ఇక జన్మలో పాకిస్థాన్ వెళ్లను.. న్యూజిలాండ్ క్రికెటర్ డేరిల్ మిచెల్

భారత్-పాకిస్థాన్ దేశాల మధ్య ఉద్రిక్తతలో రెండు దేశాల్లో క్రీడా పోటీలు స్తంభించిపోయాయి. భారత్‌లో ఇండియన్ ప్రీమియర్ లీగ్ 2025 సీజన్ వారం పాటు వాయిదా పడింది. అటు పాకిస్థాన్‌లో పాకిస్థాన్ సూపర్ లీగ్ 2025 కూడా నిలిచిపోయింది. అయితే తొలుత పాకిస్థాన్ సూపర్ లీగ్‌ను దుబాయ్‌లో నిర్వహించాలని పాకిస్థాన్ క్రికెట్ బోర్డు ప్లాన్ చేసింది. కానీ అందుకు యూఏఈ ఒప్పుకోకపోవడంతో వెనక్కుతగ్గింది. దీంతో విదేశీప్లేయర్లను స్వస్థలాలకు పంపించేందుకు సిద్ధమైంది. ఈ క్రమంలో తొలుత దుబాయ్‌.. ఆ తర్వాత వారి స్వస్థలాలకు వెళ్లాలని ఆయా ఆటగాళ్లు డిసైడ్ అయ్యారు.

అయితే తమ దేశానికి తిరిగి వెళ్లే క్రమంలో పాకిస్థాన్ సూపర్ లీగ్‌లో పాల్గొనేందుకు వచ్చిన ఆటగాళ్లు హడలిపోయారు. భారత్‌-పాకిస్థాన్ మధ్య ఉద్రిక్తతలతో పాక్‌లో జనజీవనం స్తంభించిపోయింది. ఈ పరిస్థితిని చూసి.. విదేశీ ఆటగాళ్లు తీవ్రంగా భయపడ్డారు. చివరకు దుబాయ్‌కు చేరుకుని..అక్కడి నుంచి వారి స్వస్థలాలకు పయనమయ్యారు. ఈ నేపథ్యంలో ప్రయాణ సమయంలో తాము ఎలాంటి ఇబ్బందులు పడ్డామో బంగ్లాదేశ్ క్రికెటర్ రిషాద్ హుస్సేన్ వెల్లడించాడు. జరిగింది.. జరిగినట్లు చెప్పేశాడు.

"నేను, సామ్ బిల్లింగ్స్, డేరిల్ మిచెల్, కుశాల్ పెరీరా, డేవిస్ వీస్, టామ్ కరన్ సహా పలువురం కలిసి ఒకేసారి పాకిస్థాన్ నుంచి బయలుదేరాం. పాకిస్థాన్‌ నుంచి విమానంలో బయలుదేరిన 20 నిమిషాలకే ఎయిర్‌పోర్ట్ సమీపంలో మిసైల్ చిక్కుకున్నట్లు మాకు తెలిసింది. దీంతో మేం చాలా భయపడ్డాం. పేసర్ నహిద్ రాణా షాక్ అయిపోయాడు. భయపడొద్దని అతడికి ధైర్యం చెప్పాను. మిగతా వాళ్లు కూడా భయంతో హడలిపోయారు. ఇక మేం దుబాయ్‌లో అడుగుపెట్టగానే.. ఇకపై తానెప్పుడూ పాకిస్థాన్‌కు వెళ్లనని డేరిల్ మిచెల్ నాతో చెప్పాడు. టామ్ కర్రన్ వెళ్లే సరికి ఎయిర్‌పోర్ట్ మూసేసినట్లు చెప్పడంతో.. చిన్నపిల్లాడిలా ఏడ్చేశాడు. ఇద్దరు- ముగ్గురు కలిసి అతడిని ఓదార్చాల్సి వచ్చింది" అని రిషాద్ చెప్పుకొచ్చాడు. అయితే భారత్‌లోనూ ఐపీఎల్ వాయిదా పడ్డ విషయం తెలిసిందే. కానీ విదేశీ ఆటగాళ్లు ఎలాంటి ఇబ్బంది లేకుండా.. వారి వారి స్వదేశాలకు వెళ్లిపోవడం గమనార్హం.