నెలకు రూ. 2.8 కోట్ల అద్దె.. టీసీఎస్ బిగ్ డీల్

దేశీయ ఐటీ రంగంలో కొంత మందగమనం కనిపిస్తున్నప్పటికీ, దిగ్గజ కంపెనీ టాటా కన్సల్టెన్సీ సర్వీసెస్ (టీసీఎస్) మాత్రం దూకుడుగానే ఉంది. చెన్నైలోని ఓజోన్ టెక్నో పార్క్‌లో ఏకంగా 6.3 లక్షల చదరపు అడుగుల కార్యాలయ స్థలాన్ని టీసీఎస్ లీజుకు తీసుకుంది. ఈ స్థలం కోసం నెలకు రూ. 2.8 కోట్ల అద్దె చెల్లించనుంది. రియల్ ఎస్టేట్ డేటా అనలిటిక్స్ సంస్థ ప్రాప్‌స్టాక్ వెల్లడించిన వివరాల ప్రకారం, టీసీఎస్ సంస్థ.. చెన్నైలోని నవలూర్ శివారులో ఉన్న ఈ స్థలాన్ని ప్లాటినం హోల్డింగ్స్ ప్రైవేట్ లిమిటెడ్ నుంచి పదేళ్ల కాలానికి లీజుకు తీసుకుంది. దీని కోసం టీసీఎస్ రూ. 25.5 కోట్ల డిపాజిట్ చెల్లించింది. లీజు ఒప్పందం ప్రకారం, ప్రతి 3 సంవత్సరాలకు అద్దె 12 శాతం చొప్పున పెరుగుతుంది. ఈ ట్రాన్సాక్షన్ గురించి టీసీఎస్ ఎలాంటి అధికారిక ప్రకటన వెలువరించలేదు.

ప్రపంచ ఆర్థిక, భౌగోళిక రాజకీయ అనిశ్చితుల నేపథ్యంలో దేశీయ ఐటీ సేవల సంస్థల కార్యాలయ స్థలాల లీజు దేశంలోని ప్రధాన నగరాల్లో మందగించింది. అయితే, ప్రాప్‌స్టాక్ సహ వ్యవస్థాపకుడు రాజా సీతారామన్ మాట్లాడుతూ, దేశీయ ఐటీ సేవల సంస్థలు ఇప్పటికీ విస్తరిస్తున్నాయని అన్నారు.

"ఐటీ రంగంపై విస్తృత ఆర్థిక అంశాలు, సాంకేతిక మార్పుల ప్రభావం ఉన్నప్పటికీ, కంపెనీలు కార్యాలయంలో పని చేయడం, ప్రాంతీయ ప్రాధాన్యతలతో సహా విభిన్న కార్యాచరణ వ్యూహాలను ప్రతిబింబిస్తూ గణనీయమైన కార్యాలయ స్థలాలకు కట్టుబడి ఉన్నాయి" అని సీతారామన్ అన్నారు. "ఈ లావాదేవీ GCCలు (గ్లోబల్ క్యాపబిలిటీ సెంటర్‌లు) ప్రాధాన్యత కలిగి ఉన్నప్పటికీ, భారతదేశంలోని ఐటీ కంపెనీలు ఇప్పటికీ విస్తరిస్తున్నాయని సూచిస్తుంది."

దీనికి ముందు టీసీఎస్.. హైదరాబాద్‌లో 15 సంవత్సరాల కాలానికి 1 మిలియన్ చదరపు అడుగుల కార్యాలయ స్థలాన్ని లీజుకు తీసుకుంది. అయితే, కాగ్నిజెంట్ టెక్నాలజీ సొల్యూషన్స్ కార్ప్, విప్రో లిమిటెడ్ వంటి ఇతర ఐటీ సంస్థలు ఖర్చులను తగ్గించుకోవడానికి తమ రియల్ ఎస్టేట్‌ను వదులుకుంటున్నాయి. ఈ ఏడాది ప్రారంభంలో, కాగ్నిజెంట్ చెన్నైలోని ఓల్డ్ మహాబలిపురం రోడ్‌లో ఉన్న సుమారు 6 లక్షల చదరపు అడుగుల కార్యాలయ స్థలాన్ని బెంగళూరు డెవలపర్ బాగ్‌మనే కన్‌స్ట్రక్షన్స్‌కు రూ. 612 కోట్లకు విక్రయించింది.

ప్రాపర్టీ కన్సల్టెంట్ CBRE ఇండియా ప్రకారం, జనవరి-మార్చి కాలంలో భారతదేశం అంతటా స్థూల కార్యాలయ స్థలాల లీజు 18 మిలియన్ చదరపు అడుగులకు చేరుకుంది. ఈ కార్యాలయ స్థలాల లీజులో GCCల వాటా 45 శాతం. మొత్తానికి, ఐటీ రంగంలో కొంత మందగమనం ఉన్నప్పటికీ, టీసీఎస్ చెన్నైలో భారీగా కార్యాలయ స్థలాన్ని లీజుకు తీసుకోవడం ఆ కంపెనీ వృద్ధి ప్రణాళికలను సూచిస్తుంది. ఇక టీసీఎస్ స్టాక్ సోమవారం సెషన్లో భారీగా దూసుకెళ్లింది. ఇండియా- పాకిస్థాన్ చర్చలు, అమెరికా- చైనా ఒప్పందం నడుమ భారత స్టాక్ మార్కెట్ సూచీలు భారీగా దూసుకెళ్లగా టీసీఎస్ షేరు పుంజుకుంది. ఏకంగా 5 శాతానికిపైగా పెరిగి రూ. 3,620.40 వద్ద స్థిరపడింది. మిగతా ఐటీ స్టాక్స్ కూడా బాగానే రాణించాయి.