వడ్డీ రేట్లు భారీగా పెంచిసిన బ్యాంకు.. ఏకంగా 9.10 శాతం

 ఇతర ప్రముఖ బ్యాంకులు ఫిక్స్‌డ్ డిపాజిట్లపై వడ్డీ రేట్లను తగ్గిస్తున్న తరుణంలో, సూర్యోదయ్ స్మాల్ ఫైనాన్స్ బ్యాంక్ మాత్రం తన వినియోగదారులకు అదిరిపోయే ఆఫర్‌ను ప్రకటించింది. రూ. 3 కోట్ల లోపు డిపాజిట్లపై వడ్డీ రేట్లను భారీగా పెంచింది. కొన్ని ప్రత్యేక టెన్యూర్‌లపై ఏకంగా 41 బేసిస్ పాయింట్ల వరకు వడ్డీ రేటును పెంచడం విశేషం. ఈ బ్యాంకు తీసుకున్న భిన్నమైన చర్య ఇప్పుడు అందరి దృష్టిని ఆకర్షిస్తోంది. తాజా పెంపుతో సాధారణ కస్టమర్లు డిపాజిట్లపై కనీసం 4 శాతం నుంచి 8.60 శాతం వరకు వడ్డీ పొందొచ్చు. వివిధ టెన్యూర్‌లకు వేర్వేరు వడ్డీ రేట్లు వర్తిస్తాయి. సీనియర్ సిటిజన్లకు అయితే ఏకంగా 4.5 శాతం నుంచి గరిష్టంగా 9.10 శాతం వరకు వడ్డీ లభిస్తుంది. ముఖ్యంగా 5 సంవత్సరాల టెన్యూర్‌పై సీనియర్ సిటిజన్లకు గరిష్టంగా 9.10 శాతం వడ్డీ రేటును బ్యాంకు అందిస్తోంది.

రూ. 10 లక్షలు జమ చేస్తే ఎంత లాభం?

ఒక సీనియర్ సిటిజన్ 5 సంవత్సరాల టెన్యూర్‌కు రూ. 10 లక్షలు ఫిక్స్‌డ్ డిపాజిట్ చేస్తే, వారికి 9.10 శాతం వార్షిక వడ్డీ లభిస్తుంది. దీని ప్రకారం, వారికి వచ్చే మొత్తం వడ్డీ రూ. 5,68,158 వరకు ఉంటుంది. అంటే మొత్తం చేతికి రూ. 15,68,158 వస్తుంది. ఇక్కడ సాధారణ జనం గరిష్టంగా 8.60 శాతం వడ్డీ రేటుతో రూ. 10 లక్షలపై రూ. 5,30,268 వడ్డీ అందుకుంటారు. ఈ అధిక రాబడి ఇతర బ్యాంకుల్లో లభించే వడ్డీతో పోలిస్తే చాలా ఆకర్షణీయంగా ఉంది.

 సూర్యోదయ్ స్మాల్ ఫైనాన్స్ బ్యాంక్ సాధారణ పౌరులకు వివిధ టెన్యూర్‌లపై ఆకర్షణీయమైన వడ్డీ రేట్లను అందిస్తోంది. 1 సంవత్సరం టెన్యూర్‌పై 7.90%, 1 సంవత్సరం నుంచి 15 నెలల వరకు 8 శాతం, 15 నెలల నుంచి 2 సంవత్సరాల వరకు 8.25 శాతం, 2 సంవత్సరాల నుంచి 30 నెలల వరకు 8.15 శాతం, 30 నెలల నుంచి 36 నెలల వరకు 8.40 శాతం, 5 సంవత్సరాల టెన్యూర్‌పై 8.60 శాతం వడ్డీ లభిస్తుంది. సీనియర్ సిటిజెన్లకు వీటిపై అదనంగా 50 బేసిస్ పాయింట్ల మేర అధిక వడ్డీ వస్తుందన్న సంగతి తెలిసిందే.

ఇతర బ్యాంకులు ఆర్బీఐ రెపో రేటు తగ్గింపునకు అనుగుణంగా FD వడ్డీ రేట్లను తగ్గిస్తున్నప్పటికీ, సూర్యోదయ్ స్మాల్ ఫైనాన్స్ బ్యాంక్ ఈ విరుద్ధమైన నిర్ణయం తీసుకోవడం గమనార్హం. అధిక వడ్డీ రేట్లను అందించడం ద్వారా ఎక్కువ మంది డిపాజిటర్లను ఆకర్షించాలనే లక్ష్యంతో ఈ బ్యాంకు ఉంది. అంతేకాకుండా, సూర్యోదయ్ స్మాల్ ఫైనాన్స్ బ్యాంక్‌లోని FDలు డిపాజిట్ ఇన్సూరెన్స్ అండ్ క్రెడిట్ గ్యారెంటీ కార్పొరేషన్ ద్వారా ఒక్కో డిపాజిటర్‌కు రూ. 5 లక్షల వరకు బీమా చేయబడి ఉంటాయి. కాబట్టి మీ పెట్టుబడికి భద్రత ఉంటుంది.