కర్రెగుట్టలో భారీ ఎన్‌కౌంటర్.. 22 మంది మావోయిస్టులు మృతి

తెలంగాణ, ఛత్తీస్‌గఢ్‌లోని కర్రెగుట్టల్లో భారీ ఎన్‌కౌంటర్ జరిగింది. ఇవాళ ఉదయం కర్రె గుట్టల వద్ద భద్రతా బలగాలకు, మావోయిస్టులకు మధ్య ఎదురు కాల్పులు జరిగాయి. ఈ కాల్పుల్లో దాదాపు 22 మంది మావోయిస్టులు మృతి చెందినట్లు తెలిసింది. ఘటనా స్థలం నుంచి భారీగా ఆయుధాలు, పేలుడు పదార్థాలను స్వాధీనం చేసుకున్నట్లు అధికారులు వెల్లడించారు. బలగాలు, మావోయిస్టుల మధ్య ఇంకా ఎదురుకాల్పులు కొనసాగుతున్నందున మృతుల సంఖ్య పెరిగే అవకాశం ఉందని తెలుస్తోంది. ఈ ఎన్‌కౌంటర్‌ను సీఆర్‌పీఎఫ్ ఐజీ రాకేష్ అగర్వాల్ ధ్రువీకరించారు. ఆ ప్రాంతంలో కూంబింగ్ ఆపరేషన్ ఇంకా కొనసాగుతోందని చెప్పారు. మృతి చెందిన మావోయిస్టుల వివరాలు తెలుసుకునేందుకు అధికారులు దర్యాప్తు చేస్తున్నారు.

ఇక తెలంగాణ-ఛత్తీస్‌గఢ్ సరిహద్దుల్లో కొనసాగుతున్న 'ఆపరేషన్ కగార్'లో విషాదకరమైన సంఘటన చోటుచేసుకుంది. మావోయిస్టుల కోసం గత 20 రోజులుగా కర్రెగుట్టల ప్రాంతంలో విస్తృతంగా గాలిస్తున్న భద్రతా బలగాలకు ఎదురుదెబ్బ తగిలింది. ఈ ఆపరేషన్‌లో భాగంగా ఐదు బేస్ క్యాంపులు ఏర్పాటు చేసి 10 వేల మందికి పైగా జవాన్లు అడవులను జల్లెడ పడుతున్నారు. మావోయిస్టులను పూర్తిగా నిర్మూలించే లక్ష్యంతో సాగుతున్న ఈ ఆపరేషన్‌లో.. 204 కోబ్రా బెటాలియన్‌కు చెందిన అసిస్టెంట్ కమాండెంట్ సాగర్ బొరడే ప్రమాదవశాత్తు మరణించాడు. అడవిలో మావోయిస్టులు అమర్చిన ల్యాండ్‌మైన్‌పై ఆయన కాలు మోపడంతో భారీ పేలుడు సంభవించింది. తీవ్రంగా గాయపడిన సాగర్‌ను వెంటనే ఆసుపత్రికి తరలించే ప్రయత్నం చేసినప్పటికీ.. మార్గ మధ్యలోనే ఆయన ప్రాణాలు కోల్పోయారు. ఈ ఘటన 'ఆపరేషన్ కగార్'లో పాల్గొంటున్న భద్రతా దళాలకు తీరని నష్టాన్ని కలిగించింది. జరిగిన ఘటనపై అధికారులు దిగ్భ్రాంతి వ్యక్తం చేశారు.

కర్రె గుట్టల ప్రాంతంలో మావోయిస్టులు పెద్ద సంఖ్యలో క్యాంపులు ఏర్పాటు చేసినట్లు సమాచారం అందడంతో.. వారిని నిర్మూలించే లక్ష్యంతో కేంద్ర బలగాలు 'ఆపరేషన్ కగార్'ను కొనసాగిస్తున్నాయి. క్లిష్టమైన భౌగోళిక పరిస్థితులు, మావోయిస్టులు వ్యూహాత్మకంగా అమర్చిన మందుపాతరలు భద్రతా దళాలకు పెద్ద సవాలుగా మారాయి. అయినప్పటికీ, సెంట్రల్ రిజర్వ్ పోలీస్ ఫోర్స్ (CRPF) ప్రత్యేకంగా శిక్షణ పొందిన K9 (డాగ్ స్క్వాడ్), K3 బృందాల సహాయంతో కూంబింగ్ ఆపరేషన్‌ను మరింత వేగవంతం చేస్తోంది. ఇప్పటికే పలువురు నక్సల్స్ మృతి చెందగా.. వారిని మట్టుబెట్టడమే లక్ష్యంగా కూబింగ్ కొనసాగిస్తున్నారు.