చైనాతో ట్రంప్ చర్చలు.. భారీగా తగ్గిన బంగారం ధర

 ప్రపంచంలోని రెండు అతిపెద్ద ఆర్థిక వ్యవస్థల మధ్య నెలకొన్న వాణిజ్య వివాదం తగ్గించడమే లక్ష్యంగా చర్చలు మొదలయ్యాయి. అమెరికా- చైనా మధ్య ప్రతీకార సుంకాలపై చర్చలు ప్రారంభించారు. భారీ టారిఫ్‌లు తగ్గించుకుంటాయమే ఆశలు చిగురిస్తున్నాయి. ఈ క్రమంలో అంతర్జాతీయ మార్కెట్లో బంగారం ధరలు భారీగా దిగివస్తున్నాయి. వాణిజ్య యుద్ధ భయాలు తగ్గడంతో పసిడి ధరలు కుప్పకూలుతున్నాయి. క్రితం రోజుతో పోలిస్తే ఔన్సు బంగారం రేటు 50 డాలర్లకుపైగా పడిపోయింది. ఈ క్రమంలో దేశీయ మార్కెట్లలోనూ ఈ ప్రభావం ఉంటుందని, బంగారం రేట్లు దిగివస్తాయని బులియన్ మార్కెట్ వర్గాలు అంచనా వేస్తున్నాయి. అయితే, మే 12వ తేదీన హైదరాబాద్ మార్కెట్లో పసిడి ధరలు ఏ విధంగా ఉన్నాయో ఇప్పుడు మనం తెలుసుకుందాం.

అంతర్జాతీయ మార్కెట్లో గోల్డ్ రేట్లు..

అమెరికా-చైనా చర్చలు మొదలైన క్రమంలో గ్లోబల్ మార్కెట్లో గోల్డ్ రేట్లు దిగివస్తున్నాయి. క్రితం రోజు ఔన్సు స్పాట్ గోల్డ్ రేటు 3325 డాలర్ల వద్ద ఉండగా.. ఇవాళ అది 3261 డాలర్ల స్థాయికి పడిపోయింది. అంటే దాదాపు 65 డాలర్ల మేర తగ్గింది. ఇక స్పాట్ సిల్వర్ రేటు ఔన్సుకు 32.57 డాలర్ల వద్ద కొనసాగుతోంది. ఇక ఇండియన్ రూపాయి మారకం విలువ డాలర్‌తో పోలిస్తే కాస్త పడిపోయి రూ.85.493 వద్ద అమ్ముడవుతోంది.

హైదరాబాద్‌లో స్థిరంగా బంగారం ధర

హైదరాబాద్ మార్కెట్లో గోల్డ్ రేట్లు ఇవాళ స్థిరంగా ఉన్నాయి. ప్రస్తుతం 22 క్యారెట్ల నగల తయారీ గోల్డ్ రేటు తులానికి రూ. 90 వేల 450 వద్ద ఉంది. ఇక 24 క్యారెట్ల స్వచ్ఛమైన (999) గోల్డ్ రేటు 10 గ్రాములకు ఏ మార్పు లేకుండా రూ. 98 వేల 680 వద్ద కొనసాగుతోంది. అయితే, దేశీయంగా క్రితం రోజు బంగారం ధరలు ఒక్కసారిగా పెరగడంతో కొనుగోలుదారుల్లో ఆందోళన నెలకొంది. కానీ, ఇవాళ గ్లోబల్ మార్కెట్ల నుంచి సానుకూల వార్తలు అందడంతో కొనేందుకు సిద్ధమవుతున్నారు.

స్థిరంగానే వెండి ధర..

ఓ వైపు బంగారం ధరలు ఒడుదొడుకులకు లోనవుతున్నా వెండి రేట్లు మాత్రం స్థిరంగానే ఉన్నాయి. గత 5 రోజులుగా వెండి ధర స్థిరంగా కొనసాగుతోంది. హైదరాబాద్ మార్కెట్లో ఇవాళ కిలో వెండి ధర రూ.1,11,000 వద్ద స్థిరంగా అమ్ముడవుతోంది.

ఈ కథనంలో పేర్కొన్న బంగారం, వెండి ధరలు మే 12, 2025 రోజున ఉదయం 7 గంటల సమయంలో ఉన్నవి. మధ్యాహ్నానికి బంగారం, వెండి రేట్లు మారవచ్చు. అలాగే జీఎస్టీ వంటి పన్నులు కలిపితే ప్రాంతాలను బట్టి బంగారం ధరలు వేరు వేరుగా ఉంటాయని గమనించాలి. కొనుగోలు చేసే ముందే స్థానికంగా జువెలర్స్ వద్ద ధరలు తెలుసుకోవడం మంచిది.