్వే సిబ్బంది మానవత్వంతో సహాయం చేస్తున్న ఘటనలు అనేకం వెలుగులోకి వస్తున్నాయి.

తాజాగా తెలంగాణ రాష్ట్రం మెదక్ జిల్లా రామాయంపేట మండలం దాయారాకు చెందిన రమేష్ పటేల్ అనే ప్రయాణికుడు తన కుటుంబ సభ్యులు.. బంధువులతో కలిసి గుజరాత్‌కు వెళ్లారు. తిరిగి వస్తుండగా అహ్మదాబాద్‌లో భావనగర్ టెర్మినల్-కాకినాడ పోర్టు రైలు ఎక్కారు. దురదృష్టవశాత్తూ సికింద్రాబాద్‌ రైల్వే స్టేషన్‌లో దిగిపోతూ తన లగేజీ బ్యాగును రైలులోనే మర్చిపోయారు. ఆ బ్యాగులో దుస్తులతో పాటు రూ. 3,13,460 నగదు ఉంది. ఈ డబ్బు ఆయన తన కుమార్తె వివాహం కోసం దాచి ఉంచినట్లు తెలిపారు.

ఆదివారం మధ్యాహ్నం 3.55 గంటల సమయంలో ఆ రైలు రాజమహేంద్రవరం రైల్వే స్టేషన్‌కు చేరుకున్న తర్వాత.. అక్కడి జీఆర్పీ (గవర్నమెంట్ రైల్వే పోలీస్) మరియు ఆర్పీఎఫ్ (రైల్వే ప్రొటెక్షన్ ఫోర్స్) సిబ్బంది సాధారణ తనిఖీలు చేస్తుండగా ఒక కోచ్‌లో ఆ లగేజీ బ్యాగ్ కనిపించింది. వారు వెంటనే బ్యాగును తెరిచి చూడగా అందులో నగదు.. దుస్తులు ఉండటం గమనించారు. వెంటనే స్పందించిన సిబ్బంది.. బ్యాగులో ఉన్న ఆహ్వాన పత్రికలో ఉన్న ఫోన్ నంబర్ల ఆధారంగా ప్రయాణికుడిని గుర్తించి సమాచారం అందించారు.

బాధిత ప్రయాణికుడు రమేష్ పటేల్ సోమవారం రాజమహేంద్రవరం జీఆర్పీ స్టేషన్‌కు చేరుకుని తన బ్యాగును క్షేమంగా తిరిగి పొందారు. తన కుమార్తె వివాహం కోసం దాచిన డబ్బు తిరిగి రావడంతో ఆయన ఆనందానికి అవధులు లేవు. ఈ ఘటనలో అప్రమత్తంగా వ్యవహరించిన జీఆర్పీ, ఆర్పీఎఫ్ సిబ్బందిని జీఆర్పీ డీఎస్పీ జయరామ్ ప్రత్యేకంగా అభినందించారు. వారి నిజాయితీకి ప్రశంసించారు. ఈ ఘటన ఆలస్యంగా వెలుగులోకి వచ్చినప్పటికీ.. రైల్వే సిబ్బంది మానవతా దృక్పథానికి ఇది ఒక గొప్ప ఉదాహరణగా నిలుస్తుంది.

ప్రజలు రైలు ప్రయాణాలను ఎంచుకోవడానికి అనేక కారణాలు ఉన్నాయి. సుదూర ప్రాంతాలకు చేరుకోవడానికి అనువైనదిగా ఈ రైలు ప్రయాణం ఉంటుంది. అంతేకాకుండా, రైల్వే శాఖ ప్రయాణికుల భద్రతకు అత్యంత ప్రాధాన్యత ఇస్తుంది. ఇలాంటి ఘటనలు రైలు ప్రయాణాలు సురక్షితమైనవనే భావనను మరింత బలపరుస్తాయి. అప్రమత్తంగా ఉండటం ఎంత ముఖ్యమూ.. సిబ్బంది సహాయక స్వభావం కూడా ప్రయాణికులకు భరోసా కలిగిస్తుంది.